2 Corintios 6 - Quiché Bible

Uj pataninel rech ri Dios

¹ Ri uj uj rajchaquib ri Dios junam iwuc'. Rumal ri' quixkabochi'j chi xak lok' mic'am ri u tok'ob ri Dios.

² Cubij c'ut ri are' chquipam ri e tz'ibatalic: “Chupam ri jok'otaj ri takalic xatintatabej; chupam ri k'ij rech ri colobal ib xatinto'o.” Camic c'ut are wa' ri k'ij utz chiwe, are wa' ri k'ij rech quixcolotajic.

³ Man c'o ta ri cäkaya' ta wi itzel c'utbal che jachin jun, rech man cäyok' ta ri ka chac ri cätajin cäkabano.

⁴ Man je ta c'u ri' pa ronojel cäkaya' c'utbal chi uj pataninel rech ri Dios, cätajin c'u cäkach'ijijej ruc' nimalaj coch'onic ri e rikoj tak c'ax, ri q'uetetem, ri e q'ueyowal tak.

⁵ Aretak cujch'ayic, aretak cujcoj pa che', aretak cäquimulij quib ri ka c'ulel chkij, aretak cäkarik c'axalaj tak chac, aretak cujc'asc'atic, xukuje' aretak cäkarik numic.

⁶ Pa ronojel wa': ch'ajch'oj ri ka c'aslemal, keta'm ri kastzij c'o ka coch'onic, cäkaban tak tok'ob, c'o ri Ruxlabal ri Dios kuc', kastzij quekalok'ok'ej ri winak,

⁷ rumal ri ka tijonic aj kastzij xukuje' rumal ri u cuinem ri Dios pa ri uj. Quekacoj tak ri ch'ojibal aj suq'uilal, rumal ri iquiak'ab che ch'ojinic rumal ri ka mox k'ab che u to'ic ib.

⁸ C'o jutak mul nim cujilic, jutak mul chic cujyok'ic; c'o chi jutak mul utz ka tzijol, c'o chi jutak mul cäbix itzel tzij chkij. Cujk'abaxic chi uj banal tak tzij, are c'u ne cäkabij ri kastzij.

⁹ Cäban chke chi je ta ne ri ma ta etamatal ka wäch, sibalaj c'u ne etamatal ka wäch. Camic cäkabano, ka takem c'u ne c'aslem; cäquic'äjisaj ka wäch man c'u cuj qui cämisaj taj.

¹⁰ Je ta ne ri cujbisonic, cujquicot c'u ne amak'el; je ta ne ri uj ta mebayib, e q'ui c'u ne ri e ka k'inomarisam; je ta ne ri ma ta c'o jas c'o kuc', c'o c'u ne ronojel kuc'.

¹¹ Ix aj corintib, ka bim ronojel chiwe. Quixkalok'ok'ej ruc' ronojel kanima'.

¹² Ronojel ka banom chiwe ruc' ronojel kanima'. Ix ri' man i banom ta ronojel chke ruc' ronojel iwanima'.

¹³ Quixinpixbej jas cuban jun tataxel chque ri ralc'ual: Chinilok'ok'ej jas ri in quixinlok'ok'ej.

Uj rachoch ri c'aslic Dios

¹⁴ Miwuc'aj iwib cuc' ri man e cojonelab taj. We je quiban wa', quixc'oji' chuxe' jun eka'bal ri man junam taj. ¿La cuya' lo caruc'aj rib ri suq'uil ruc' ri man suq'uilal taj? ¿La cuya' lo curik rib ri sakil ruc' ri k'ekumalil?

¹⁵ Man cuya' taj u wäch ri Crist ruc' ri itzel, mawi ri cuc'ulaj ta u wäch ri cojonel ruc' ri man cojonel taj.

¹⁶ Man c'o ta ri cajunamataj ta wi ri rachoch Dios cuc' tak ri diosib. Rumal rech chi ri uj uj rachoch ri c'aslic Dios, jacha' ri kas u bim ri are': “Quinjeki' na xukuje' quinbin na chquixo'l ri e are': ri in quinux na qui Dios e are' c'ut ri e are' quebux na nu tinimit.”

¹⁷ Rumal ri' xukuje' cubij ri Ajawaxel: “Chixel chquixo'l, chitasa' iwib chquij, minak jun jasach tz'il. Ri in c'ut quixinc'am na,

¹⁸ quinux c'u na i Tat, ri ix quixux na nu c'ojol xukuje' nu mia'l, cächa' ri Ajawaxel ri c'o ronojel u cuinem.”