1 Timoteo 3 - Quiché Bible

Ri cojonelab ri quecoj che solinelab pa ri comon cojonelab

¹ Kastzij wa' ri quinbij: We c'o jun ri cäraj cäcoj che solinel que ri comon cojonelab, utzalaj chac ri' cäraj.

² Rajawaxic ba' chi ri solinel man c'o ta cätzujux wi, xa' jun ri rixokil, cuchomaj jas ri cubano, utz ri u chomanic, suc'umam, cuya' okxanibal chque ri winak, cäna'w che qui tijoxic ri winak,

³ man u nak'atisam ta rib che k'abaric mawi yacal ch'o'j, xane' banal utzil, aj jamaril xukuje' man benak ta ranima' che u lok'oxic puak.

⁴ Utz cubano cätakan paquiwi' ri e aj uwo rachoch, cänimax cumal ri e ralc'ual, nim quil wi cumal.

⁵ We c'u c'o jun man reta'm ta ruc'axic ri rachoch, ¿jas ta c'u lo cuban che rilixic ri u comon cojonelab ri Dios?

⁶ Rajawaxic chi man c'ac' cojonel taj, rech munimarisaj rib, makaj ne ri c'okonic puwi' jas ri xkaj puwi' ri itzel.

⁷ Xukuje' rajawaxic chi utz quil wi cumal ri winak rech man c'o ta yok'bal re, rech man cächap ta rumal ri itzel.

Ri cojonelab ri quecoj che pataninelab pa ri comon cojonelab

⁸ Jeri' xukuje' ri pataninelab, rajawaxic chi nim quebil wi, xa' quieb metzijonic, man quek'abar taj, man cäquitzucuj ta q'uixbalalaj ch'äcoj.

⁹ Rajawaxic kas jicom ri canima' chrij ri kastzij ri uj cojoninak wi, ri k'alajisam chkawäch. Xukuje' rajawaxic cäquina' pa canima' chi man c'o ta etzelal qui banom.

¹⁰ Xukuje' ri quecoj che pataninelab nabe chiwetamaj we utz cäquibano o man utz taj. C'äte ri' chebicojo che pataninelab we man c'o tzij tom chquij.

¹¹ Jeri' xukuje' ri ixokib, rajawaxic caquirik ri'jobalil, man cäquiban ta tzijtal, cäquichomaj jas cäquibano, e jic pa ronojel.

¹² Rajawaxic chi ri pataninelab chquijujunal xa' jun ri quixokil, utzalaj cuc'axic ri calc'ual xukuje' chi utz cuban che quilixic conojel ri e c'o pa rachoch.

¹³ Ri pataninelab ri utz cäquiban che ri qui chac, nim quebil wi na pa ri comon cojonelab xukuje' cäquetamaj u tzijoxic ri qui cojonic che ri Crist Jesus, man cäquixe'j ta quib.

Ri jastak re ri ka cojonic ri man etamatal ta can nabe

¹⁴ Cu'l nu c'u'x chi chanim quinbe awuc'. Quintz'ibaj c'u bic we jastak ri' chawe,

¹⁵ we ne quinbeytajic, rech cawetamaj jas caban pa ri rachoch ri Dios, are wa' ri e u comon cojonelab ri c'aslic Dios, ri rakan ja xukuje' ri to'bal re ri kastzij.

¹⁶ K'alaj chquiwäch conojel chi nim qui banic ri jastak re ri ka k'ijilanic che ri Dios: Ri Dios xc'utun chupam jun cuerp aj winak, xk'alajisaxic chi suc' rumal ri Uxlabaxel, xilitaj cumal ri tako'n aj caj, xtzijox chque tak ri tinimit, xecojon ri winak che ri e c'o cho ri uwächulew, c'ulam pa ri juluwem.