1 Juan 2 - Quiché Bible

Ri Crist are' ch'awenel pakawi' chuwäch ri Dios

¹ Lok'alaj tak walc'ual, quebentz'ibaj bic we jastak ri' chiwe rech man quixmacun taj. We c'u c'o jun camacunic, c'o jun ch'awenel pakawi' chuwäch ri Tataxel. Are' ri Jesucrist, suc' c'ut ri are'.

² Ri Jesucrist xuchi'j rib che tabal tok'ob rech quecuy taj ri e ka mac; man xuwi ta c'ut ri e kech uj xane' xukuje' ri e quech conojel ri e c'o cho ri uwächulew.

³ We cäkanimaj ri e u takomal ri Dios, kas jic ri' chke chi ketamam u wäch.

⁴ We c'u ne c'o jun cubij: “In weta'm u wäch ri Dios”, man c'u quebunimajtaj ri e u takomal, are' jun banal tzij; man c'o ta c'ut ri kastzij ruc' ri are'.

⁵ Are' c'ut ri cuya' ri u xiquin che ri u tzij, uxinak kas lok'ok'el rech ri' chwinakil, je c'u wa' ri ka banom rech caketamaj chi uj nuc'ul ruc'.

⁶ Ri winak ri cubij chi nuc'ul ruc' ri Dios, rajawaxic caruc'aj jun c'aslemal ri cajunamataj ruc' ri u c'aslemal ri Jesucrist.

Ri c'ac' takomal

⁷ Lok'alaj tak wachalal, we takomal ri' ri quintz'ibaj bic chiwe man c'ac' taj: are wa' ri xic'am ix kas pa ri tictajic. We ojer takomal ri' are tzijol wa' ri i tom chic.

⁸ Are', c'u wa, ri quintz'ibaj bic chiwe are jun c'ac' takomal. Ri kastzij pa ri Crist xukuje' pa ri i c'aslemal ix, rumal rech chi oc'owem cuban ri k'eku'm, cäjuluw chi ri kas sakil.

⁹ Apachin ri cubij chi c'o pa ri sakil, we c'u ne cäretzelaj u wäch ri rachalal, c'ä c'o ri' pa ri k'eku'm.

¹⁰ Apachin ri culok'ok'ej ri rachalal, are ri' jekel pa ri sakil, man c'o ta jun jasach ri cätzakow pa mac.

¹¹ Apachin c'u ri cäretzelaj u wäch ri rachalal, are ri' c'o pa ri k'eku'm, pa ri k'eku'm cäbin wi, man reta'm taj jawije' ri cäbe wi. Are c'u ri k'eku'm banowinak che chi man cäca'y taj.

¹² Quintz'ibam chiwe ix lok'alaj tak walc'ual, rumal rech chi e cuyum ri e i mac, rumal ri u ya'ic u k'ij ri u bi'.

¹³ Quintz'ibam chiwe, tataxelab, rumal rech chi iweta'm u wäch ri Jun ri kas c'o wi pa ri u tiquiritajic ronojel. Quintz'ibam chiwe, alabom, rumal rech chi ix ch'äcaninak chi puwi' ri itzel.

¹⁴ In tz'ibaninak bic chiwe, lok'alaj tak walc'ual, rumal rech chi iwetamam c'ut u wäch ri Tataxel. In tz'ibaninak bic chiwe, tataxelab, iwetamam chi c'u u wäch ri c'o wi ulok kas pa ri tictajic. In tz'ibaninak bic chiwe xukuje' c'ojolab, rumal rech chi ix co, i c'amowam c'ut ri u Tzij ri Dios pa ri iwanima', i ch'äcom c'ut ri itzel.

¹⁵ Milok'ok'ej ri uwächulew, mawi ri jastak ri e c'o cho ri uwächulew. Apachin ri culok'ok'ej ri uwächulew, man culok'ok'ej ta ri' ri Tataxel.

¹⁶ Ronojel ri c'o cho ri uwächulew, ri itzel u rayibal ri ka ti'jal, ri itzel u rayibal ri ka bak'wäch, ri jastak ri man c'o ta qui patan ri nim quekil wi pa ri ka c'aslemal, ronojel wa' man ruc' ta ri Tataxel quel wi ulok, xane' cho ri uwächulew.

¹⁷ Ri uwächulew coc'owic, xukuje' ri rayibal ri cuya' ri uwächulew coc'owic. Apachin c'u ri cuban ri u rayibal ri Dios, are ri' cäc'asi' amak'el chbe k'ij sak.

Ri kastzij xukuje' ri banoj tzij

¹⁸ Lok'alaj tak walc'ual, are wa' ri q'uisbal tak k'ij. Jas ri i tom chi cäpe na jun ri cuban u c'ulel che ri Crist, camic c'ut e c'o chi q'ui ri cäquiban qui c'ulel che ri Crist. Rumal c'u ri' cäkach'obo chi are chi wa' ri q'uisbal tak k'ij.

¹⁹ Kuc' xebel wi bic, man c'u e jun taj kuc'. We ta e jun kuc', xec'oji' ta ri' kuc'. Xebel c'u bic, jeri' k'alaj chi man conojel taj e jun kuc'.

²⁰ Ri Crist u yo'm ri Ruxlabal ri Dios chiwe, iwonojel c'ut ix c'o iwetamanic.

²¹ Quintz'ibaj chiwe, man rumal ta rech chi ma ta iweta'm ri kastzij, xane rumal rech chi iweta'm. Iweta'm c'ut chi ronojel banoj tzij man rech ta ri kastzij.

²² ¿Jachin ri banal tzij? Are ri' ri cubij chi ri Jesus man are ta ri Crist. Are ri' ri cabanow u c'ulel che ri Crist, ri man cuya' taj u k'ij ri Tataxel xukuje' ri C'ojolaxel.

²³ Apachin ri man cuya' ta u k'ij ri c'ojolaxel, man c'o ta ri' ri Tataxel ruc' apachin ta c'u ne cuya' u k'ij C'ojolaxel, c'o ri' ri Tataxel ruc'.

²⁴ Rumal ri', ri ix chic'olo' chupam ri iwanima' ri tijonic ri xitatabej kas pa ri tiquiritajic; we c'u ri xitatabej kas pa ri ticaritajic canajinak chupam ri iwanima', xukuje' ri ix kas ix nuc'utal ri' ruc' ri C'ojolaxel xukuje' ruc' ri Tataxel.

²⁵ Are c'u wa' ri kas u chi'm ri Jesucrist chke: ri junalic c'aslemal.

²⁶ Nu tz'ibam wa' chiwe chquij ri winak ri quixquisubu.

²⁷ Are c'u ri ix c'o ri Ruxlabal ri Dios iwuc' ri u yo'm ri Jesucrist chiwe. Man rajawaxic taj chi c'o jachin quixtijonic. Ri Uxlabaxel ri jekel iwuc' cuc'ut conojel ri jastak chiwäch. E are tak c'ut ri e u tijonic e kastzij, man c'u e banoj ta tzij. Chixcanaj nuc'talic ruc' ri Crist, je jacha' ri tijonic ri u yo'm ri Uxlabaxel chiwe.

²⁸ Are c'u ri camic lok'alaj tak wa'lc'ual, chixcanaj nuc'talic ruc' ri Crist rech cäcu'bi ka c'u'x aretak cuc'utunisaj rib ma ta c'u cakana' q'uixbal chuwäch ri are' aretak cäpetic.

²⁹ We quich'obo chi suc' ri are', chiwetamaj ba' xukuje' chi conojel ri cäquiban suq'uil, e are ri' e ralc'ual ri Dios.