1 Corintios 12 - Quiché Bible

Ri sipanic tak e aj uxlabal

¹ Wachalal, quinwaj chi c'o quiwetamaj chquij ri sipanic aj uxlabal.

² Iweta'm chi aretak c'ä majok chixcojonok i sachom i be, xixc'am bic chquij ri memalaj tak diosib.

³ Rumal ri' quinya' retamaxic chiwe, chi man c'o ta jun cuc'okoj ri Jesus ruc' ri u tzij we cätzijon rumal ri Ruxlabal ri Dios. Xukuje' man c'o ta jun cäcuin che u bixic Ajawaxel che ri Jesus, xane' xak xuwi rumal ri Ruxlabal ri Dios.

⁴ Q'ui qui wäch tak u sipanic ri Uxlabaxel chke. Xa c'u jun ri Uxlabaxel ri cäyowic.

⁵ Q'ui qui wäch ri pataninic ri quebanic. Xa c'u jun Ajawaxel cäkapatanij.

⁶ Q'ui qui wäch tak ri chac. Xa c'u jun Dios cächacun pa ka c'aslemal konojel.

⁷ Ri Dios u yo'm chke chkajujunal ri u k'alajisaxic ri Uxlabaxel pa ri ka c'aslemal, rech c'o quechbexic.

⁸ Jun yo'm che, tzij re no'j rumal ri Uxlabaxel. Ri jun chic yo'm che, tzij re etamabal. Xa c'u jun ri Uxlabaxel ri cayowic.

⁹ Jun yo'm cojonic che, ri jun chic yo'm ri u banic cunanic che. Xa' c'u jun ri Uxlabaxel ri cäyowic.

¹⁰ Jun yo'm che ri u banic tak mayibal. Ri jun chic yo'm che ri u k'axexic u tzij ri Dios. Jujun chic cuya' ri Dios chque ri retamaxic u wäch ri uxlabal ri e subunelab xukuje' ri kas Ruxlabal ri Dios. Jujun chic cäya' chque chi quech'aw pa tak ch'abal. Cäya' chi c'u na chque jujun chic ri u k'alajisaxic ri bim pa tak we ch'abal ri'.

¹¹ Xa c'u jun ri Uxlabaxel c'olic, ri cäbanow conojel we jastak ri'. Cujach chke chkajujunal jas ri cäraj ri are'.

Konojel uj xa' jun cuerp

¹² Je jas ri cuerp, pune' e q'ui ri u tz'akatil xa c'u jun cuerp. Jeri' xukuje' ri Crist.

¹³ Xak c'u junam chke konojel, chi aj judeyib chi man aj judeyib taj, lok'om pataninelab o e torotalic, xujjunatajic rech cujux xa' jun cuerp rumal xa' jun Uxlabal; chke c'ut konojel xya' wi ruq'uiaxic ke che we kas Uxlabal ri'.

¹⁴ Xukuje' ri cuerp man xa' ta jun ri u tz'akatil, xane' e q'ui.

¹⁵ We ta c'u cubij ri akanaj: “Man in ta rech ri cuerp, rumal rech chi man in ta k'abaj”, man rumal ta ri' ma ta u tz'akatil ri cuerp.

¹⁶ We ta cubij ri xiquinaj: “Man in ta rech ri cuerp, rumal rech chi man in ta bak'wächaj”, ma ta u tz'akatil ri cuerp.

¹⁷ We ta ronojel ri cuerp bak'wächaj, ¿jawije' ta c'o wi ri' ri ka tanibal? We ta ronojel xiquinaj, ¿jawije' ta c'o wi ri' ri ka sikbal?

¹⁸ Ri Dios c'ut e u cojom chquijujunal ri u tz'akatil ri ka cuerp, jas ri xraj ri are'.

¹⁹ We ta conojel xa' jun tz'akatil, ¿jawije' ta c'o wi ri cuerp?

²⁰ Pune' e q'ui ri u tz'akatil, xa' c'u jun ri cuerp.

²¹ Ri bak'wächaj man cuya' taj cubij che ri k'abaj: “Man at rajawaxic ta chwe.” Xukuje' ri jolomaj man cuya' taj cubij chque ri akanaj: “Man ix rajawaxic ta chwe.”

²² Xane' ri tz'akatil ri cäkachomaj chi man c'o ta qui chuk'ab, are ne sibalaj e rajawaxic che ri cuerp.

²³ Ri e u tz'akatil ri cuerp ri cäkachomaj chi sibalaj man nim ta queilic, e are wa' ri sibalaj nim quekilo; ri e ka tz'akatil ri man kas ta utz queilic, c'o na ri qui wikic cäbanic.

²⁴ Ri man rajawaxic ta u banic chque ri tz'akatil ri nimak na qui banic. Ri Dios je u cholajixic wa' ri cuerp xubano chi ri e tz'akatil ri man kas ta e nimak qui banic caya' na qui k'ij.

²⁵ Jeri' man cäquetzelaj ta quib ri u tz'akatil ri cuerp, xane' junam cäquilila' quib.

²⁶ We jun u tz'akatil ri cuerp curik c'ax, conojel ri' junam cäquirik c'ax ruc'. We c'u jun chque cänimarisax u k'ij, conojel ri' junam quequicot ruc'.

²⁷ Ri ix c'ut ix u cuerp ri Crist, chijujunal ix u tz'akatil ri u cuerp.

²⁸ Ri xebucoj ri Dios pa ri comon cojonelab e are wa': nabe xebucoj ri takomxenlab, chucab xebucoj ri e k'axal tak tzij, churox xebucoj ri quetijonic, c'äte ri' ri quequiban tak mayibal, ri quecunanic, ri cäquiban tok'ob, ri cäquic'am qui be niq'uiaj chic xukuje' ri quetzijon pa tak ch'abal.

²⁹ Man conojel taj e takomxenlab, mawi conojel e k'axal tak tzij. Man conojel taj quetijonic; mawi conojel e banal tak mayibal.

³⁰ Man conojel taj yo'm chque quecunanic, mawi conojel quecuinic quetzijon pa tak ch'abal, mawi conojel quecuinic cäquik'axej pa ka ch'abal ri cäbix pa tak ch'abal.

³¹ Are c'u sibalaj chebitzucuj ri nimak tak u sipanic ri Dios. Quinc'ut c'u na jun be chiwäch ri sibalaj utz na chquiwäch conojel wa'.