2 Timoteo 4 - Quiché Bible

¹ Chuwäch ri Dios xukuje' ri Kajaw Jesucrist, ri cuk'at na tzij paquiwi' ri c'asc'oj xukuje' ri cäminakib, cuc'ut c'u na rib cajawin na, quinya' we pixbenic ri' chawe:

² chak'alajisaj ri u tzij ri Dios aretak cuya' cätzijoxic xukuje' aretak man cuya' taj. Chatyajonak, chatk'ilonok xukuje' chaya' chuk'ab, chattijon ba' ruc' ronojel coch'onic.

³ Cäpe c'u na k'ij aretak ri winak man cäquich'ij ta na ri suc'alaj tijonic. Xane' quequitzucuj na q'ui cajtij ri cäquic'ut chquiwäch jas ri cäcaj cäquito, jas ri u beya'l ri xa' qui rayibal.

⁴ Cäquijech'obisaj c'u na ri qui tanibal chrij ri kastzij, are' quequitakej ri puquebal.

⁵ Ri at c'ut chachomaj jas ri caban pa ronojel, chach'ija' ri c'ax, chatzijoj ri tzij re colobal ib chque ri winak, chaq'uisa' ri a chac.

⁶ Ri in c'ut, xak weyem chic ri nu cämisaxic, ri jok'otaj re ri welic bic nakaj c'o wi.

⁷ Nu cojom nu chuk'ab pa ri utzalaj ch'o'j, xinq'uis ri nu chac, xinchajij wib pa ri nu cojonic.

⁸ Kas camic c'ut c'olotal chi apan chwe ri corona re suq'uil, ri tojbal ri cuya' na ri Ajawaxel, ri suc'alaj k'atal tzij pa ri k'ij ri'; man xak xuwi ta c'u chwe in, xane' xukuje' chque conojel ri quelok'ok'en ri u petibal.

Ri Pawl cubij che ri Timotey jas cuban na

⁹ Chanim chatpe wuc' che wilic.

¹⁰ Xinuya' c'u can ri Dems. Ri are' utz xeril na ri jastak re ri uwächulew, benak pa Tesalon. Ri Cresent benak pa Galas, xukuje' ri Tito pa Dalmas.

¹¹ Xuwi ri Lucax c'o wuc'. Chatzucuj ulok ri Marcux, chac'ama' ulok awuc'. Kas cajwataj c'u chwe che ri patan.

¹² Xintak bic ri Tiquico pa Epes.

¹³ Aretak catpetic, chac'ama' ulok ri nu k'u' ri xinya' can pa Troas cho rachoch ri Carp. Xukuje' chebac'ama' ulok ri wuj xukuje' ri tz'um ri tz'ibam qui wäch.

¹⁴ Ri Alejandr ri ch'ayal ch'ich', u banom q'ui etzelal chwe. Ri Ajawaxel chtojow che jas ri u chac u banom.

¹⁵ Ri at chachajij awib chuwäch, xukuje' rumal rech chi sibalaj xuc'ulelaj u wäch ri ka tzij.

¹⁶ Pa ri nabe to'bal wib chquiwäch ri k'atal tak tzij, mawi jun xc'oji' wuc', xane' conojel xinquiya' canok. Man quinwaj ta c'ut chi cäya' we mac ri' chquij.

¹⁷ Are c'u ri Ajawaxel xc'oji' wuc', xuya' nu chuk'ab, rech xincuin che u tzijoxic ri tzij re colobal ib, jeri' chi xquita' conojel ri winak. Xinesax c'u pa u chi' ri coj.

¹⁸ Xukuje' quinresaj na ri Ajawaxel pa ronojel itzelalaj chac ri cäbantaj na, quinucol na, quinuc'am c'u na bic pa ri rajawibal chicaj. ¡Chnimarisax ta u k'ij ri are' amak'el chbe k'ij sak! Je chbanok.

Ri Pawl cuya' rutzil qui wäch ri cojonelab

¹⁹ Chaya' rutzil qui wäch ri Prisil xukuje' ri Aquil, xukuje' ri e aj uwo rachoch ri Onesipor.

²⁰ Ri Erast xcanaj can pa Corint. Ri Tropim yawab xinya' can pa Milet.

²¹ Chatpetok chanim rech c'amajok ri nimalaj tew. Ri Eubul, ri Pudent, ri Lin, ri Claud xukuje' conojel ri kachalal cäquiya' rutzil a wäch.

²² Ri Ajawaxel Jesucrist chc'ol ta ruc' ri awanima'. Are' ta ri Dios cuban tok'ob chiwe.