1 Pedro 5 - Quiché Bible

Ri Lu' quebupixbej ri cojonelab

¹ Quebenpixbej ri tatayib ri e c'o chixo'l ri quetakan chque ri comon cojonelab. In c'u cach tata', in xinwil ri c'ax ri xurik ri Crist, xukuje' junam cuc' ri e are' quinc'am na we ri juluwem ri quilitaj na.

² Chebiyuk'uj ri jumulaj chij re ri Dios ri c'o chixo'l. Chichajij man xa' ta rumal rech chi quixch'ij che u banic, xane' chichajij ruc' ronojel iwanima' jas ri cubij ri Dios. Mitzucuj q'uixbalalaj ch'äcoj, xane' chichajij ri jumulaj chij ruc' jun utzalaj iwanima'.

³ Miban chque je ta ne c'o i takanic paquiwi', xane' chixux jun c'utbal chquiwäch ri chij, rech ri e are' cäquiban que jas ri quiban ix.

⁴ Aretak cäpe na ri Qui Nimal ri ajyuk'ab, quic'am na ri corona ri man q'uisel taj, are wa' ri juluwem.

⁵ Xukuje' ri ix ri c'ä ix ac'alab k'apoj, c'ojolab, chiya' iwib pa takic chque ri quetakan pa ri comon cojonelab. Iwonojel chipatanila' iwib, minimarisaj iwib. Rumal rech chi cubij: “Ri Dios quebuc'ulelaj ri winak ri nimak cäquina' quib, cuban c'u tok'ob chque ri e mach'amoj.”

⁶ Chimach'a' ba' iwib chuxe' ri u k'ab ri Dios ri sibalaj c'o u cuinem, rech ri are' cunimarisaj i k'ij aretak cäpe ri k'ij.

⁷ Ronojel ri quixoc wi il, chiya' pa u k'ab ri Dios. Ri are' c'ut quixuchajij.

⁸ Chichomaj jas ri quibano, chixc'asc'atok. Ri i c'ulel, ri itzel, cusutij iwij je jas jun coj curak u chi' cutzucuj jachin cubik'o.

⁹ Chik'atij ba' u wäch ri itzel, co chixtac'al pa ri cojonic. Iweta'm c'ut chi xa' junam ri c'axc'olil quepe paquiwi' ri iwachalal pa ronojel ri uwächulew.

¹⁰ Are c'u ri Dios cuban na tz'akat chiwe, quixucowirisaj na, cuya' na i chuk'ab, xukuje' quixutac'aba' na. Are ri' ri Dios ri cäbanow ronojel u wäch tok'ob xukuje' ri xixsiq'uin che ri junalic u juluwem pa ri Crist.

¹¹ Che ri are' chyok wi ri cuinem chbe k'ij sak. Je chbanok.

Ri Lu' cuya' rutzil qui wäch ri cojonelab

¹² Nu tz'ibam xa' jubik' chiwe rumal ri Silban, are jicalaj kachalal pa ri nu chomanic in. Nu tz'ibam chiwe che i pixbexic, che u k'alajisaxic chi are wa' ri kas u tok'ob ri Dios. Co chixtac'al pa ri u tok'ob.

¹³ Ri e re ri comon cojonelab pa Babilon cäquiya' rutzil i wäch. Ri e are' e cha'om xa' junam iwuc'. Xukuje' ri Marcux ri nu c'ojol cuya' rutzil i wäch.

¹⁴ Chiyala' rutzil i wäch, che u c'utic chi quilok'ok'ela' iwib iwachalal c'u iwib. Chc'ol ta jamaril chixo'l, iwonojel ri ix re ri Crist.