2 Timoteo 2 - Quiché Bible

Jun utzalaj rajch'o'j ri Jesucrist

¹ Ri at, nu c'ojol, chatux co pa ri tok'ob ri c'o pa ri Crist Jesus.

² Ri nu bim chawe chquiwäch e q'ui k'alajisanelab, are ri' chajacha' chque ri e jicalaj tak winak ri xukuje' quecuin che qui tijoxic niq'uiaj chic.

³ At c'ut chach'ija' ri c'ax junam wuc' je jas jun utzalaj rajch'o'j ri Jesucrist.

⁴ Man c'o ta jun ajch'o'j ri cuputzcuyij ta rib chupam ri jastak quech ri winak; rajawaxic c'ut chi are cuban cakaj chuwäch ri xcojow che ch'o'j.

⁵ Xukuje' we c'o jachin cutij u k'ij pa ri aninem, man cuch'äc ta ri tojbal ri nim u banic we ta ma ta cubano jas ri u beya'l ri aninem.

⁶ Ri caticow ri ulew takal che chi are' nabe cuc'am rech ri u wächinic ri cutico.

⁷ Chachomaj ri quinbij. Are c'u ri Ajawaxel catto'w na che u ch'obic ronojel.

⁸ Chnataj ri Jesucrist chawe, ri rija'l ri David, ri xc'astaj chquixo'l ri cäminakib, jas ri cubij ri tzij re colobal ib ri quintzijoj.

⁹ Rumal ri utzalaj tzij ri' quinrik c'ax, c'ä xinximitaj na pa che' jas jun banal etzelal. Are c'u ri u tzij ri Dios man ximom taj.

¹⁰ Rumal ri' quinch'ij conojel ri rikoj c'ax che cutzil ri e cha'om, rech xukuje' ri e are' cäquirik ri colobal ib ri c'o pa Crist Jesus ruc' ri junalicalaj juluwem.

¹¹ Kastzij wa' we tzij ri': We cujcäm ruc' are', xukuje' cujc'asi' na ruc'.

¹² We cäkach'ij ri c'ax, cäya' na takanic pa ka k'ab ruc' ri are'. We man cäkak'alajisaj taj chi uj cojoninak che, xukuje' ri are' man cujuk'alajisaj taj chi uj cojonelab.

¹³ We ri uj cätukar ri ka cojonic, ri Are' kas jic wi. Man cäcuin ta c'ut chi ma ta cuk'alajisaj rib chi are Dios.

Jun ajchac ri utz u banom che ri u chac

¹⁴ Chanataj wa chque. Pa ri u bi' ri Dios chata' chque chquitanaba' u yajic quib puwi' jujun tak tzij. Ri c'ulelam ib man c'o ta u patan; xane' quequiyojtajisaj ri quetatabenic.

¹⁵ Chawila' awib rech catac'aba' awib chuwäch ri Dios, jas jun ri utz u banom che ri chac, jas jun ajchac ri man c'o ta caq'uix wi, ri suc' u banom che u ya'ic ri tijonic aj kastzij.

¹⁶ Chak'ila' awib che ri tzijonem re we uwächulew ri' ri man c'o ta quechbex che xane' catquinim chupam ri etzelal.

¹⁷ Ri tzijonem ri' chanim cujabuj rib chquixo'l ri winak, jas jun ch'a'c ri cutij ri cuerp. Jujun chque ri jewa' xquibano, are' ri Imeney xukuje' ri Pilet.

¹⁸ Ri e are' xesachic, xquiya' can ri kastzij, cäquibij chi bantajinak chic ri c'astajibal, cäquituquij ri qui cojonic jujun.

¹⁹ Pune' ba jewa' tajin caquibano, are c'u ri u tac'alibal ri Dios co tac'alic, keta'm chi kastzij rumal we tzij ri': “Ri Ajawaxel cuch'ob qui wäch ri e rech”, xukuje' ri jun tzij chic: “Ronojel winak ri cubij chi cojoninak che ri Ajawaxel, chutasa' rib chrij ri etzelal.”

²⁰ Pa jun nimalaj ja man xuwi ta e c'o jastak re k'an puak xukuje' re sak puak, xane' xukuje' e c'o jastak re che' xukuje' re ulew. Jujun chque ri jastak nim quebil wi, jujun chic man kas ta nim quebil wi.

²¹ Jeri' xukuje' we jun cujosk'ij rib, xukuje' man cuban ta ri etzelal, are ri' nim quil wi, tastalic winak, c'o c'u u patan che ri Ajawaxel, suc'umam che ronojel u wäch utzalaj tak chac.

²² Chatanimaj chquiwäch ri e itzelalaj tak rayinic aj c'ojolal, are chaterenej ri suq'uil, ri cojobal, ri lok'ok'ebal c'uxaj, ri jamaril, cuc' ri winak ri caquiban ch'awem ruc' Dios ri ch'ajch'oj ri canima'.

²³ Maya' c'olbal chque tak ri tzij, xukuje' ri chomanic ri man c'o ta qui patan, o ri xak cabixic. Aweta'm c'ut chi ri u banic wa' xa cuwalijisaj ch'o'j.

²⁴ Man takal ta che ri jun pataninel re ri Ajawaxel chi cäch'ojinic, xane' rajawaxic chi are utz chque conojel, cäna'w che ri tijonic, xukuje' cucuy ri qui mac ri winak,

²⁵ xukuje' ruc' manxoyil quebutijoj ri winak ri cäquic'ulelaj ri u tzij. We ne ri Dios cuya' na chque chi cäquiq'uex qui c'u'x rech cäquetamaj ri kastzij.

²⁶ Rech quetzelej chupam ri utzalaj qui chomanic, quebel c'u chupam ri u cämibal ri itzel, e chaptajinak c'u rumal rech cäquiban ri u rayinic.