1 Pedro 2 - Quiché Bible

Ri tastalic c'aslemal

¹ Je c'u ri, chiwesaj ronojel etzelal xukuje' ronojel subunic. Miban chi iwe jas cäquiban ri quieb qui wäch. Itzel miwil wi aretak jun chic curik utzil. Miyac chi tzij chquij niq'uiaj winak chic.

² Jas jun alaj ne' sibalaj cäraj u tu', je xukuje' ri ix sibalaj chitzucuj ri utz che ri iwanima', je ta ne leche ri man c'o ta jas yujam ruc'. Chibana' wa' rech quixq'uiy pa ri i colotajic,

³ we iwetamam chic chi utz ri Ajawaxel.

Ri Crist are' abaj c'aslic

⁴ Chixk'ax ba' ruc' ri Ajawaxel, are' je ta ne jun c'aslic abaj. Are' ri abaj ri xutum can cumal ri winak, cha'om c'u rumal ri Dios, pakal rajil.

⁵ Xukuje' ri ix, je ta ne ix c'aslic tak abaj. Ix yacom che jun ja aj uxlabal. Ix quixux tastalic tak cojol tabal tok'ob che qui ya'ic tabal tok'ob aj uxlabal cho ri Dios, ri quekaj chuwäch ri Dios rumal ri Jesucrist.

⁶ Rumal ri' xukuje' c'o pa ri Tz'ibatalic: “Chiwilampe', quincoj pa Sion ri abaj ri cächapow ri yacom, cha'om, pakal rajil; apachin c'u ri cäcojon che, man quesax ta na u q'uixbal.”

⁷ Chiwe ix ri quixcojonic: pakal rajil. Chque c'u ri man quecojon taj: “Ri abaj ri xquixutuj ri yacanelab, are wa' ri abaj ri xux nim u k'ij, ri cächapow ri yacom;”

⁸ xukuje' tz'ibatalic: “Are abaj cäquichak'ij quib ri winak chrij, are nimalaj abaj quetzak ri winak chrij.” Quetzak rumal ri tzij, rumal rech chi man cäquinimaj taj; che c'u wa' xecoj wi.

Ri e rech ri Dios

⁹ Ri ix c'ut ix winak ix cha'om, ix ajawinelab xukuje' ix cojol tabal tok'ob, ix winak tastalicalaj tinimit, ix rech ri Dios, rech quiya' u tzijoxic ronojel u wäch utzalaj tak jastak ri cuban ri Dios, ri xixusiq'uij ulok pa ri k'eku'm, xixuya' pa ri u sakil ri sibalaj mayibal.

¹⁰ Ri ix man ix ta tinimit canok pa ri ojer tak k'ij. Are c'u ri camic ix u tinimit ri Dios. Ojer man c'o ta jun xel u c'u'x chiwe. Camic c'ut i rikom chic elebal c'u'x.

Ix c'asal che u patanixic ri Dios

¹¹ Lok'alaj tak wachalal, chixux je jas winak ri xak queboc'owic, ri e c'o pa jun tinimit man quech taj. Miban ri u rayibal ri i ti'jal, ri cäch'ojin chrij ri iwanima'.

¹² Ronojel utz chibana' chquixo'l ri man cojonelab taj. Jeri', pune' cäquiyac tzij chiwij je jas chquij banal tak etzelal, cäquil ri utzalaj tak chac ri quibano, cäquinimarisaj c'u u k'ij ri Dios pa ri k'ij aretak chuta' chke jas ri ka banom.

¹³ Chiya' iwib pa takic che ronojel ri qui takanic ri winak ri e c'o piwi', rumal rech ri Ajawaxel. We che ri ajawinel, chinimaj je jas ri sibalaj nim u k'ij,

¹⁴ we chque ri k'atal tak tzij, chebinimaj je jas ri e takom rumal ri Ajawaxel che u tojic q'uexel chque ri banal tak etzelal xukuje' che u nimarisaxic qui k'ij ri e banal tak utzil.

¹⁵ Are c'u wa' ri u rayibal ri Dios, chi rumal ri u banic utzil quitz'apij u pa qui chi' ri winak ri man utz ta qui chomanic, man c'o ta queta'm.

¹⁶ Ri Dios cäraj chi ix je jas winak e tzokopim bic. Man utz ta c'ut we quiban etzelal xa' rumal rech chi ix tzokopim bic, xane' chibana' je jas e pataninelab re ri Dios.

¹⁷ Nim chebiwila wi conojel. Chebilok'ok'ej ri kachalal. Chixe'j iwib chuwäch ri Dios. Nim chiwila' wi ri ajawinel.

Chich'ija' ri c'ax jas ri xuban ri Crist

¹⁸ Ix pataninelab, chiya' iwib pa takic chque ri iwajaw, nim chebiwila wi. Man xak xuwi ta chque ri e utz xukuje' ri e ch'uch'uj, xane' xukuje' chque ri e c'a'n.

¹⁹ Are utz wa', we jun cuch'ij bis aretak curik c'ax ri man takal ta che, xa rumal rech chi xuban jun jasach ri utz cuna' pa ri ranima' chuwäch ri Dios.

²⁰ ¿La utz c'u lo quixilic we quixch'ayic rumal rech chi c'o mac i banom, quich'ij c'ut? Are c'u we rumal ri u banic utzil quirik c'ax, we quich'ijo, are kas utz quilitaj wa' chuwäch ri Dios.

²¹ Che c'u wa' ix siq'uim wi rumal ri Crist xurik c'ax rumal iwech. Xuya' can c'utbal chiwe, rech quitakej ri retal rakan.

²² Ri Crist man c'o ta mac xubano, mawi ne xriktaj subunic pa u chi'.

²³ Aretak xyok'ic, man xuya' ta rajil u q'uexel. Aretak xurik c'ax, man xubij ta chque ri winak chi cuban na c'ax chque. Xane' xujach ronojel pa u k'ab ri Dios, ri cuk'at tzij ruc' suq'uil.

²⁴ Ri Crist xebuc'am bic ri ka mac chrij ri u cuerp cho ri ripibal, rech aretak uj cäminak chic chquiwäch ri mac, cujc'asi' na, cäkaban na ri suc'. Rumal ri u socotajic ri are', ri ix xixcunatajic.

²⁵ Ix junam c'u can cuc' ri chij ri qui jalon qui be. Camic c'ut ix tzelejinak ulok ruc' ri Crist, ri are' ri ajyuk' xukuje' ri chajinel re ri iwanima'.