2 Corintios 3 - Quiché Bible

Ri tijonic re ri c'ac' c'ulwächinic

¹ ¿La cäkabij lo jumul chic chiwe chi sibalaj utz ka banic? ¿La rajawaxic chi cäkaya' bic wuj chiwe rech quiwetamaj chi uj utz, je jas ri cäquiban jujun? O ¿la rajawaxic chi ri ix quiya' wuj chke?

² Ix c'u ri' ri ix ka wuj, tz'ibatal pa ri kanima'. Etamatal cumal conojel ri winak, xukuje' qui siq'uim u wäch ri wuj ri'.

³ K'alajisam chi c'ut chi ix u wuj ri Crist, jachom kumal uj, man tz'ibatal ta ruc' xak, xane' ruc' ri Uxlabaxel re ri c'aslic Dios. Man tz'ibatal ta cho tz'alam tak abaj, xane' cho tak canima' winak.

⁴ Are cu'lbal ka c'u'x wa' chrij ri Dios rumal ri Crist.

⁵ Man cäkachomaj taj chi cujcuin che u banic jun jasach xa' ka tuquiel. Xane' are ri Dios cäyo'w ka chuk'ab che u banic ri cäkabano.

⁶ Ri Dios xuya' chke chi cäkatzijoj ri c'ac' u c'ulwächinic. Man rech ta ri pixab ri tz'ibatalic, xane' rech ri Uxlabaxel. Ri tz'ibatalic cäcämisanic, are c'u ri Uxlabaxel cuya' c'aslemal.

⁷ Ri pixab tz'ibam cho tak abaj. Ruc' c'u juluwem xpetic, jeri' chi ri winak aj Israel man xecuin taj xquica'yej ri u palaj ri Moises, rumal rech chi xjuluwic. Are c'u we juluwem ri' xsach u wäch. We c'u ri pixab ri cuya' cämical xpe ruc' juluwem,

⁸ ¡sibalaj nim c'u na ri u juluwem ri c'ac' c'ulwächinic ri yo'm chke rumal ri Uxlabaxel!

⁹ We c'o u juluwem ri pixab ri cuban chke chi cäc'äjisax ka wäch, ¡sibalaj nim c'u na ri u juluwem ri u tzijoxic chque ri winak chi ri Dios cujuk'alajisaj chi uj suc'!

¹⁰ C'o u juluwem ri pixab nabe. Camic c'ut man c'o ta chic, chuwäch ri jun ri sibalaj nim na u juluwem.

¹¹ We c'o u juluwem ri jun jasach ri cäsach u wäch, sibalaj nim ba' na ri u juluwem ri jun jasach ri man q'uisel taj.

¹² Cu'l ka c'u'x chrij wa'. Rumal ri' cäkatzijoj ronojel, man cäkaxe'j ta kib.

¹³ Man je taj jas ri Moises, ri xuya' jun ch'ukubal cho ri u palaj, rech ri winak aj israelib man cäquil taj aretak cäbe u chupic ri juluwem ri cäsach u wäch.

¹⁴ Ri qui ch'obobal c'ut e abajirinak; c'ä pa ri k'ij camic jekelinak ri junam ch'ukubal aretak cäsiq'uix u wäch ri ojer c'ulwächinic. Man esam ta ri ch'ukubal chque, rumal rech chi xak xuwi ri Crist cäcuin che resaxic.

¹⁵ C'ä pa ri k'ij camic, aretak cäquisiq'uij u wäch ri u wuj ri Moises, yo'm ri jun ch'ukubal puwi' ri canima', jeri' man cäquich'ob taj.

¹⁶ Aretak cäquiya' can ri ojer c'aslemal xukuje' quecojon che ri Ajawaxel, quesax c'u na ri ch'ukubal.

¹⁷ Are' c'ut ri Ajawaxel are ri Uxlabaxel. Jawije' c'ut ri c'o wi ri Ruxlabal ri Ajawaxel chi c'o wi torotajic.

¹⁸ Ri uj c'ut konojel man ch'ukutal ta chic ri ka palaj. Cäkak'alajisaj ri u juluwem ri Ajawaxel jas jun ilbal ib. Je c'u ri' cujq'uextajic, ronojel k'ij nim na ri u juluwem c'o kuc', rech cujux na jacha' ri Crist. Are ri Uxlabaxel re ri Ajawaxel cäbanow wa'.