1 Juan 5 - Quiché Bible

Ri ka ch'äcanic puwi' ri jastak re ri uwächulew

¹ Ronojel jachin ri cacojonic chi ri Jesus are' ri Crist, ralc'ual ri Dios wa'. Apachin ri culok'ok'ej jun tataxel, xukuje' quebulok'ok'ej ri e ralc'ual we tataxel ri'.

² Aretak cäkalok'ok'ej ri Dios cakaban c'ut ri catakan wi, keta'm xukuje' chi quekalok'ok'ej ri e ralc'ual ri Dios.

³ Ri u lok'ok'exic ri Dios are ri qui nimaxic ri cäquibij ri e u takomal. Ri e u takomal man e al taj.

⁴ Apachin ta ne ri alc'ualam rumal ri Dios cäch'äcan puwi' ri uwächulew; are c'u ri cäyo'w ri ch'äcanem chke puwi' ri uwächulew are' ri ka cojonic.

⁵ Ri cucojo chi ri Jesus are' u C'ojol ri Dios, cäch'äcan puwi' ri uwächulew.

Ri u k'alajisaxic ri u C'ojol ri Dios

⁶ Are' wa' ri xpe ruc' ja' xukuje' ruc' quic', are' wa' ri Jesucrist. Man xuwi ta ruc' ja', xane xukuje' ruc' ri ja' xukuje' ruc' ri quic'. Are c'u ri Uxlabaxel cäk'alajisan wa'. Ri Uxlabaxel c'ut are ri kastzij.

⁷ E oxib ri k'alajisanelab cho ri uwächulew:

⁸ ri Uxlabaxel, ri ja' xukuje' ri quic'; e are' c'ut ri oxib junamatajinak qui wäch.

⁹ Cakac'amowaj ri qui k'alajisanic ri winak, are c'u nim na u k'ij ri u k'alajisanic ri Dios. Are u k'alajisanic ri Dios wa', chi xuk'alajisaj jachin ri u C'ojol.

¹⁰ Apachin ri cäcojon che ri u C'ojol ri Dios, ruc'am we k'alajisanic ri' pa ri ranima'. Apachin ri man cäcojon taj, u banom chi ri Dios are banal tzij, rumal rech chi man cojoninak ta che ri u tzij ri Dios aretak xuk'alajisaj ri u C'ojol.

¹¹ Are wa' ri k'alajisanic: chi ri Dios u yo'm junalic ka c'aslemal; are c'ut we c'aslemal ri' rumal ri u C'ojol.

¹² Apachin ri c'o ri C'ojolaxel ruc', c'o xukuje' we c'aslemal ri' ruc'; apachin c'ut ri man c'o ta ri u C'ojol ri Dios ruc', man c'o ta we c'aslemal ri' ruc'.

Ri Xuan quebupixbej ri cojonelab

¹³ We jastak ri' e nu tz'ibam chiwe, rech quiwetamaj chi c'o junalic i c'aslemal, ri ix ix cojoninak che ri u bi' ri u C'ojol ri Dios.

¹⁴ Are wa' ka cu'bisam wi ka c'u'x chrij ri Dios, chi we c'o ri cäkatz'onoj jas ri u beya'l ri u rayinic, cujutatabej.

¹⁵ We c'u keta'm chi cujuto aretak cäkata' apachique jasach che, keta'm chi cuya' na jas ri xkata' che.

¹⁶ We c'o jun ri cäril ri rachalal chi cuban jun mac ri man re ta cämical, chubana' ch'awem puwi', cäya' c'u na u c'aslemal ri jun ri cuban jun mac man re ta cämical. C'o mac re cämical. Man quinbij ta c'ut chi cäban ch'awem ruc' Dios puwi' wa'.

¹⁷ Ronojel ri man suc' taj, are mac wa'. C'o c'u mac ri man re ta cämical.

¹⁸ Keta'm chi apachin ta ne ri e alc'ualam rumal ri Dios man quebin ta pa ri mac. Are ri u C'ojol ri Dios quechajinic, man quenak ta c'u rumal ri itzel.

¹⁹ Keta'm chi ri uj, uj rech ri Dios. Ronojel c'u ri uwächulew c'o pa u k'ab ri itzel.

²⁰ Keta'm xukuje' chi ri u C'ojol ri Dios petinak, u yo'm c'ut ketamanic rech caketamaj u wäch ri kas Dios. Ka nuc'um c'u kib ruc' ri kas Dios, ri u bixic wa' che ri Jesucrist ri u C'ojol. Are wa' ri kas Dios xukuje' ri junalic c'aslemal.

²¹ Lok'alaj tak walc'ual, mebiwokaj ri e diosib.