2 Corintios 12 - Quiché Bible

Ri Pawl cutzijoj jas ri c'utum chuwäch rumal ri Dios

¹ Rajawaxic quinnimarisaj wib, pune' man c'o ta quechbex che. Quinchaplej c'u qui tzijoxic ri c'utwächinic xukuje' ri niq'uiaj jastak chic ri e c'utum chnuwäch rumal ri Ajawaxel.

² Weta'm u wäch jun achi cojonel che ri Crist, c'o chi cajlajuj junab wa' camic, xc'am bic c'ä pa ri urox caj. Man weta'm taj we xc'am bic pa ri cuerp, we man pa ri cuerp taj. Ri Dios reta'm.

³ Man weta'm ta c'ut we xc'am bic pa ri cuerp, we man pa ri cuerp taj. Ri Dios reta'm. Weta'm c'ut chi ri achi ri'

⁴ Xc'am c'u bic ajsic c'ä pa ri je'lalaj c'olbal pa ri caj, jawije' ri xebuta' wi mayibalalaj tak tzij ri man cäbix ta rumal winak.

⁵ Quinnimarisaj u k'ij jun achi ri jewa' u banom. Man quinnimarisaj ta c'u wib in, xane' xak xuwi chquij tak ri nu tukaril.

⁶ We ta quinwaj quinnimarisaj wib, ma ta in con ri', kastzij c'u ri' ri quinbij. Man quinban ta c'ut, rech c'o jun muchomaj chi nim na nu banic chuwäch ri nu chac ri cärilo, o ri nu tzij ri cuto.

⁷ Sibalaj mayibal c'u ri jastak ri e u c'utum ri Dios chnuwäch. Rumal ri' yo'm jun c'ax chwe je ta ne jun q'uix pa ri nu cuerp, rech man sibalaj quinnimarisaj ta wib. Are takom ulok wuc' rumal ri Satanas, ri je ta ne quinuch'ayo, rech man sibalaj quinnimarisaj ta wib.

⁸ Oxmul xinbochi'j ri Ajawaxel chi cäresaj we c'ax ri' chwe.

⁹ U bim c'u chwe: “Chubana' ri nu tok'ob chawe. Are c'u ri nu cuinem cac'utun na pa ri tukaril.” Quinquicotic chi in tukar, rech wuc' in cac'utun wi ri u cuinem ri Crist.

¹⁰ Rumal ri' quinquicotic aretak man c'o ta nu chuk'ab, aretak quinyok'ic, aretak man c'o ta ri cajwataj chwe, aretak quinokataxic, xukuje' aretak quinrik c'ax rumal rech ri Crist. Aretak c'u in tukar, c'äte ri' sibalaj c'o nu chuk'ab.

Ri u bis ri Pawl chque ri cojonelab pa Corint

¹¹ In uxinak con, ix c'ut xinitakchi'j che wa'. Ix ta ri' ri utz ta nu tzijol iwumal, rumal rech chi ri in ma ta are nim na nu k'ij chquiwäch ri takomxenlab ri nimak na qui k'ij, pune' man c'o ta nu banic.

¹² Ri e retal jun takom e bantajinak chiwäch pa ronojel ch'ijonic, pa tak etal, mayibal, xukuje' cajmajibal.

¹³ Chinicuyu' we nu banom ri man utz taj chiwe, xa' c'u jun jasach ri man ix junamatajinak ta wi cuc' ri niq'uiaj comon cojonelab chic: ¡chi ri in man xinux ta jun eka'n chiwe!

¹⁴ Camic c'ut, nu suc'umam chi wib rech quinbe iwuc' churoxmul. Man quinya' ta na jun eka'n chiwij. Man are ta quebentzucuj ri jastak iwech, xane' ix quixentzucuj. Man e are ta c'u ri alc'ualaxelab cäquimulij k'inomal che ri qui tat, xane' ri tataxel cumulij k'inomal chque ri e ralc'ual.

¹⁵ Ri in ruc' ronojel ri nu rayibal quinsach na ronojel ri c'o wuc', xukuje' c'u ne ri in quinjarisaj na wib che u banic ri utzil chiwe; quinwil c'ut chi aretak sibalaj ix nu lok', xa' man sibalaj utz ta quiniwilo.

¹⁶ Pune' man xinux ta jun eka'n chiwe, e c'o c'u jujun cäquibij, chi quinna'w che ri itzel no'j, rumal ri' xixinsubu.

¹⁷ ¿La xixinsub lo rumal jun chque ri xebentak bic iwuc'?

¹⁸ Xinbochi'j ri Tit chi cäbe iwuc', xintak c'u bic ri jun kachalal chic che rachil. ¿La xixusub lo ri Tit? ¿La ma ta kastzij chi kacabichal junam i to'ic ka banom ruc' c'ut ri kas junam uxlabal?

¹⁹ Cäraj ne cätajin quichomaj chi cätajin cakatz'onoj chi cujicuyu', man je ta c'u quelic. Man je taj ri quibij, cätajin c'u cujtzijon chuwäch ri Dios uj c'u ajcristib xukuje'. Ronojel c'u wa' lok'alaj tak kachalal, rech ri ix quixq'uiy chupam ri uxlabal.

²⁰ Quinxe'j wib, we ne aretak quinopanic, man quixenrika' taj je jas ri quinwaj, xukuje' ri ix man quinirik taj je jas ri quiwaj. We ne c'o ch'o'j chixo'l, we ne quixquiäk rayinic, we ne c'o iwoyowal, qui c'ulelala' iwib, quiyac tak tzij, quixwixwitic, quinimarisaj iwib, xukuje' quituquij iwib.

²¹ Quinxe'j c'u wib xukuje' chi, pa ri wopanem iwuc' pa quieb oxib k'ij ri nu Dios cuban chwe chi quinna' q'uixbal rumal iwech, cuban c'u na chwe chi quinwok'ej i wäch ix q'ui chiwe ri kas xc'ori' qui takem ulok macunic, man qui yo'm ta c'u can ri tz'ilol, ri e macunic cuc' ixokib achijab xukuje' ri e itzel tak nak'atisabal ri quequibano.