1 Juan 3 - Quiché Bible

Ri e ralc'ual ri Dios

¹ Chiwila' chi sibalaj nim ri ka lok'ok'exic rumal ri Dios ri Tataxel, chi cäbix chke chi uj ralc'ual ri Dios, uj ralc'ual c'ut. Rumal ri' ri winak re ri uwächulew man cäquich'ob ta ka wäch, rumal rech chi man xquich'ob ta u wäch ri Dios.

² Lok'alaj tak wachalal, camic uj ralc'ual chic ri Dios. C'ä maja' c'u cäc'utunic jas ri cujux na. Keta'm c'ut chi aretak cäc'utun ri Jesucrist, cujux na junam ruc' ri are', rumal rech chi cäkil c'u na ri kas are'.

³ Apachin ta c'u ne ri c'o we eyebal c'uxaj ri' ruc' chrij ri Dios, cuch'ajch'obisaj rib pa re wi, je jacha' ri Jesucrist ch'ajch'oj.

⁴ Conojel ri cäquiban mac, e are' ri' man cäquinimaj ta ri pixab. Ri mac are ri man u nimaxic ta ri pixab.

⁵ Ix iweta'm chic chi ri Jesucrist xpe cho ri uwächulew che quesaxic tak ri macaj, xukuje' chi ri are' man c'o ta jun u mac.

⁶ Je c'u ri' chi ronojel ri nuc'utal ruc' ri are', man camacun taj; apachin ta c'u ne ri camacunic, man rilom taj mawi u ch'obom u wäch.

⁷ Lok'alaj tak walc'ual, c'o mixsubuwic. Apachin ri cuban ri suq'uil, suc' ri', je jas ri are' suc'.

⁸ Apachin ri cuban mac, rech ri itzel ri'. Ri itzel macuninak ulok kas pa ri u tiquiritajic. Rumal c'u ri' xpe ri u C'ojol ri Dios, che qui sachic qui wäch ri e u chac ri itzel.

⁹ Man c'o ta jun ri uxinak ralc'ual ri Dios cutakej u banic macunic, c'o c'ut u c'aslemal ri u yo'm ri Dios; man ya'tal ta c'u che chi camacunic, ralc'ual c'ut ri Dios.

¹⁰ Cuya' quetamatajic e jachin tak ri e ralc'ual ri Dios xukuje' e jachin tak ri e ralc'ual ri itzel: apachin ta c'u ne ri man cuban ta ri utzil, o man culok'ok'ej ta ri rachalal, man ralc'ual ta ri Dios.

Chekalok'ok'ela' kib

¹¹ Are tijonic wa' ri i tom ulok kas pa ri tiquiritajic chi chekalok'ok'ela' kib.

¹² Mäkaban ke jas xuban ri Cain, ri xuya' rib pa u k'ab ri itzel, xucämisaj ri u chak'. ¿Jas c'u che xucämisaj? Rumal rech chi ri Cain xuban etzelal, are c'u ri u chak' xuban ri suc'.

¹³ Mixmayinic, wachalal, we quetzelax i wäch cumal ri winak re ri uwächulew.

¹⁴ Uj keta'm chi uj elinak chic pa ri cämical, uj c'o chic pa ri c'aslemal, ketamam c'ut rumal rech chi quekalok'ok'ej ri kachalal. Apachin c'u ri man culok'ok'ej ta ri rachalal, cäminak na ri'.

¹⁵ Apachin ta ne ri cäretzelaj u wäch ri rachalal, cämisanel ri'. Iweta'm c'ut chi ronojel cämisanel man cäcuin taj cäc'oji' junalic u c'aslemal.

¹⁶ Chupam wa' cäkach'ob wi u wäch ri lok'ok'ebal c'uxaj, chi ri Crist xuya' ri u c'aslemal rumal kech' ri uj xukuje' chkaya' ta ba' ri ka c'aslemal rumal quech ri kachalal.

¹⁷ Apachin c'u ri c'o jastak rech, we cärilo chi ri rachalal c'o u rajawaxic, man quil ta c'u u c'u'x che, ¿jas ta ri cubano cac'oji' ri u lok'ok'ebal u c'u'x ri Dios pa ri ranima'?

¹⁸ Lok'alaj tak walc'ual, ri ka lok'ok'ebal c'uxaj muxic xak xuwi ta e tzij, xane' c'utunok cumal tak banoj.

Cuya' cujopan chuwäch ri Dios man cäkaxe'j ta kib

¹⁹ Jeri' cäkach'obo chi uj rech ri kastzij xukuje' cäkajiquiba' ri kanima' chuwäch ri Dios.

²⁰ We c'u ri kanima' c'o jas cujutzujuj wi, are c'u c'o na ri Dios chuwäch ri kanima', reta'm c'u ronojel.

²¹ Lok'alaj tak wachalal, we ri kanima' man c'o ta jas cujutzujuj wi, c'o u cu'lbal ka c'u'x ri' chuwäch ri Dios;

²² ronojel ri cakatz'onoj che, cuya' chke, rumal rech chi e ka nimam ri e u takomal cäkaban c'ut ri cäkaj chuwäch.

²³ Ri u takomal, chi chujcojon che ri Jesucrist, ri u C'ojol, cäkalok'ok'ela' c'u kib, jacha' ri are' uj u lok'ok'em.

²⁴ Ri quequinimaj ri e qui banic ri e u takomal e jekel pa ri Dios, are c'u ri Dios jekel pa ri e are'. Rumal c'u wa' caketamaj chi ri Dios jekel pa ri uj: rumal ri Uxlabaxel ri u yo'm chke.