1 Timoteo 2 - Quiché Bible

Tijonic chrij ri ch'awem ruc' Dios

¹ Nabe, catinpixbej chi quiban ch'awem ruc' Dios. Quiban bochi'nic, tz'ononic xukuje' maltioxinic paquiwi' conojel ri winak.

² Chibana' ch'awem ruc' Dios paquiwi' ri ajawinelab paquiwi' conojel ri e k'atal tak tzij rech cujcuinic cujc'oji' pa utzil xukuje' pa jamaril nim kila' wi ri Dios ruc' jun c'aslemal ri kas utz quilic.

³ Are c'u utz wa' xukuje' cäkaj chuwäch ri ka Colonel Dios;

⁴ ri Dios cäraj chi quecolotaj ri winak chi nimalaj conojel, xukuje' chi cäquetamaj ri kastzij.

⁵ Xa' c'u jun Dios c'olic, xukuje' xa' jun ch'awenel paquiwi' ri winak chuwäch ri Dios, are jun achi, ri Crist Jesus.

⁶ Rumal rech chi xujach rib ri Jesucrist pa u k'ab ri cämical che u tojic ri rajil ri colobal ib chque conojel, jas ri u cholajil ri k'alajisanic ri xya' pa ri kas u k'ijol.

⁷ In cojom che tzijonel xukuje' takom. In cojom che qui tijoxic ri man aj judeyib taj che ri cojonic xukuje' che ri kastzij. Quinbij ri kastzij, man quinban ta tzij.

⁸ Quinwaj c'ut chi ri winak pa conojel c'olbal cäquiban ch'awem ruc' Dios chequiwalijisaj ri qui k'ab ruc' jun ch'ajch'ojalaj canima', man c'o ta oyowal mawi c'ulelam tak ib.

⁹ Xukuje' quinwaj chi ri ixokib utz catz'iakixic quib caquibano, ruc' jicomal, xukuje' cuc' atz'iak ri man nimak ta cajil. Chi ri ixokib macoc'owisaj u suc'umaxic ri qui wi', mequicoj wikbal ri pakal cajil jacha' ri k'an puak xukuje' ri tak perl, mawi chequicoj ta atz'iak ri sibalaj pakal cajil.

¹⁰ Xane' ruc' utzalaj tak chac, jas ri ya'tal chque ri ixokib ri cäquik'ijilaj ri Dios.

¹¹ Rajawaxic chi ri ixokib cäquita' ri tijonic ruc' nimanic pa ronojel, mech'awic.

¹² Ri in man quinya' ta che jun ixok chi quebutijoj achijab, mawi cätakan paquiwi', xane' rajawaxic xak jun quec'oji' wi.

¹³ Rumal rech chi are nabe xban ri Adan, c'äte ri' ri Eva.

¹⁴ Xukuje' ri Adan man are ta ri xsubutajic, xane' are ri ixok xsubutajic, xtzak pa mac.

¹⁵ Ri ixok cacolotaj c'u na cumal ri ralanic xukuje' we caken chupam ri cojonic, chupam ri lok'ok'enic, xukuje' chupam ri u tasic rib man cutakej ta chi c'u ri macunic, c'o c'u u tij puwi' chbil rib.