1 Corintios 9 - Quiché Bible

Ri ya'tal che jun takom

¹ Kastzij in ya'tal chwe ri ya'tal che jun takom, wilom c'ut u wäch ri Jesus ri Kajaw, kas ix c'ut ri ix u wächinic ri nu chac pa ri u chac ri Ajawaxel.

² We man in takom chque niq'uiaj chic, are c'u ri ix iweta'm chi in takom, ix ri' ix c'utbal chi in u takom ri Ajawaxel.

³ Are wa' quinbij che u to'ic wib chquiwäch ri cäquiban tzij chwij:

⁴ ¿La ma ta ya'tal chke chi cujwa'ic, chi cujuq'uianic?

⁵ Takal chwe xukuje' chi quinc'am bic jun ixokilaxel wuc' ri cojonel rech quinrachilaj bic, je jacha' ri caquiban ri niq'uiaj chi takomxenlab, ri e rachalal ri Ajawaxel xukuje' ri Lu'.

⁶ O ¿la xak xuwi ri in wachil ri Bernabe cujchacun na cuc' ri ka k'ab che u ch'äquic ri cajwataj chke?

⁷ ¿La c'o ta lo jun ajch'o'j ri ma ta cätojic? ¿La c'o ta lo jun cutic uva, ri ma ta cutij re ri u wächinic? ¿La c'o lo jun ri quebuyuk'uj ri q'uisic', ri ma ta cutij re ri leche ri cäquiya'o?

⁸ Man quinbij ta wa' chi xa ta ne qui chomanic winak, xane' xukuje' je cubij ri u pixab ri Moises.

⁹ Tz'ibatal c'u pa ri pixab: “Mach'uk u tza'm ri wacax aretak cuban yak'oj.” ¿La cubij wa' rumal chi coc il ri Dios chque ri wacax?

¹⁰ O ¿la rumal kech uj cubij wi? Rumal kech uj xtz'ibax canok. Keta'm chi ri jun ri cätajinic, cu'l u c'u'x ri' chrij ri u wächinic ri ulew, xukuje' ri cuban yak'oj, cu'l u c'u'x ri' chi cuc'am na re ri cäyak'ic.

¹¹ We uj ka ticom jastak aj uxlabal pa ri iwanima', ¿la nim lo ri' we cäkac'am ke ri jastak re ri cuerp iwuc'?

¹² We jule' winak chic ya'tal chque chi cäquic'am que ri jastak iwe, e ta c'u lo ri uj, ¿la ma ta ya'tal chke? Pune' ya'tal chke, man ka cojom ta chuk'ab chiwe, xane' ka coch'om ronojel, rech man cäkak'atij ta u wäch ri utzalaj tak u tzij ri Crist.

¹³ ¿La ma ta iweta'm chi ri quechacun pa ri tastalicalaj tak jastak re ri rachoch Dios, cäquitij que ri jastak re ri rachoch Dios? ¿La ma ta iweta'm chi ri quepatanin chuwäch ri porobal, cäquitij que ri ti'j re ri awaj ri cäya' puwi' ri porobal?

¹⁴ Jewa' xukuje' xtakan wi ri Ajawaxel chi ri cäquitzijoj ri utzalaj tak tzij, rajawaxic cäquitzuk quib rumal ri u tzijoxic ri utzalaj tak tzij.

¹⁵ Are c'u ri in mawi c'o wechben che wa'. Mawi ta ne quintz'ibaj ta ba' wa' chiwe camic che u tz'onoxic chiwe chi c'o chiya' chwe. ¡Chwe in are utz na chi quincämic chi, je quinban wa'! Man c'o ta jun quesan chwe chi nu rikom ri u banic nimal wumal cumal we jastak ri'.

¹⁶ Man quinnimarisaj ta wib rumal ri u tzijoxic ri utzalaj tak tzij. Rajawaxic c'ut chi quintzijoj. ¡Tok'ob nu wäch we man quintzijoj ri utzalaj tak tzij!

¹⁷ We ruc' ri nu rayinic, quintzijoj ri colobal ib, c'o na ri tojbal wech. We c'u man quintzijoj ri colobal ib ruc' ri kas nu rayibal, xa ba in takchi'm ri' che u banic.

¹⁸ Je c'u ri', ¿jachique ri tojbal wech? Ri tojbal wech are wa' chi chintzijoj ri tzij re colobal ib, xak chi jeri' man c'o ta quintok'ij, man quintz'onoj ta c'ut ri takal chwe aretak quintzijoj ri tzij re colobal ib.

¹⁹ Pune' man c'o jun winak cätakan panuwi', xinya' c'u wib che qui patanixic conojel ri winak, rech quebench'äc q'ui winak che ri Crist.

²⁰ Chquixo'l ri aj judeyib quinc'ut wib chi in aj judey, rech quebench'äc che ri Crist. Chquixo'l ri e c'o chuxe' ri u pixab ri Moises, xinbano chi in c'o chuxe' ri pixab, rech quebench'äc ri e c'o chuxe' ri pixab, pune' man in c'o ta chuxe' ri pixab.

²¹ Che qui ch'äquic ri man e c'o ta chuxe' ri u pixab ri Moises, quinjunamaj wib ruc' jun chque, in c'o c'u ne chuxe' ri u pixab ri Dios, in c'o c'u chuxe' ri u pixab ri Crist.

²² Chquixo'l ri man c'o ta qui chuk'ab, xinbano chi man c'o ta nu chuk'ab, rech quebench'äc ri man c'o ta qui chuk'ab. Ronojel nu banom chquixo'l conojel ri winak, rech jeri' quecolotaj jujun chque.

²³ Ronojel wa' quinbano rumal rech ri tzij re colobal ib, rech quinrik ri utzil ri cuya' ri utzalaj tak tzij.

²⁴ ¿La ma ta iweta'm chi ri cäquic'am canim, conojel ri' cäquic'am canim, xa c'u jun chque cärikow ri tojbal? Je c'u ri' ri ix chicojo' i chuk'ab rech quirik na ri tojbal.

²⁵ Ri caquisuc'umaj quib che u tijic qui chuk'ab che ch'äcanic pa jun nak'atisanic, caquik'il quib che ronojel ri cuban c'ax chque. Ri e are' caquiban wa' xa che u ch'äquic jun tojbal ri xa' cäsach u wäch. Are c'u ri uj cakaban wa' che u ch'äquic jun tojbal ri man cäsach ta u wäch chbe k'ij sak.

²⁶ Ri in jewa' quinbano: man quinc'am ta wanim ri je ta ne ma ta quinwilo jawije' quinbe wi. Ri in jewa' quinch'ojinic, man quinch'ojin taj je ta ne quinch'ay ri quiakik'.

²⁷ Xane' quinban c'ax che ri nu cuerp, quintakan puwi'. Jewa' quinbano rech man quinriktaj taj chi ma ta utz nu banom, nu bim c'u chque niq'uiaj chic chi utz chquibana'.