1 Corintios 3 - Quiché Bible

Uj rajchaquib ri Dios

¹ In, wachalal, man xincuintaj xixintzijobej jacha' winak ri c'amom qui be rumal ri Uxlabaxel, xane' e jacha' apachique winak, e jacha' ac'alab pa ri jastak re ri Crist.

² Nabe canok xa' leche xinya' chiwe pa tijic, man wa taj, rumal rech chi c'ä maja' quixcuin che u tijic, ¡mawi ne quixcuin camic,

³ rumal rech chi c'ä are quiban na ri u rayibal ri winak re mac! Itzel quiwil wi we jun chic curik utzil, quiyac ch'o'j, ¿la ma ta are quiban ri u rayibal ri winak re mac? ¿La ma ta c'ä quiban iwe ri cäquiban ri niq'uiaj winak chic?

⁴ Aretak cäquibij jujun chixo'l: “In in rech ri Pawl”, jun chic c'ut cubij: “In in rech ri Apols”, ¿la ma ta c'ä are quiban ri u rayibal ri winak?

⁵ ¿Jachin c'u ri Pawl? ¿Jachin ri Apols? E pataninelab wa' ri cumal xixcojonic, jas ri xuya' ri Ajawaxel chiwe chijujunal.

⁶ Ri in xinticonijic, ri Apols xja'nic. Are c'u ri Dios xq'uiyisanic.

⁷ Jeri', mawi ri cäticonijic c'o u banic, mawi ri cäja'nic, xane' ri Dios ri cäq'uiyisanic, are ri' nim u banic.

⁸ Ri cäticonijic ruc' ri cäja'nic xa e junam. Chquijujunal c'ut cäquic'am na ri tojbal que, jas ri chac ri qui banom.

⁹ Ri uj c'ut uj rach tak rajchaquib ri Dios. Ri ix, ix u tajin ri Dios, ix ri ja ri cuyac ri Dios.

¹⁰ Jas ri u tok'ob ri Dios ri yo'm chwe, ri in xincoj ri tac'alibal, jas jun qui nimal banal tak ja ri kas reta'm. Jun chi c'u wi ri cäyacow puwi' ri tac'alibal. Chijujunal ba' kas chiwila' jas quiban che ri u yaquic.

¹¹ Man c'o ta jun cäcuin che u cojic jun tac'alibal chic chuwäch ri cojom, are' ri Jesucrist.

¹² We c'o jachin cayacan puwi' we tac'alibal ri', cucoj k'an puak, sak puak, abaj pakal cajil, che', q'uim, we patz'an,

¹³ ri qui chac chquijujunal cäk'alajisax na. Copan na ri k'ij aretak cäk'alajisaxic. Ri qui chac chquijujunal cäk'alajin na rumal ri k'ak' jas ri u banic.

¹⁴ We cäcanaj can ri u chac ri jun ri xyacan puwi' ri tac'alibal, cuc'am na tojbal rech.

¹⁵ We c'u ri u chac jun cächajiric, ronojel ri' cutzak na. Ri are' c'ut cäcolotaj na, je ta ne ri jun ri coc'ow pa jun k'ak'.

¹⁶ ¿La ma ta iweta'm chi ix rachoch ri Dios, chi jekel ri Ruxlabal ri Dios pa ri iwanima'?

¹⁷ We c'o jun cusach u wäch ri rachoch Dios, ri Dios cusach na u wäch ri are'. Tastalic c'ut ri rachoch Dios, ix c'u ri'.

¹⁸ C'o jun musub rib. We c'o jun chixo'l ri cuchomaj chi c'o u no'j chquixo'l ri winak cho ri uwächulew camic, chubana' rib chi con, rech cäc'oji' u no'j.

¹⁹ Ri qui no'j c'ut ri winak cho ri uwächulew xa' conil chuwäch ri Dios. Tz'ibatal c'ut: “Ri winak ri sibalaj quena'w che ri qui chomanic, ri Dios cuban chque chi quetzak rumal ri qui no'j.”

²⁰ Xukuje' cubij: “Ri Ajawaxel reta'm ri qui chomanic ri c'o qui no'j, chi man c'o ta u patan.”

²¹ Rumal c'u ri', c'o jun munimarisaj rib rumal rech ri u ternexic jun winak. Conojel c'u ri jastak e iwech.

²² We are ri Pawl, we ri Apols, we ri Seps, we ri uwächulew, we ri c'aslemal, we ri cämical, we ri k'ij camic, o re ri k'ij ri cäpe na, ronojel iwech.

²³ Are c'u ri ix, ix rech ri Crist, are c'u ri Crist rech ri Dios.