2 Pedro 2 - Quiché Bible

Ri quequitzijoj banoj tzij

¹ Xukuje' xec'oji' can chquixo'l ri winak ojer jujun ri xak xquijaluj quib chi e k'axal tak u tzij ri Dios. Xukuje' chixo'l ix quec'oji' na jujun ri cäquijaluj na quib chi e ajtijab. Ri e are' chi c'uyal cäquic'am ulok tijonic ri quec'amow bic ri winak pa ri c'ax. Man caquik'alajisaj taj ri Ajawaxel ri xecolowic. Rumal ri' chanim cäsach na qui wäch rumal rech ri cäquibano.

² E q'ui c'ut quequiterenej na pa ri quitzokopin tak ib re munil. Cäyok' c'u ri be re ri kastzij rumal quech.

³ Ri e are' rumal ri u rayixic ri jastak que ri winak, cäquitzucuj na jas cäquiban che resaxic puak chiwij cuc' ri qui banoj tzij. Cäc'äjisax c'u na qui wäch jas ri bim ulok ojer, man cäbeytaj ta ri c'äjisabal qui wäch. Man c'o ta quelic chuwäch ri c'ax ri cäpe na chquij.

⁴ Ri Dios man xusach ta qui mac ri tako'nib aj caj ri xemacunic, xane' xebuq'uiak pa ri xibalba, xebutz'apij pa ri k'eku'm, chila' cäqueyej wi na ri k'atoj tzij paquiwi'.

⁵ Xukuje' man xusach ta qui mac ri winak ri e c'o cho ri uwächulew ojer, xane' xuwi xucol ri Noe, tzijol re ri suq'uil, e rachil e wukub winak chic, aretak xutak ulok ri nimalaj k'ekal jäb paquiwi' ri winak re ri uwächulew ri man xquiya' ta u k'ij ri Dios.

⁶ Xukuje' xuk'at tzij paquiwi' ri tinimit Sodom xukuje' Gomor, xusach qui wäch, xuban chaj chque, xebuya' che c'utbal chquiwäch ri winak ri man cäcaj taj queniman che ri Dios.

⁷ Xresaj c'u bic ri suc'alaj Lot, ri xurik c'ax cumal ri e banal tak etzelal ri xquiban tz'ilalaj mac ri xcaj.

⁸ Ri suc'alaj achi ri', aretak xc'oji' chquixo'l, ronojel k'ij ri suc'alaj ranima' xurik c'ax rumal ri itzelalaj tak qui chac ri winak ri xrilo xukuje' xuto.

⁹ Jeri' reta'm ri Ajawaxel queresaj chuwäch ri takchibal mac conojel ri queniman che ri Dios. Xukuje' reta'm quebutas can ri man e suc' taj rech cuc'äjisaj qui wäch pa ri k'ij re ri k'atoj tzij.

¹⁰ Sibalaj cuc'äjisaj c'u na qui wäch ri winak ri cäquiban ri itzelalaj u rayibal ri qui ti'jal, xukuje' cäquiban tz'ilalaj tak jastak, ri man cäquiya' ta quib pa takic. Ri e are' man c'o ta cäquixe'j wi quib, xane' cäquibano jachique ri cäcaj, xukuje' man cäquixe'j ta quib che u bixic c'axalaj tak tzij chque ri c'o quekle'n.

¹¹ Are c'u ri e tako'n aj caj, ri nim na qui cuinem xukuje' c'o na qui takanic, man cäquibij ta c'axalaj tak tzij chuwäch ri Ajawaxel che u ya'ic mac chquij ri c'o quekle'n.

Ri quitijonic re subunic

¹² E are' c'u we winak ri', e je ta ne e awaj ri man c'o ta qui chomanic, pa quech wi e alc'ualam rech quechapic xukuje' quecämisaxic. Quequiyok' ri jastak ri man queta'm taj. Quekaj c'u na pa ri cämisabal ri qui banom.

¹³ Ri e are' caquirik c'ax rumal ri c'ax ri qui banom chque jule' chic. Caquichomaj chi sibalaj utz que aretak e c'o pa tak ri quicotemal ri xa' e re jok'otaj. E jun tz'ilol xukuje' jun q'uixbal aretak quixcachilaj pa tak ri e i wa'im re xk'ekal, quequicot c'ut pa tak ri e qui banoj ri xa' e subunelab.

¹⁴ Nojinak ri qui bak'wäch che quikajic pa mac cuc' niq'uiaj chic aretak quequil ri ixokib. Man cäquitänaba' ta ri macunic, cäquicoj qui c'u'x ri winak ri e tukar pa ri qui chomanic, quequiquiäk rayij ri jastak quech ri winak, e c'o chuxe' c'okonic.

¹⁵ Qui yo'm c'u can ri suc'alaj be, e sachinak, qui takem ri u be ri Balaam u c'ojol ri Beor, ri xulok'ok'ej ri tojbal re ri u banic ri etzelal.

¹⁶ Xyaj c'ut rumal rech chi man xniman taj. Jun bur, ri man cach'aw taj, xch'awic je ta ne jun winak, are xk'atin ri conalaj u chomanic ri k'axal tzij.

¹⁷ Wa' e winak e chaki'j tak c'ua', e je jas ri sutz' ri e c'amom ulok rumal jun nimalaj quiakik'. Ri u k'ekal ri k'eku'm chque ri e are' ya'tal wi, quec'oji' na chupam amak'el chbe k'ij sak.

¹⁸ Cäquibij nimak tak tzij ri man c'o ta qui patan. Ruc' ri etzelal ri curayij ri qui ti'jal, cäquicoj qui c'u'x ri winak ri c'ämaja' naj quiyo'm can ri sachinakil.

¹⁹ Cäquibij chi quequitzokopij ri winak, e ximital c'u ne ri e are' rumal ri etzelal. Ri jun ri xch'äcataj rumal jun chic, cäc'oji' ri' chuxe' ri u takanic ri jun ri xch'äcowic.

²⁰ Aretak e animajinak chquiwäch ri tz'ilol re ri uwächulew rumal ri retamaxic u wäch ri Ajawaxel xukuje' ri Colonel Jesucrist, we c'u qui caralij chi jumul quib chupam, sibalaj c'ax na ri' cäquiriko chuwäch ri nabe.

²¹ Are ta utz na ri' chque, we ta ma ta xquetamaj ri be re ri suq'uil, chuwäch ri xquetamaj, c'äte ri' xquitas can quib chrij ri u takanic ri Dios ri yo'm chque.

²² Je c'u xquic'ulmaj jas ri jun tzij ri cäbixic, kastzij c'u ri tzij: “Ri tz'i' xtzelej che u tijic ri u xo'j, ri ati't ak ri ch'ajtajinak chic xuwolkotij chi jumul rib pa ri xok'ol.”