1 Corintios 5 - Quiché Bible

Cäk'at tzij puwi' jun ri cuban macunic cuc' achijab ixokib chquixo'l ri comon ajcristib

¹ Kastzij xtatajic chi c'o jun chiwe cuban macunic cuc' ixokib, c'o c'u ri rixokil ri u tat ruc'. Ri mac ri' mawi ne cäquiban ri man aj judeyib taj.

² Ri ix c'ut i nimarisam iwib. Ri are ta ne quixbisonic, iwesam ta c'u ne chixo'l ri xbanow we etzelal ri' chixo'l.

³ Are c'u ri in, pune' man in c'o iwuc' pa ri cuerp, in c'o c'u iwuc' pa ri wuxlabal. Je ta ne ri in c'o iwuc' nu k'atom chi tzij puwi' ri jun ri je u banom wa'.

⁴ Chimulij ba' iwib pa ri u bi' ri Ajawaxel Jesus, ri in quinc'oji' na iwuc' pa ri wuxlabal, xukuje' ri u cuinem ri Kajaw Jesus cäc'oji' na iwuc'.

⁵ Chijacha ba' ri achi ri' pa u k'ab ri Satanas rech cäsach u wäch ri u cuerp, cäcolotaj c'u na ri ruxlabal pa ri u k'ij ri Ajawaxel Jesus.

⁶ Man utz ta ri u nimarisaxic iwib. ¿La ma ta iweta'm chi ri jubik' ch'am cuch'amarisaj ronojel ri k'or?

⁷ Chiwesaj ba' ri ojer ch'am, rech quixux c'ac' k'or, ri man c'o ta ch'am ruc', je jas ri i banic. Ri ka chij re ri oc'owem are ri Crist, ri xcäm che tabal tok'ob cho ri Dios rumal kech.

⁸ Je c'u ri', chkabana' ri nimak'ij re ri oc'owem, man ruc' ta ri ojer ch'am, mawi ruc' ri ch'am re etzelal, re u banic itzel tak jastak. Xane' chkabana' ruc' caxlanwa ri man c'o ta ch'am ruc'. Man ruc' ta quieb kanima', xane' ruc' kastzij.

⁹ Xintz'ibaj bic chiwe pa ri wuj chi rajawaxic quitas iwib chquij ri quemacun cuc' ixokib achijab.

¹⁰ Man quinbij ta c'ut chi quitas iwib chquij ri winak aj uwächulew ri quemacun cuc' ixokib achijab, o ri cäquirayij ri jastak que niq'uiaj winak chic, o ri eläk'omab, o ri quequik'ijilaj tak diosib. We ta jeri', rajawaxic ta ri' quixel bic cho ri uwächulew.

¹¹ Ri nu tz'ibam bic chiwe, chi rajawaxic quitas iwib chrij ri jun ri ruc'am ri bi'aj aj achalal, we c'u cuban macunic cuc' ixokib achijab, o we curayij ri jastak que niq'uiaj winak chic, o we quebuk'ijilaj tak diosib, o we cäyok'onic, o we cäk'abaric, o we eläk'om. Ri je u banic wa', mixwa' ne ruc'.

¹² ¿La quink'at lo tzij in paquiwi' ri man e cojonelab taj? ¿La ma ta rajawaxic are quik'at tzij paquiwi' ri e cojonelab chic?

¹³ Are c'u ri winak ri man e cojonelab taj, are ri Dios ri' cäk'atow na tzij paquiwi'. Chiwesaj ba' ri ajmac ri' chixo'l.