2 Pedro 3 - Quiché Bible

Ri u petic ri Ajawaxel

¹ Lok'alaj tak wachalal, are ucab wuj wa' ri quintz'ibaj bic chiwe. Chupam ri quieb wuj, quixinpixbej wi rech quec'astaj ri sakalaj i chomanic.

² Rech cänataj chiwe ri tzij ri bim can cumal ri tastalic k'axal tak tzij, xukuje' ri u takanic ri Ajawaxel, ri Colonel, ri xixtijox wi cumal ri e u takomxenlab.

³ Iweta'm chi c'u wa', chi pa ri q'uisbal tak k'ij quepe na winak ri cäquetz'bej u wäch ri jastak aj Dios, are cäquiban na ri etzelal re qui rayibal ri e are',

⁴ cäquibij: “¿Jawije' c'o wi ri u petic ri Ajawaxel ri bim ulok? Bim chi ya' wa' aretak c'ä majok checäm ri e ka mam, conojel c'ut ri jastak xa' je wi qui wäch jas ri pa ri u tiquiritajic ulok ri uwächulew c'ä camic.”

⁵ Xa man cäcaj taj cäquetamaj chi ojer rumal ri u tzij ri Dios xebantaj ri caj, chi ri ulew pa ri ja' xel wi ulok xukuje' chi co c'o pa ri ja'.

⁶ Rumal ri', ri uwächulew ojer xjik' pa ri ja', xsach u wäch.

⁷ Are c'u ri caj ulew ri e c'o camic, e chajin rumal ri u tzij ri Dios c'ä pa ri k'ij re k'atoj tzij, queporox c'u na, aretak cäsach na qui wäch ri winak ri man cäquiya' ta u k'ij ri Dios.

⁸ Mäsach ba' wa' pa i jolom, lok'alaj tak wachalal: chi ri jun k'ij chuwäch ri Ajawaxel je jas ri mil junab, xukuje' ri mil junab je jas ri jun k'ij.

⁹ Ri Ajawaxel man cäbeytaj ta che u tz'akatisaxic ri u bim chke, jas ri cäquichomaj jujun. Xane' ix reyem ruc' coch'onic, man cäraj taj chi c'o jun cäsach u wäch, xane' are cäraj chi conojel cäquiq'uex na qui c'u'x.

Ri k'ij re ri Ajawaxel

¹⁰ Cäpe c'u na ri k'ij re ri Ajawaxel jas jun eläk'om. Pa ri k'ij ri', cäsach c'u na u wäch ri caj, cätataj c'u na ri jun nimalaj jininem. Ri jastak ri xebanbex re quenicow na, cäsach qui wäch. Ri uwächulew xukuje' ri chac ri e c'o chuwäch quechajirisax na.

¹¹ U mac c'u rech chi conojel ri jastak cäsachisax na qui wäch, ¡sibalaj rajawaxic chi quixbin pa jun tastalic i c'aslemal xukuje' quixniman che ri Dios!

¹² Chiweyej xukuje' chiwanej iwib che ri u petic ri u k'ij ri Dios, aretak ri caj quec'at na xukuje' cäsach na qui wäch, xukuje' ri jastak ri xebanbex re quenicow na xukuje' queja'r na.

¹³ Are c'u ri uj keye'm ri c'ac' caj xukuje' ri c'ac' ulew, chila' c'ut cäc'oji' wi na ri suq'uil, jas ri u bim ulok ri Dios.

¹⁴ Rumal ri', lok'alaj tak wachalal, iweye'm we jastak ri', chicojo' apan i chuk'ab, rech quixulurika' ri Dios pa jamaril, man ix tz'ajtajinak ta apanok, ix ch'ajch'oj.

¹⁵ Chichomaj ba' chi colobal ri u coch'onic ri Kajaw; je jas xutz'ibaj ri lok'alaj kachalal Pawl chiwe, jas ri no'j ri yo'm che.

¹⁶ Xukuje' pa conojel ri u wuj xebutzijoj wi we jastak ri'. E c'o jujun chque ri jastak ri' c'ax qui ch'obic, jech'bam u bixic cumal ri winak ri man c'o ta quetam xukuje' ri man e cowirisam taj, jas cäquiban chque ri niq'uiaj Tz'ibatalic chic. Rumal wa' cäquic'am ulok sachbal qui wäch.

¹⁷ Ri ix c'ut, lok'alaj tak wachalal, ri iweta'm chi ulok wa' ojer, chichajij ba' iwib, mixc'am bic cumal ri qui subunic ri banal tak etzelal, rech man quixtzak ta ne ri kas co ix c'o wi.

¹⁸ Chixq'uiy ba' pa ri u tok'ob xukuje' pa ri retamaxic u wäch ri Kajaw xukuje' ka Colonel Jesucrist xukuje' c'ä pa tak ri k'ij junab chbe k'ij sak. Je chbanok.