1 Corintios 7 - Quiché Bible

Ri Pawl quebupixbej ri cojonelab chrij ri c'ulanem

¹ Chrij ri i tz'ibam ulok wuc': Utz ta na ri' we jun achi man cäc'uli' taj.

² Xa' c'u ne, u mac rech ri quibanic macunic cuc' ixokib achijab, chquijujunal c'ut ri achijab rajawaxic cac'oji' ri kas ri quixokil, chquijujunal c'ut ri ixokib rajawaxic cac'oji' ri kas cachajil.

³ Ri achi chutz'akatisaj ri utz u banic che ri rixokil. Xukuje' ri ixok chutz'akatisaj ri utz u banic che ri rachajil.

⁴ Mawi ri ixokilaxel xuwi ta ri are' are' ta ajchak'e ri kas u cuerp, c'o c'u rech ri rachajil che. Mawi ri achajilaxel xuwi ta ri are' are ta ajchak'e ri kas u cuerp, c'o c'u rech ri rixokil che.

⁵ Miya' can ri u rikic iwib we man i chomam ix quieb. We ne quichomaj quiya' na can joropa' k'ij ri u rikic iwib rech quiban ch'awem ruc' Dios. Chirika' chi c'u iwib, rech man quixutakchi'j ta ri Satanas che mac, we man quixcuinic quik'il iwib.

⁶ Are wa' quinbij chiwe xa' che u ya'ic jun i no'j, man are ta c'u jun takomal.

⁷ Quinwaj ta ne chi conojel quec'oji' jas ri in. Chquijujunal c'ut yo'm jalajoj tak cuinem chque rumal ri Dios, jun wi ri jun, ri jun chic jun chi wi.

⁸ Quinbij chque ri man e c'ulan taj, xukuje' chque ri malca'nib, chi utz we quecanaj canok jas ri in.

⁹ We c'u man quecuinic cäquik'il quib, chec'ulanok. Utz na we quec'uli'c chuwäch ri cäquiq'uis quib che rayinic.

¹⁰ Quintakan chque ri e c'ulanic, chi ri ixok cojonel mujach can ri rachajil. We takanic ri' man xa ta wech in, xane' rech ri Ajawaxel.

¹¹ We c'u ri ixok cuya' can ri rachajil, chcanaj can chi jeri', mäc'uli' chic, o chutzir chi jumul ruc' ri rachajil. Xukuje' ri achi mujach can ri rixokil.

¹² Quinbij in chque ri niq'uiaj chic, man are ta c'u ri Ajawaxel cäbinic: We c'o jun kachalal ri c'o rixokil ri man cojonel taj, we cäraj ri rixokil cäc'oji' ruc', mujach bic.

¹³ We jun ixok c'o rachajil ri man cojonel taj, we cäraj ri rachajil cäc'oji' ruc', mujach bic.

¹⁴ Ri achajilaxel ri man cojonel taj, cux tastalic winak rumal ri rixokil. Ri ixokilaxel ri man cojonel taj, cux tastalic winak rumal ri rachajil. We ta ma ta jeri', e tz'il ta ri' ri iwalc'ual. Man e tz'il ta c'ut, xane' e tastalic.

¹⁵ We ri ixokilaxel o ri achajilaxel, ri man e cojonelab taj, cäquicoj qui chuk'ab che u jachanic quib, chquibana'. We je cäban wa', ri achalaxel ri achi o ri achalaxel ixok cätzokopitajic, ix siq'uim c'ut ri ix rech quixjeki' pa jamaril.

¹⁶ ¿Jas aweta'm, ixok, we ne cacol na ri awachajil; o jas aweta'm, achi, we ne cacol na ri awixokil?

¹⁷ Chijujunal ba' chibana' jas ri u yo'm ri Ajawaxel chiwe, jas ri i banic aretak xixsiq'uix rumal ri Dios. Are je nu takanic wa' pa tak conojel ri comon cojonelab.

¹⁸ We c'o jun kopin ri u wi' ri u tz'umal ri achi wi che retal aretak xsiq'uixic, märetzelaj u wäch ri retal ri cojom. We jun chic man cojom ta retal re kopixic aretak xsiq'uixic, mucoj retal.

¹⁹ We jun achi kopim ri u wi' ri u tz'umal ri achi wi, o man kopim taj, man c'o ta u banic wa'. Xane' ri u nimaxic ri u takanic ri Dios, are ri' c'o u banic.

²⁰ Chijujunal jas ri i banic aretak xixsiq'uixic, je chixcanajok.

²¹ ¿La at lok'om pataninel aretak xatsiq'uixic? matoc il che wa'; we c'u cuya' cattzokopitajic, are wa' chatzucuj.

