2 Corintios 9 - Quiché Bible

Ri cuchuj ri caya' chque ri achalaxelab

¹ Man rajawaxic taj quintz'ibaj bic chiwe chrij ri qui to'ic ri cojonelab,

² rumal rech chi weta'm chi ri ix sibalaj quiwaj quiban ruc' ronojel iwanima'. Nu bim chque ri e aj Masedon chi quinquicot iwuc', rumal rech chi ri ix aj Acay i chomam ulok u banic wa' junabir, xa' c'u co'l man conojel ri aj Masedon quichajim anima' che u banic quech ri quiban ix rumal ri utzalaj i chomanic.

³ Xebentak c'u bic ri kachalal rech man xak ta lok' ri nu tzij chi utz i banom che we cuchuj ri', rech quisuc'umaj iwib je jas ri nu bim.

⁴ We ne e c'o jujun chque ri aj Masedon quebe wuc', quixelquirika' c'ut man i suc'umam ta iwib. We jeri', quel na ka q'uixbal, rumal rech chi ka jiquibam ka c'u'x chiwij, xukuje' ri ix quel na i q'uixbal.

⁵ Rumal ri' xinchomaj chi rajawaxic xebenbochi'j ri kachalal chi quebopan iwuc' nabe, rech quixquito' che u suc'umaxic apan ri i cuchuj ri i bim chi quiya'o. Rech jeri' suc'umatal chi apanok, jas jun cuchuj ri i yo'm ruc' ronojel iwanima', ma ta je jun cuchuj ri quiya' ruc' xu'yal.

⁶ Chnataj wa' chiwe: Apachin ri xa' jubik' cäticonijic, xa' jubik' ri' ri u wächinic ri tico'n cuyac na. Apachin c'u ri nim cäticonijic, nim ri' ri u wächinic ri tico'n cuyac na.

⁷ Chijujunal ba' chiya' jas ri cäpe pa iwanima', man ruc' ta bis, mawi rumal ta rech chi xa' ta cäcoj chuk'ab chiwe. Ri Dios c'ut culok'ok'ej ri cäyan ruc' quicotemal.

⁸ Ri Dios cäcuinic cäyan chiwe ix ruc' telechinic ronojel qui wäch tak tewichibal, rech cac'oji' iwuc' ronojel ri cajwataj chiwe c'o c'u chto'taj iwuc' che to'banic pa conojel qui wäch utzalaj tak chac.

⁹ Jas ri Tz'ibatalic: “Xuya' q'ui jastak chque ri mebayib, cäjeki' ri u suq'uil amak'el chbe k'ij sak.”

¹⁰ Ri Dios, ri cuya' ri ija' ri cätiquic xukuje' ri tzukbal ib, cuya' na chiwe ronojel ri cajwatajic che ri i tico'n, cuban c'u na chi caq'uiy ri i tico'n, cuban c'u na chi rumal ri man i q'ueq'uetem taj sibalaj cuya' jun nim wächinic.

¹¹ Jeri' ri ix quec'oji' na ronojel qui wäch k'inomal iwuc' quixcuin c'u ri' quixyan ruc' telechinic. Are c'u ri cuchuj ri quitak bic ix, cux na wa' chi rumal kech uj chi ri achalaxic tak quequiya' na maltioxinic che ri Dios.

¹² Aretak xc'am bic we to'banic, man xuwi ta quiya' ri rajawaxic chque, xane' xukuje' quiban chque chi sibalaj cäquimaltioxij che ri Dios.

¹³ Ri e are' xek'ijilan che ri Dios, are c'u we to'banic ri' cuc'ut na chquiwäch chi ri ix quixniman che ri utzalaj tzijol ri xuc'am ulok ri Crist xukuje' ri e are' nim cäquil wi na ri Dios rumal ri telechimalaj i cuchuj chque xukuje' chque conojel.

¹⁴ Cäquiban c'u na ch'awem ruc' Dios piwi'. Quixquilok'ok'ej rumal ri nimalaj u tok'ob ri Dios ri c'o iwuc'.

¹⁵ Cäkamaltioxij ba' che ri Dios, rumal ri nimalaj u sipanic chke, ri man e c'o ta ka tzij che u ya'ic u bixic.