1 Timoteo 4 - Quiché Bible

Ri cäquitas quib chrij ri cojonic

¹ K'alaj cubij ri Uxlabaxel chi pa ri q'uisbal tak k'ij, e c'o jujun cäquitas na quib chrij ri cojonic, quequitatabej na ri uxlabal ri e subunelab, xukuje' ri qui tijonic ri itzel tak uxlabal.

² Quequitatabej na achijab xa quieb qui wäch ri xak e banal tak tzij. We winak ri' man cäquina' ta chic pa canima' ri etzelal ri cäquibano, je ta ne chi abajirinak chi ri canima'.

³ Ri e are quetakan chque ri winak chi man quec'uli' taj xukuje' chi jujun tak u wäch wa man cäquitij taj. Je cäquibij wa' pune' ri Dios u banom ri wa rech ri cojonelab xukuje' ri queta'm ri kastzij cäquitij que ruc' maltioxinic.

⁴ Utz c'u ronojel ri u banom ri Dios. Man c'o ta jun jasach ri utz cätijic ri ma ta ya'tal chke, we cäkac'am ruc' maltioxinic che ri Dios,

⁵ rumal rech chi cätewichitaj c'u wa' rumal ri u tzij ri Dios xukuje' rumal ri ch'awem ruc' Dios.

Jun utzalaj pataninel re ri Jesucrist

⁶ We quebatijoj we jastak ri' chque tak ri kachalal queq'uiy c'ut cumal tak ri tzij re ri cojonic xukuje' cumal tak ri e utzalaj tak tijonic ri e a takem, at jun utzalaj pataninel rech ri' Jesucrist.

⁷ Mabe awanima' cuc' tak ri puquinic ri man c'o ta qui patan ri cäquitzijoj ri winak. Are chacojo' a chuk'ab chupatanixic ri Dios.

⁸ Ri u cojic ka chuk'ab ruc' ri ka cuerp xak jubik' cujuto' wi. Are c'u ri u patanixic ri Dios cujuto' na pa ronojel. C'o utzil cäkarik rumal wa' pa we c'aslemal ri' cho ri uwächulew, xukuje' pa ri c'aslemal ri cäpe na.

⁹ Jic ri tzij xukuje' takalic chi cac'amowax cumal conojel.

¹⁰ Rumal ri' cujchacunic xukuje' cujyok'ic, rumal rech chi cu'l ka c'u'x chrij ri c'aslic Dios, ri qui Colonel conojel ri winak, sibalaj are c'u na chque ri quecojonic.

¹¹ Chattakanok xukuje' chac'utu' we jastak ri'.

¹² Maya' chque ri winak chi cäquetzelaj a wäch xa' rumal rech chi at ac'al achi na. Xane' chatux jun c'utbal pa ronojel chquiwäch ri cojonelab, rech ri e are catquilo, cäquiban que jas ri caban at. Jeri' cäquita' ri utzalaj a tzij, cäquilo chi utz catbin pa ri a c'aslemal, chi quebalok'ok'ej niq'uiaj chic, chi c'o a cojonic, chi ch'ajch'oj ri a c'aslemal, cäquiban c'u que jas ri caban at.

¹³ Are chasiq'uij ri Tz'ibatalic chquiwäch ri winak, chebapixbej xukuje' chebatijoj ri winak c'ä quinbe na awuc'.

¹⁴ Chatoc il che ri xsipax chawe rumal ri Dios. Are yo'm chawe rumal ri u tzij ri Dios ri xk'axex chawe aretak ri tatayib ri quetakan chque ri cojonelab xquiya' qui k'ab pawi'.

¹⁵ Chebawilij we jastak ri', chajacha' awib che qui banic; rech cäc'ut taj ri a q'uiyic chquiwäch conojel.

¹⁶ Chawila' awib, xukuje' chawilij ri a tijonic, maya' canok. We caban c'u wa', cacol na awib, xukuje' quebacol ri catquitatabej.