2 Corintios 13 - Quiché Bible

Ri Pawl quebupixbej ri kachalal xukuje' cuya' rutzil qui wäch

¹ Are urox mul wa' ri quinbe iwuc'. Rajawaxic cächomax na ronojel c'ulmatajic rumal ri qui tzij e quieb o e oxib k'alajisanelab.

² Nu bim canok quinbij chi c'u jumul je ta ne ri in c'o ta iwuc' chucamul, xukuje' quinbij chi na camic aretak man in c'o ta iwuc': Quinbij bic chque ri e macuninak can nabe xukuje' chque conojel ri niq'uiaj chic, chi we quinbe chi jumul, man c'o ta jun quintok'obisaj na u wäch,

³ cätajin c'u ya' quitzucuj jun c'utbal chi we are' ri Crist catzijon wumal. Ri Crist man tukar taj che ri cuban iwuc', xane' cucoj ri u cuinem chupam ri iwanima'.

⁴ Kastzij xrip ri are' cho jun ripibal ruc' tukaril. C'asal c'ut rumal ri u chuk'ab ri Dios. Jeri' ri uj, uj tukar ruc' are'. Cujc'asi' c'u na junam ruc' chiwe rumal ri u chuk'ab ri Dios.

⁵ Chinic'oj ri iwanima' ix, che rilic we ix co pa ri cojonic. Chic'ambejej iwib ix. ¿La ma ta iweta'm iwib ix, chi c'o ri Jesucrist pa iwanima'? We man ix c'ambejem chic man ix c'amowam taj.

⁶ Quinwaj c'ut quiwetamaj chi man uj sachinak taj.

⁷ Cäkaban ch'awem ruc' Dios, rech miban jun etzelal. Cäkaban wa' man che ta u c'utic chi ma ta uj c'ambejebem chic xane' rech ri ix are quiban ri utzilal je ta c'u ne ri quelic chi uj ta ri u tzakinak.

⁸ Man c'o ta jas cujcuin wi chuyojixic ri kastzij, xane' chuto'ic ri kastzij.

⁹ Cujquicotic aretak uj tukar, ri ix c'ut c'o i chuk'ab. Cäkaban ch'awem ruc' Dios rech quixtz'akatic.

¹⁰ Rumal ri' quebentz'ibaj bic we jastak ri' chiwe aretak man in c'o ta iwuc', rech aretak quinopan iwuc', man in c'a'n ta chic chiwe, jas ri ya'tal chwe rumal ri takanic ri u yo'm ri Ajawaxel pa nu k'ab. U yo'm chwe che u ya'ic i chuk'ab, man che ta u sachic i wäch.

¹¹ Chuq'uisbalil, wachalal: Chixquicotok. Chitz'akatisaj jas ri cäraj ri Dios pa ri i c'aslemal. Chicu'bisala' i c'u'x. Chux junam i chomanic. Chixjekel pa jamaril. Are c'u ri Dios ri re lok'ok'ebal c'uxaj, aj jamaril, cäc'oji' na iwuc'.

¹² Chiyala' rutzil tak i wäch ruc' lok'ok'ebal c'uxaj.

¹³ Conojel ri cojonelab cäquiya' rutzil i wäch.

¹⁴ Ri u tok'ob ri Ajawaxel Jesucrist, ri lok'ok'ebal u c'u'x ri Dios, xukuje' ri u wächbal ri Ruxlabal ri Dios cäc'oji' iwuc' chnimalaj iwonojel.