1 Corintios 6 - Quiché Bible

Ri qui ch'o'j ri cojonelab chquiwäch ri k'atal tak tzij

¹ We c'o jun chiwe, c'o u ch'o'j ruc' jun chic, ¿la cucoch' lo cäbe chquiwäch ri man e cojonelab taj che u ta'ic k'atbal tzij? ¿La ma ta are utz cäbe chquiwäch ri winak re ri u tinimit ri Dios che u ta'ic k'atbal tzij?

² O ¿la ma ta iweta'm chi ri winak aj Dios cäquik'at na tzij paquiwi' ri winak re ri uwächulew? We cäk'at na tzij paquiwi' ri winak re ri uwächulew iwumal, ¿la ma ta quixcuin che u k'atic tzij paquiwi' ri jastak ri man nimak ta qui banic?

³ ¿La ma ta iweta'm chi cäkak'at na tzij paquiwi' ri tako'n aj chicaj? ¡E ta c'u lo ri jastak re we c'aslemal ri'!

⁴ We c'o i ch'o'j chquij ri jastak re we c'aslemal ri', ¿jasche quita' k'atbal tzij chque ri winak ri man e jun ta chquixo'l ri cojonelab?

⁵ Quinbij wa' rech quixq'uixic. ¿La ma ta c'o jun ri c'o u no'j chixo'l, ri cäcuin che u k'atic tzij chquixo'l ri kachalal?

⁶ ¡Man xuwi ta quech'ojin jujun achalaxelab cuc' jujun chic xane' caquic'am bic ri qui ch'o'j chquiwäch ri e man cojonelab taj!

⁷ Are jun tzakmajic wa' chiwe we quic'am bic ri i ch'o'j chquiwäch ri k'atal tak tzij. ¿La ma ta utz na quich'ij ri c'ax ri cäban chiwe? ¿La ma ta utz na quicuyu' pune' ta queläk'ax ri jastak iwe?

⁸ Ri ix c'ut man utz ta ri quibano, rumal rech chi ix iwachalal iwib quiban c'ax xukuje' quiban eläk' chbil tak iwib.

⁹ ¿La ma ta iweta'm chi ri winak man e suc' taj man cäquechbej ta ri rajawibal ri Dios? Mixsubutajic. Ri quebanow macunic cuc' ixokib achijab, mawi ri quequik'ijilaj tak diosib, mawi ri quekaj pa mac cuc' niq'uiaj chic, mawi ri achijab ri cäquiban quib chi e ixokib, mawi ri achijab ri cäquiban ixok che jun cach achi,

¹⁰ mawi ri eläk'omab, mawi ri cäquirayij ri jastak que niq'uiaj winak chic, mawi ri quek'abaric, mawi ri queyok'onic, mawi ri cäquimaj jastak que niq'uiaj winak chic, conojel wa' man cäquechbej ta ri rajawibal ri Dios.

¹¹ E c'o c'u jujun chiwe e je tak wa' nabe canok. Camic c'ut ix ch'ajtajinak chic, banom chi tastalic tak winak chiwe, ix k'alajisam chic chi ix suc' chuwäch ri Dios pa ri u bi' ri Ajawaxel Jesucrist, rumal ri Uxlabal re ri ka Dios.

Ri u tastaliquil ri cuerp

¹² Ronojel ya'tal chwe quinbano, man ronojel ta c'ut c'o quechbex che. Ronojel ya'tal chwe quinbano, man c'o ta c'u jun jasach quinya' ta wib pa u k'ab.

¹³ Ri ka wa, che ri ka pam; ri ka pam, che ri ka wa. We quieb jasach ri' cäsach na qui wäch rumal ri Dios. Man ya'tal ta c'u chque ri winak chi cäquicoj ri qui cuerp che u banic macunic cuc' ixokib achijab. Ri ka cuerp c'o u patan che ri Ajawaxel, ri Ajawaxel c'o u patan che ri ka cuerp.

¹⁴ Ri Dios ri xc'astajisan ri Ajawaxel, xukuje' are cujc'astajisan na uj ruc' ri u cuinem.

¹⁵ ¿La ma ta iweta'm ix chi ri i cuerp u tz'akatil ri u cuerp ri Crist? ¿La quinc'am ta c'ut in we ri u tz'akatil we cuerp ri' ri rech ri Crist quinban ta c'u u tz'akatil ri u cuerp ri jun ixok quech nim ch'utin? Man je ta ri'.

¹⁶ O ¿la ma ta iweta'm chi apachin ri cätuni' ruc' jun ixok quech nim ch'utin, xa e jun cuerp chic? Cubij ri Tz'ibatalic: “Ri e quieb xa e jun cuerp chic.”

¹⁷ Apachin c'u ri cätuni' ruc' ri Ajawaxel, xa e jun chic ruc' pa ri ranima'.

¹⁸ Chixanimaj chuwäch ri quibanic macunic cuc' ixokib achijab. Apachique chi jun mac ri camacun wi ri winak, man cunak ta ri u cuerp; apachin c'ut ri cumacuj cuc' ixokib achijab, cunak ri kas u cuerp che macaj.

¹⁹ ¿La ma ta iweta'm chi ri i cuerp are rachoch ri Ruxlabal ri Dios ri c'o pa ri iwanima', ri yo'm chiwe rumal ri Dios? Ri ix man iwech ta iwib.

²⁰ Pakal c'u lok'obem iwech. Chinimarisaj ba' u k'ij ri Dios ruc' ri i cuerp.