1 Juan 1 - Quiché Bible

Ri tzij re c'aslemal

¹ Cäkatz'ibaj bic chiwe ri kas c'olinak ulok pa ri tiquiritajic, ri ka tom, xukuje' ri kilom cuc' ri kas e ka bak'wäch. Kilom c'ut xukuje' xekachap cuc' tak ri e ka k'ab. Are wa' ri Tzij rech c'aslemal.

² We c'aslemal ri' xuc'utunisaj rib, xkil c'ut ri uj, xkilo ka k'alajisam c'ut; cakaya' c'ut u bixic chiwe ix we junalic c'aslemal ri' ri c'olinak ulok ruc' ri Tataxel c'utunisam c'u chkawäch.

³ Cäkaya' c'ut u bixic chiwe ri kilom xukuje' ri ka tom, rech xukuje' ri ix quixjunamataj kuc', jacha' ri uj uj junamatajinak ruc' ri Dios ri Tataxel, xukuje' ruc' ri u C'ojol ri are' ri Jesucrist.

⁴ Quekatz'ibaj bic we jastak ri' rech cätz'akat ri ka quicotemal.

Ri Dios are' sakilal

⁵ Are tzijol wa' ri xujutijoj wi ri Jesucrist rech cakaya' c'u u bixic chiwe: chi ri Dios sakilal chi man c'o ta jun k'ekumalil ruc' ri are'.

⁶ We cäkabij chi uj junamatajinak ruc' ri are', cujbin c'u ne pa ri k'ekumalil, cujbanow tzij, man cätajin ta cakaban ri' ri kastzij.

⁷ We c'u cujbin chupam ri sakilal jacha' ri Dios c'o pa ri sakilal, c'o c'u ri' ri junamatajic chkaxo'l, are' c'ut ri u quiq'uel ri u C'ojol, ri are' ri Jesucrist, queresaj na conojel ri ka mac.

⁸ We cäkabij chi man c'o ta ka mac, xa cätajin cäkasub kib ri', man c'o ta ri' ri kastzij kuc'.

⁹ We c'u quekak'alajisaj ri e ka mac, cuya' cakacuba' ka c'u'x chi ri Dios cuban na jachique ri suq'uilal: quebucuy c'u na tak ri e ka mac, queresaj c'u na conojel ri ketzelal.

¹⁰ We cäkabij chi man uj macuninak taj, ka banom chi banal tzij ri' ri Dios, man kas ta ka c'amowam ri' ri u tzij.