2 Pedro 1 - Quiché Bible

Ri Lu' cuya' rutzil qui wäch ri cojonelab

¹ Ri in Simon Lu', rajchac xukuje' takom re ri Jesucrist, quintz'ibaj we wuj ri' chque conojel ri qui rikom ri cojonic ri sibalaj nim rajil junam ruc' ri ke uj, rumal ri u suq'uil ri ka Dios xukuje' ka Colonel Jesucrist.

² Quinwaj chi kas quiwetamaj u wäch ri Dios xukuje' ri Kajaw Jesus, rech ri u tok'ob xukuje' ri jamaril sibalaj queq'uiyir ta na pa tak ri iwanima'.

Jas ri rajawaxic quiban ix ri ix cojonelab

³ Ri Dios, rumal ri u cuinem, u sipam conojel ri rajawaxic che ri ka c'aslemal, rech cujniman che ri are', rumal rech chi keta'm u wäch ri jun ri xujusiq'uij rumal ri u juluwem xukuje' ri rutzil.

⁴ Rumal ri u juluwem xukuje' ri rutzil ri e u sipam chke ri e nimak tak e u chi'nic ri sibalaj e pakal cajil, rech ri ix quixcuinic quebic'am iwech ri u binibal ri Dios rech ri ix quixcuinic man quixkaj ta pa u k'ab ri etzelal ri c'o cho ri uwächulew ri cäpe cumal ri e itzel tak rayibal.

⁵ Rumal ri' chicojo' ronojel i chuk'ab rech rumal ri i cojonic cac'oji' xukuje' jun utzalaj i c'aslemal aj suq'uilal, ruc' c'ut we utzalaj c'aslemal ri' rajawaxic cac'oji' iwetamanic.

⁶ Ruc' c'ut ri iwetamanic rajawaxic chi cac'oji' i tij piwi'; ruc' c'ut ri i tij piwi' rajawaxic cac'oji' i coch'onic rech quixtakenic aretak c'o c'ambejenic; rumal c'ut ri coch'onic rajawaxic chi quixniman che ri Dios ri lok' chiwäch.

⁷ Ruc' c'ut ri nimanic che ri Dios rajawaxic chi quiwuc'aj iwib cuc' ri achalaxelab; ruc' c'ut ri ruc'axic iwib cuc' ri achalaxelab rajawaxic chi cac'oji' i lok'ok'ebal c'uxaj.

⁸ We quiban we jastak ri' xukuje' queq'uiyir iwuc', man cuya' ta ri' xak quitzak k'ij, xane cäc'oji' na i wächinic rumal ri retamaxic u wäch ri Kajaw Jesucrist.

⁹ Apachin c'u ri man cuban ta we jastak ri', moy, man naj ta cäca'y wi, sachinak pa u jolom chi e ch'ajtajinak chic ri ojer tak u mac.

¹⁰ Rumal ri', wachalal, quinbij wa' chiwe: Ri Dios xixuch'a xukuje' ix cha'talic. Chicojo' ba i chuk'ab che u c'utic pa ri i c'aslemal chi kastzij ix siq'uim xukuje' ix cha'tal rumal ri Dios. We jewa' quibano, mawi jumul quixtzakic.

¹¹ Jeri' cäya' na nimalaj oquibal chiwe pa ri junalic rajawibal ri Kajaw, ka Colonel Jesucrist.

¹² Rumal ri', quinnataj we jastak ri' chiwe, pune' iweta'm chic xukuje' co i tac'abam chi iwib pa ri kastzij ri c'o iwuc'.

¹³ In quinchomaj chi utz we quinnataj wa' chiwe che i c'asuxic, joropa' k'ij ri quinc'asi' na cho ri uwächulew.

¹⁴ Weta'm c'ut chi chanim quincäm na, jas ri xuk'alajisaj ri Kajaw Jesucrist chnuwäch.

¹⁵ Xukuje' quincoj na nu chuk'ab rech amak'el quenataj na we jastak ri' chiwe aretak in cäminak chic.

Xkil ri u juluwem ri Crist

¹⁶ Aretak xkatzijoj ri u cuinem xukuje' ri u petic ri Kajaw Jesucrist chiwe, man xkatzijoj ta chomanic chiwe ri xa' ta pa qui jolom ri winak elinak wi ulok, xane kas uj xujilow ri u nimalil ri Jesucrist.

¹⁷ Ri Dios Tataxel xuk'alajisaj chi nim cäril wi ri Jesucrist xukuje' xunimarisaj u k'ij, aretak xpe ulok jun ch'abal ruc' nimalaj juluwem ri jewa' xubij: “Are lok'alaj nu C'ojol wa', ri sibalaj cäkaj chnuwäch.”

¹⁸ Xukuje' ri uj xkata' ri ch'abal ri xpe chicaj, aretak uj c'o ruc' pa ri tastalic juyub.

¹⁹ Xukuje' c'o can ri qui tzij ri k'axal tak tzij kuc', ri sibalaj co tiquitoj, man cäq'uextaj taj. Are c'u utz we kas quitatabej ri tzij, ri je jas jun chäj ri cäjuluw pa jun k'ekumalaj c'olbal, c'ä aretak cäsakaric, c'ä quil na ulok ri ch'imil re u sakaric pa ri iwanima'.

²⁰ Rajawaxic nabe quich'obo, chi ronojel ri qui tzij ri k'axal tak tzij ri c'o pa ri Tz'ibatalic, man cuya' taj cubij jun ri xa u chomanic pa re wi che ri u k'alajisaxic.

²¹ Ri qui tzij c'ut ri k'axal tak tzij man xpe ta ojer xa' rumal ri u rayibal jun winak, xane' e winak ri xquiya' quib pa u k'ab ri Dios ri xetzijonic, xya' qui no'j rumal ri Ruxlabal ri Dios.