²² We c'o jun, lok'om pataninel aretak xsiq'uix rumal ri Ajawaxel, jun tzokopital wa' rech ri Ajawaxel. We c'o c'u jun, ri tzokopitalic aretak xsiq'uixic, lok'om pataninel chi wa' re ri Crist.

²³ Pakal c'u lok'obem iwe. Mixux c'u qui lok'om tak pataninelab ri winak.

²⁴ Wachalal, chijujunal jas ri i banic aretak xixsiq'uixic, jewa' chixcanaj wi chuwäch ri Dios.

²⁵ Chquij ri k'apojib, man c'o ta u takanic ri Ajawaxel wuc'. Xuwi quinya' pixbenic chque jas jun jicalaj winak, rumal rech chi xel u c'u'x ri Ajawaxel chwe.

²⁶ Quinchomaj chi utz we ri achi cäcanaj canok jas ri c'olic rumal rech ri c'ax ri quekil pa tak we k'ij ri'.

²⁷ We c'o awixokil, matzucuj u jachic bic. We c'u man c'o ta awixokil, matzucuj awixokil.

²⁸ We c'u catc'uli'c, man mac ta ri'. We c'u ri ali cäc'uli'c, xukuje' man mac taj. Are c'u ri quec'uli'c cäquirik na c'ax pa ri qui c'aslemal. Quinwaj c'ut chi ma ta quirik c'ax.

²⁹ Are c'u wa' quinbij, wachalal, chi ri k'ij xak k'atatal chic; ri c'o c'u chkawäch camic. Rumal c'u ri', ri c'o quixokil, chquibana' chi je ta ne ri man c'o ta quixokil.

³⁰ Ri quebok'ic, chquibana' chi je ta ne ri man quebok' taj. Ri quequicotic, chquibana' chi je ta ne ri man quequicot taj. Ri cäquilok' jun jasach, chquibana' chi je ta ne ri man quech taj.

³¹ Ri que cojow ri re we uwächulew ri', chquibana' jacha' ri ma ta quecojowic; rumal rech chi xak cäsach u wäch we uwächulew ri' ri quilitajic.

³² Quinwaj c'ut chi ma ta c'o jas quixoc wi il. Ri achi ri man c'ulan taj, querilij ri jastak re ri Ajawaxel, jas ri cäkaj chuwäch ri Ajawaxel.

³³ Are' c'u ri achi ri c'ulanic, querilij ri jastak re ri uwächulew, are cäraj cubano jas ri cäkaj chuwäch ri rixokil.

³⁴ Xukuje' man junam ta ri ixok ri c'ulanic ruc' ri ali ri man c'ulan taj. Ri man c'ulan taj, are querilij ri jastak re ri Ajawaxel, rech cux tastalic winak pa ri u cuerp xukuje' pa ri ranima'. Ri ixok ri c'ulanic, are querilij ri jastak re ri uwächulew, are cäraj cubano jas ri cäkaj chuwäch ri rachajil.

³⁵ Quinbij c'u wa' chiwe rech c'o quiwechbej che, man che ta u ya'ic latz' chiwe, rech are quiban ri utz quilitajic, rech man c'o ta jun jasach chic quiwilij, xane' xak xuwi quipatanij ri Ajawaxel.

³⁶ We c'o jun cuchomaj chi cac'uli' ruc' ri u yo'm chi u tzij che, rumal rech chi c'o chic u junab che ri c'ulanem, we c'u cuchomaj chi are wa' ri utz na, chubana' ri cuchomaj are takalic; c'ulanok, man macunic taj.

³⁷ We c'u c'o jun ri cuna' rib chi man c'o ta catakchinic, ri ya'tal che jachique ri craj cubano cuch'äc c'u ri ranima' cubij chi man cac'uli' taj, utz ri cubano.

³⁸ Je c'u ri' we cac'uli' ruc' ri u yo'm chi u tzij che, utz ri cubano; we c'u ne man cac'uli'c, sibalaj utz na ri cubano.

³⁹ Ri ixok ri c'ulanic rajawaxic cäc'oji' ruc' ri rachajil joropa' junab ri cäc'asi ri achi. We c'u cäcäm ri rachajil, cuya' ri' cäc'uli' ruc' jachin ri cäraj wi, xak xuwi we cojonel che ri Ajawaxel.

⁴⁰ Quinchomaj chi are cäquicot na ri ixok malca'n we cäcanaj can chi jeri'. Quinchomaj c'ut chi c'o ri Uxlabal re ri Dios wuc', aretak je quinbij wa'.