1 Tesalonicenses 5 - Quiché Bible

Ri xak c'ätetal u petic ri Ajawaxel

¹ Man rajawaxic ta c'ut, wachalal, chi c'o jas quintz'ibaj bic chiwe che jachique k'ij cäbantaj ronojel wa'.

² Ix c'ut kas iweta'm chi ri u k'ij ri Ajawaxel, je u petic jas ri eläk'om chak'ab.

³ Aretak cäquibij ri winak: “Utz uj c'olic, man c'o ta cäkac'ulmaj”, c'äte ri' cäpe na ri sachbal wächaj paquiwi' jas ri u k'oxowem ri ixok ri yawab winak. Man cato'taj ta c'ut.

⁴ Are c'u ri ix wachalal, man ix c'o ta chupam ri k'ekumalil, rech quixukajbej we k'ij ri' jacha' jun eläk'om.

⁵ Iwonojel ix ralc'ual ri sakil, jas ri jun cäbin pa k'ij. Man uj ta re ri chak'ab, man uj ta re ri k'eku'm.

⁶ Mujwar ba' jas ri e jule' chic, xane' chujc'asc'atok, chkachomaj jas cäkabano.

⁷ Are c'u ri quewaric, chak'ab quewaric. Ri quek'abaric, chak'ab quek'abaric.

⁸ Ri uj c'ut ri uj re ri sakil, chkachomaj jas cäkabano. Chkacojo' ri ka cojonic xukuje' ri lok'ok'ebal ka c'u'x jas ri ajch'o'j cucoj atz'iak re ch'ich' pa ri ch'o'j, che u to'ic ri uwo u c'u'x. Chkacu'bisaj ka c'u'x chi cujcolotaj na, chkacojo' ba' jas ri ajch'o'j cucoj to'bal u jolom.

⁹ Man u chomam ta ri Dios chke chi cäpe ri royowal chkij, xane' chi cujcolotaj rumal ri Kajaw Jesucrist.

¹⁰ Ri are' xcäm rumal kech, rech we cujc'asc'atic, we cujwaric, cujc'asi' junam ruc'.

¹¹ Rumal ri', chicu'bisala' i c'u'x, chiyala' i chuk'ab, jas ri cätajin quibano.

Ri Pawl quebupixbej ri cojonelab

¹² Wachalal, quixkabochi'j chi nimak chebiwila' wi ri quechacun tak chixo'l, ri quec'amow i be xukuje' queyo'w i no'j pa ri Ajawaxel.

¹³ Sibalaj chebilok'ok'ej, rumal rech ri qui chac. Chc'ol ta jamaril chixo'l.

¹⁴ Quixkabochi'j, kachalal, chi chiya' qui no'j ri man cäcaj taj quechacunic. Chicu'bisaj qui c'u'x ri cuban quieb qui c'u'x. Chebito' ri man c'o ta qui chuk'ab. Mäq'uistaj i c'u'x che qui to'ic conojel.

¹⁵ Chiwila' iwib chi ma ta c'o jun cutoj che jun chic etzelal che u q'uexel etzelal. Xane', are chichuk'ubej ri u banic ri utzil amak'el, jacha' ri quiban chixo'l ix je chibana' cuc' conojel.

¹⁶ Chixquicot amak'el.

¹⁷ Mitanaba' ri i ch'awem ruc' Dios.

¹⁸ Ronojel chimaltioxij che ri Dios. Are c'u wa' ri cäraj ri Dios chiwe ri ix cojoninak che ri Crist Jesus.

¹⁹ Michup ri u k'ak' ri Uxlabaxel.

²⁰ Miwetzelaj u wäch ri qui tzij ri cäquik'axej tzij chque ri winak ri yo'm chque rumal ri Dios.

²¹ Chitijtobej ronojel; chic'olo' ri utz.

²² Chitasa' iwib che apachique jasach ri man utz taj.

²³ Are ri Dios ri cäyo'w jamaril chixo'l, cuban tastalic tak winak chiwe pa ronojel, cuchajij ri iwuxlabal, ri i c'aslibal, xukuje' ri i cuerp rech mata c'u jun quetzelal che ri u petibal ri Kajaw Jesucrist.

²⁴ Ri Dios ri xixusiq'uij are jic, cubano jas ri cubij.

Ri Pawl cuya' rutzil wächaj

²⁵ Kachalal, chibana' ch'awem ruc' Dios pakawi'.

²⁶ Chiya' rutzil qui wäch conojel che u c'utic ri lok'ok'ebal c'u'x.

²⁷ Quixinbochi'j chuwäch ri Ajawaxel chi quisiq'uij u wäch we wuj ri' chquiwäch conojel ri kachalal.

²⁸ Are ta ri Kajaw Jesucrist cuban tok'ob chiwe.