2 Corintios 7 - Quiché Bible

¹ Lok'alaj tak wachalal, are wa' ri u bim ri Dios chi cuya' na chke. Rumal ri' chkesaj ba' pa ri ka c'aslemal conojel ri jastak ri e tz'il ri e c'o pa ri ka cuerp xukuje' pa ri kanima'. Chkaxe'j kib chuwäch ri Dios, rech cujux tastalic tak winak pa ronojel.

Ri u q'uexic qui c'u'x ri aj corintib

² ¡Chujic'ama' ba' pa iwanima'! Man c'o ta etzelal ka banom che jachin jun; man c'o ta c'ax ka banom che jachin jun; man ka subum ta jachin jun.

³ Man quinbij ta wa' che u ya'ic mac chiwij. Nu bim c'ut chi ix c'o pa ri kanima', rech cujc'asi' junam xukuje' cujcäm junam.

⁴ Sibalaj nim ri cu'lbal nu c'u'x chiwij, xukuje' quinquicot iwuc'. Sibalaj cu'bisam nu c'u'x xukuje' nim ri nu quicotemal pa ronojel ri ka c'axc'olil.

⁵ Aretak xujopan pa Masedon, man c'o ta uxlanem xkaya' che ri ka cuerp, xane' xekarik ronojel u wäch c'axc'olil. Xepe tak u q'ueyowal pakawi' xe'n tak ib pa ri kanima'.

⁶ Are' c'u ri Dios ri cucu'bisaj qui c'u'x ri sachinak qui c'u'x, xucu'bisaj ka c'u'x ruc' ri ropanem ri Tit.

⁷ Man xuwi ta rumal ri u petic xcu'bisax ka c'u'x, xane' xukuje' rumal rech chi ri are' xucu'bisaj u c'u'x chiwij. Xutzijoj c'u chke chi sibalaj quiwaj quiwil ka wäch, chi quixbison chke, chi quiwaj quiwetamaj we c'o c'ax nu rikom. Rumal ri' sibalaj xinquicotic.

⁸ Pune' xixinya' pa bis rumal ri wuj, man quinbison ta c'ut chi xintz'ibaj bic chiwe. Pune' xinbison can nabe rumal rech chi ri wuj xuya' bis chiwe, xa c'u quieb oxib k'ij xixbisonic.

⁹ Camic c'ut quinquicotic, man rumal ta rech chi xixbisonic, xane' rumal rech chi ri i bis xuban chiwe chi xiq'uex i c'u'x. Xixbison c'ut jas ri utz xril wi ri Dios. Jeri' man c'o ta c'ax quirik kumal.

¹⁰ Ri bis ri cuya' ri Dios cuban che jun chi cuq'uex u c'u'x rech cäcolotajic. Man c'o ta c'u bis rumal wa'. Are c'u ri bis re ri uwächulew cuya' cämical.

¹¹ Ri ix xicoch' ri bis jacha' ri cäkaj chuwäch ri Dios, ¡chebiwila' c'ut ri xel wi! Xixoc il che ri xc'ulmatajic xito' c'u nu wi'; xuban chiwe chi xpe iwoyowal, xukuje' xina' xe'n ib. Chuwi' chi c'u wa' xpe i rayinic che wilic, xichomaj c'ut u c'äjisaxic u wäch ri ajchak'mac. Ruc' c'u ronojel wa' i c'utum ix chi man i nimon ta iwib chupam wa'.

¹² Je c'u ri', aretak xintz'ibaj bic ri wuj chiwe, man xintz'ibaj taj rumal rech ri jun ri xbanow ri etzelal, mawi rumal rech ri jun ri xban etzelal che. Xane' xintz'ibaj rech cäc'ut chiwäch chi sibalaj cujilok'ok'ej chuwäch ri Dios.

¹³ Rumal c'u ri', ka cu'bisam ka c'u'x. Man xuwi ta wa' ri cu'bisabal ka c'u'x, xane' xukuje' xujquicot rumal ri u quicotemal ri Tit, chi xuxlan ri ranima' rumal iwech iwonojel.

¹⁴ Aretak xinbij che ri Tit chi sibalaj quinquicot iwuc', man xel ta nu q'uixbal. Ronojel c'u ri xkatzijoj chiwe, are kastzij, je xukuje' ronojel ri utz ri xkabij chiwij che ri Tit, kas je xelic.

¹⁵ Are c'u ri are' sibalaj ix lok' chuwäch aretak cänataj che chi iwonojel ix xixniman che, ruc' c'u ne nimalaj oquem il xic'amowaj.

¹⁶ ¡Quinquicotic, rumal rech chi nu cu'bisam nu c'u'x chiwij pa ronojel!