1 Timoteo 5 - Quiché Bible

Ri cäban cuc' ri cojonelab

¹ Co mach'abej jun nim tata', xane' chapixbej je jas ri a tat. Chebapixbej ri alabom je jas ri e awachalal.

² Chebapixbej ri nimak tak chuchuyib e jacha' ri a nan. Chebapixbej ri alitomab je jas ri e awana'b ruc' ch'ajch'ojil.

³ Chebato' ri malca'nib ri kastzij c'o qui rajawaxic.

⁴ We c'u c'o jun malca'n ri e c'o ral o u wi' tak u mam, rajawaxic chi nabe ri e are cäquetamaj nim cäquil wi ri malca'n aj uwo rachoch xukuje' chiquiya' rajil u q'uexel che ri qui nan qui tat qui mam. Are c'u wa' utz cäril wi ri Dios, are cäkaj chuwäch.

⁵ Are ri kas malca'n, ri canajinak u tuquiel, are ri' cu'l u c'u'x chrij ri Dios, cubochi'j ri Dios xukuje' cuban ch'awem ruc' Dios chi pa k'ij chi chak'ab.

⁶ Are c'u ri cutzucuj u quicotisaxic rib, cäminak wa' pune' c'aslic.

⁷ Chattakan chque ri cojonelab chi chquibana' we jastak ri', rech man c'o ta etzelal cäriktaj chquij.

⁸ Are c'ut ri man coc ta il chque ri e rech, kas c'u e are na ri e ralaxic, resam rib chupam ri cojonic, canimataj c'u na ri u mac chuwäch ri man cojonel taj.

⁹ Xuwi chitz'ibaj ri u bi' jun malca'n ri tz'akatinak chi oxc'al (60) u junab, ri uxinak xa' jun rachajil c'olinak,

¹⁰ ri quesax u tzijol chi utzalaj chac u banom, ri e u q'uiyisan ral, ri u yo'm okxanibal chque ri winak, ri u ch'ajom ri cakan ri cojonelab, ri e u to'm ri e c'o pa c'axc'olil, ri u banom ronojel u wäch utzalaj tak chac.

¹¹ Mebato' c'u ri malca'nib ri c'ä e alitomab na. Aretak c'u ri kas e qui rayibal quebutas chrij ri Crist, cäcaj quec'uli'c.

¹² Quemacun c'u ri', rumal rech chi man xca'n taj jas ri xquichi'j u banic, xquiya' c'u can ri qui cojonic.

¹³ Xukuje' cäquetamaj sak'orinic, xak quebin chi' tak ja. Man xuwi ta c'u e sak'orib, xane' xukuje' e yacal tak tzijtal, cäquinim quib pa ronojel, xukuje' cäquitzijoj jastak ri man takal ta u bixic.

¹⁴ Quinwaj ba' chi ri malca'nib ri c'ä e alitomab na chec'ulanok, chequiq'uiyisaj cal, chechacun pa ri cachoch. Jeri' man c'o ta rumal rech queyok' wi cumal ri qui c'ulel.

¹⁵ E c'o c'u jujun malca'nib ri xquitas quib, xquiterenej ri Satanas.

¹⁶ We c'o jun cojonel, ri e c'o malca'nib ixokib ruc', rajawaxic cuya' ri cajwataj chque, man cuya' ta wa' chquij ri niq'uiaj cojonelab chic, rech ri comon cojonelab quecuinic quequito' ri malca'nib ixokib ri kastzij c'o rajawaxic chque.

¹⁷ Ri tatayib ri quetakan pa ri comon cojonelab ri utz ruc'axic ri qui chac cäquibano, takal chque chi sibalaj nim quebiwil wi, puwi' ronojel ri cäquitzijoj ri u tzij ri Dios xukuje' ri quetijonic.

¹⁸ Are c'u ri Tz'ibatalic cubij: “Mach'uk ri u tza'm ri wacax ri cätajin cuban ri yak'oj.” Xukuje' cubij: “Takal che ri aj chac ri tojbal rech.”

¹⁹ Macojo we cäban tzij chrij jun chque ri tatayib ri quetakan chque ri cojonelab, we man xilitaj ri xubano cumal quieb oxib winak.

²⁰ Ri man cäquiya' ta can ri mac, chak'alajisaj ri qui mac chquiwäch conojel, rech xukuje' ri niq'uiaj chic cäquixe'j quib.

²¹ Catinbochi'j chuwäch ri Dios, chuwäch ri Ajawaxel Jesucrist xukuje' chquiwäch ri tako'n aj caj ri e cha'talic, chi chatakej we jastak ri', maban c'u jalan tak wächaj maya' c'u u k'ij jachin jun.

²² Aretak caya' ri a k'ab puwi' jun ri coc che c'amal qui be ri cojonelab, maban wa' xak ruc' aninakil. Maban awe ri mac ri cuban jun chic. Chabana' ronojel rech ch'ajch'oj ri a c'aslemal.

²³ Xak c'u ne amak'el cayitz' ri a pam, xuwi mawuq'uiaj xuwi ri joron, xane' chawuq'uiaj jubik' u wa'l uva.

²⁴ E c'o jujun ri kas k'alaj chic ri qui mac c'ä mäjok quebe pa k'atbal tzij. E c'o jujun chic ri man k'alaj ta ri qui mac chanim, xane' c'äte cäk'alajin wa'.

²⁵ Je c'u wa' ri u banic ri utzil. K'alaj wa' chanim chquiwäch conojel. Pune' ta ne man k'alaj chanim ri utzil ri cäkabano, kas copan na ri k'ij ri cäk'alajinic.