1 Tesalonicenses 2 - Quiché Bible

Ri u chac ri Pawl

¹ Ri ix c'ut, wachalal, iweta'm chi man xak ta lok' xujopan iwuc'.

² Pune' ka rikom chi c'ax nabe, pune' uj yok'om chic pa Pilips, jas ri iweta'm chic, ri ka Dios xujuto' che u tzijoxic ri u tzij re colobal ib chiwe, man xkaxe'j ta kib. Je xkabano pune' xkarik c'ax rumal ri u tzijoxic.

³ Aretak xixkapixbej, man xkabij ta jastak chiwe ri man e tzij taj. Man xkabij ta tz'ilalaj tak jastak, man xixkasub taj.

⁴ Ri Dios utz cujril wi rech cujutak bic che u tzijoxic ri u tzij re colobal ib, je cujtzijon wa'. Man cäkabij taj ri cäkaj chquiwäch ri winak, xane' ri cäkaj chuwäch ri Dios, ri reta'm ri kanima'.

⁵ Mawi jumul xkabij tzij chiwe xak rech utz quito, jas ri iweta'm. Mawi c'o jas xkabij chiwe xak rech cäkach'äc puak chiwij. Ri Dios xujrilo xukuje' reta'm.

⁶ Man xkatzucuj taj chi cänimarisax ka k'ij cumal ri winak, mawi iwumal ix, mawi cumal ri niq'uiaj chic,

⁷ pune' takal chke chi c'o ka takanic piwi' rumal rech chi uj takom re ri Crist. Xane' uj utz iwuc', jas jun chuchu' quebulok'ok'ej ri ral, quebuchajij.

⁸ Ri uj c'ut quixkalok'ok'ej. Xkaj chkawäch ri u ya'ic chiwe man xuwi ta ri tzij re colobal ib ri u yo'm Dios, xane' xukuje' ri kanima'. Rumal rech chi sibalaj ix lok' chkawäch.

⁹ Kachalal, cänataj chiwe ri c'axalaj ka chac. Xujcos ruc' ri ka chac. Xujchacun chi chak'ab chi pa k'ij, rech man cäkaya' ta jun eka'n chrij jachin jun chiwe, xkatzijoj ri utzalaj tak u tzij ri Dios chiwe.

¹⁰ Ix xiwilo, xukuje' ri Dios xrilo, chi uj tastalic tak winak chixo'l ix cojonelab. Xkaban ri suc', man c'o ta etzelal xriktaj chkij.

¹¹ Jas ri iweta'm chic, xixkapixbej chijujunal xukuje' xkacu'bisaj i c'u'x, jas cuban jun tata' chque ri ralc'ual.

¹² Xixkabochi'j chi quixbinic jas ri takal che jun ri terenel ri Dios. Are' ri Dios xixsiq'uinic rech ix jun pa ri rajawibal xukuje' pa ri u juluwem.

¹³ Rumal ri' xukuje' ri uj man cäkatanaba' ta ri ka maltioxinic che ri Dios, rumal chi aretak xic'am ri u tzij ri Dios ri xkatzijoj chiwe, man xic'am taj jas ri u tzij winak. Xane' xic'amo jas ri kastzij, are ri u tzij ri Dios, ri xukuje' cächacun pa ri i c'aslemal ri quixcojonic.

¹⁴ Ri ix c'ut, kachalal, xiban iwe jas ri xquiban ri e u comon cojonelab ri Dios ri e c'o pa Judey, ri e re ri Crist Jesus. Xukuje' ri ix xa' junam xirik c'ax cumal ri e i winakil, jas ri e are' xquirik c'ax cumal ri aj judeyib.

¹⁵ Are ri aj judeyib ri xecämisan ri Ajaw Jesus, ri xecämisan ri k'axal tak u tzij ri Dios. Are c'u ri uj xukuje' xujquesaj ulok. Man cäquiban ta ri cäkaj chuwäch ri Dios, cäquiban qui c'ulel chque conojel ri winak.

¹⁶ Cujquik'atij che qui tzijobexic ri man aj judeyib taj rech quecolotajic. Je cäquiban ri aj judeyib rech cäquitz'akatisaj ri qui mac. Chuq'uisbalil c'ut xpe ri royowal ri Dios paquiwi'.

Ri Pawl cäraj quebusolij ri aj tesaloniquib

¹⁷ Kachalal, c'o chi quieb oxib k'ij xujel ulok pa ri i tinimit. Pune' c'u man kilom ta i wäch, ix c'o pa kanima', sibalaj cäkaj cäkil i wäch.

¹⁸ Rumal ri' xkatzucuj jas xkabano rech cujopan iwuc' che i solixic. In wa', ri Pawl, q'ui mul xintzucuj jas quinbano rech cujopan iwuc'. Are c'u ri Satanas xujuk'atij.

¹⁹ ¿Jas chrij cu'l wi ka c'u'x? ¿Jas ri ka quicotemal? ¿Jas ri tojbal ke rumal ri chac ri ka banom? Ix ri' aretak cäpe ri Kajaw Jesus.

²⁰ Ix c'ut ri ka juluwem xukuje' ri ka quicotemal.