2 Corintios 1 - Quiché Bible

Ri Pawl cuya' rutzil wächaj

¹ Ri in Pawl, in takom rech ri Jesucrist rumal ri u rayibal ri Dios. In xukuje' ri kachalal Timotey cäkatz'ibaj we wuj ri' chque ri e re ri u comon cojonelab ri Dios ri c'o pa Corint, xukuje' chque conojel ri winak ri e rech ri Dios ri e c'o pa Acay.

² Tok'ob xukuje' jamaril chc'ol ta iwuc' rumal ri Dios ka Tat, xukuje' rumal ri Ajawaxel Jesucrist.

Ri c'axc'olil ri xurik ri Pawl

³ Cäkanimarisaj u k'ij ri u Dios xukuje' ri u Tat ri Kajaw Jesucrist. Are Tataxel wa' ri cutok'obisaj ka wäch, are Dios wa' ri cucu'bisaj ka c'u'x pa ronojel.

⁴ Ri are' cucu'bisaj ka c'u'x pa conojel ri ka c'axc'olil, rech cujcuin che u cu'bisaxic qui c'u'x niq'uiaj chic ri e c'o pa ronojel u wäch c'axc'olil. Jas ri u cu'bisaxic ka c'u'x uj rumal ri Dios, je cäkaban uj che u cu'bisaxic qui c'u'x niq'uiaj chic.

⁵ Je c'ut jacha' ri qui q'uiyal ri e rikoj tak c'ax aj Crist kumal, jeri' xukuje' ri qui q'uiyiric ri e u cu'bisaxic ka c'u'x rumal ri Jesucrist.

⁶ We cäkarik c'axc'olil uj, are wa' che u cu'bisaxic i c'u'x ix xukuje' rech quixcolotajic. We c'u cäcu'bisax ka c'u'x uj, are wa' che u cu'bisaxic i c'u'x ix. Jeri' quixcuinic quik'i' ri c'axc'olil jas ri c'axc'olil ri cäkarik uj.

⁷ Sibalaj cu'l c'u ka c'u'x chiwij. Keta'm chi jas ri u rikic iwe ri c'axc'olil, jeri' xukuje' quirik iwe ri cu'bisabal c'uxaj.

⁸ Cäkaj c'ut, wachalal, chi quiwetamaj jas ri c'ax ri xkarik pa Asiy. Sibalaj nim ri c'ax xkariko, ri man c'o ta chi ka chuk'ab che u ch'ijic. Jeri' chi man c'o ta chi cu'lbal ka c'u'x chrij chi cujc'asi'c.

⁹ Xkabij c'u pa kanima' chi cujc'okox che cämical. Je c'u xkac'ulmaj wa rech man cakajiquiba' ta ka c'u'x chkij chbil kib, xane' chrij ri Dios, ri quebuc'astajisaj ri cäminakib.

¹⁰ Ri are' xujuto' chuwäch jun c'axalaj cämical, xukuje' cätajin cujuto'o. Cu'l c'u ka c'u'x chrij ri are' chi cujuto' na,

¹¹ we ri ix cujito' pa ri i ch'awem ruc' Dios, we e q'ui cäquiban ch'awem ruc' Dios pakawi', e q'ui c'ut quemaltioxinic rumal rech ri tewichibal ri yo'm chke rumal ri Dios.

Jasche man xbe ta ri Pawl pa Corint

¹² Sibalaj cujquicot rumal wa', chi cäkana' pa ri canima' chi uj tastalic tak winak che u patanixic ri Dios xukuje' man xa ta quieb kanima' pa ronojel ri ka banom cuc' conojel ri winak kas c'u are na chixo'l ix. Are ri Dios yowinak wa' chke rumal ri u tok'ob, man are ta rumal quetamabal winak.

¹³ Xak xuwi quekatz'ibaj bic ri jastak chiwe ri quixcuin che qui ch'obic aretak quisiq'uij u wäch. Cu'l c'u nu c'u'x chi kas quich'ob na ronojel,

¹⁴ je jas ri iwetamam chi jubik', chi cäquicot ri iwanima' rumal kech uj aretak cäpe ri u k'ij ri Kajaw Jesucrist, ri uj xukuje' cäquicot na ri kanima' rumal iwech.

¹⁵ Nu cuban nu c'u'x che wa', in nu chomam chi nabe quinbe che iwilic, quinban c'u ri tok'ob chiwe chi camul quixinsolij.

¹⁶ Nu chomam c'ut i solixic nabe aretak quinoc'owic pa ri nu bic pa Masedon, aretak c'u quintzelej ulok, quixinsolij chi jumul. Jeri' ri ix quixcuin ri' che nu to'ic chanim che ri nu bic pa Juda.

¹⁷ We are nu chomanic wa', ¿la xa lo man utz ta ri nu chomanic ri xinbano? O ¿la xa lo quinban ri u rayibal ri nu ti'jal, rech pa ri junam k'ijol quinbij: “je je, jayi' jayi'”?

¹⁸ Ri Dios are' k'alajisanel chi man kabin ta chiwe “je” xukuje' “jayi'” pa ri k'ijol ri'.

¹⁹ Rumal rech chi ri u C'ojol ri Dios, ri Jesucrist, ri xkatzijoj chiwe cuc' ri Silban xukuje' ri Timotey, ri tzij ri xkabij man are ta “je” xukuje' ta “jayi'”. Xane' ri tzij are “je” rumal ri Crist.

²⁰ Conojel ri jastak ri u bim ri Dios chi cuya' chke, queyataj chke rumal ri Jesucrist. Rumal ri', aretak cäkanimarisaj u k'ij ri Dios, cäkabij “je chbanok” rumal ri Jesucrist.

²¹ Ri Dios cujtiquiban che ri Crist junam iwuc', xukuje' uj u cha'om c'ut.

²² Ri are' u cojom ketal che u c'utic chi uj rech. Xukuje' u yo'm ri Uxlabaxel pa ri kanima', c'utbal wa' chi cäyataj na ri jastak chke ri u bim ri Dios.

²³ Quincoj ri Dios che k'alajisanel puwi' ri wanima', chi man in benak ta pa Corint, rumal rech chi quintok'obisaj i wäch.

²⁴ Man cujtakan ta puwi' ri i cojonic. Xane' quixkato' rech c'o i quicotemal. Co chi c'u ix tac'al pa ri i cojonic.