1 Corintios 10 - Quiché Bible

Pixbenic rech man quek'ijilax ta ri diosib

¹ Wachalal, quinwaj quiwetamaj chi conojel ri e ka mam xec'oji' chuxe' ri sutz', xukuje' conojel xeboc'ow pa ri Quiäk' Plo.

² Conojel xejunataj ruc' ri Moises aretak xejunataj chuxe' ri sutz' xukuje' pa ri plo.

³ Conojel xa jun u wäch wa xquitijo, ri wa aj uxlabal.

⁴ Conojel xcuq'uiaj que ri xa junam uq'uia' aj uxlabal. Rumal rech chi xcuq'uiaj que ri ja' ri xpe pa ri abaj aj uxlabal ri junam benak cuc'. Ri abaj ri' are ri Crist.

⁵ E q'ui c'u chque ri man xquiban ta ri cäkaj chuwäch ri Dios. Rumal ri' xecäm can pa ri chaki'j uwo sak.

⁶ Ronojel wa' xc'ulmaxic rech cux jun c'utbal chkawäch uj, rech man cäkarayij ta ri itzel tak jastak jas ri xquirayij ri e are'.

⁷ Mik'ijilaj tak e diosib, jas xquiban jujun chque ri e are'. Cubij c'u ri tz'ibatalic: “Xet'uyi' ri winak, xewa'ic, xebuq'uianic. Xewalij c'u che u banic etz'enem.”

⁸ Mixmacun cuc' ixokib achijab, jas ri xquiban jujun chque ri e are'. Rumal c'u ri' xecäm juwinak oxib mil (23,000) xa pa jun k'ij.

⁹ Mäkac'ambejej ri Ajawaxel, jas ri xquiban jujun chque ri e are'. Xecämisax c'u cumal ri cumätz.

¹⁰ Mawi mixch'ach'atic, jacha' jujun chque xech'ach'atic, rumal ri' xecämisax rumal ri tako'n ajcämisanel.

¹¹ Xquic'ulmaj ronojel wa' rech cux jun c'utbal chkawäch uj. Xtz'ibax c'u che ka pixbexic uj ri uj c'o pa tak we q'uisbal tak k'ij junab ri'.

¹² Je c'u ri', apachin ri cuchomaj chi co tac'alic, chrila' rib rech mätzakic.

¹³ Man i rikom ta c'u jun c'ambejenic ri ma ta aj winak; jic c'ut ri Dios chi man cuya' taj quixc'ambejexic xane' xak xuwi ri quixcuin che u k'atixic u wäch, cuya' c'u xukuje' junam ruc' ri c'ambejebal ri elebal.

¹⁴ Rumal ri', lok'alaj tak wachalal, chixanimaj chuwäch ri qui k'ijilaxic tak ri diosib.

¹⁵ Quinbij wa' chiwe rumal rech chi quixcuin che u ch'obic. Kas ba' chichomaj rij ri u tzij.

¹⁶ Aretak cakuq'uiaj ke che ri tewichimalaj kumubal ri rumal cakaya' maltioxinic che ri Dios cakajunaj kib ruc' ri Crist pa ri u cämical; aretak cäkatij ri caxlanwa ri cakapiro, cakajunaj kib ruc' ri Crist pa ri u cuerp.

¹⁷ Xa' c'u jun ri caxlanwa. Ri uj pune' uj q'ui, xa c'u uj jun cuerp, rumal rech chi konojel cäkatij ke ri caxlanwa ri'.

¹⁸ Kas chebiwila' ri aj israelib; ri quequitij quech ri awaj ri e chi'm che tabal tok'ob ri' caquic'am quech ri tabal tok'ob.

¹⁹ ¿Jas c'u ri quinbij? ¿La quinbij lo chi c'o qui banic ri diosib? ¿La quinbij lo chi c'o qui banic ri jastak ri e yo'm chquiwäch ri diosib ri'?

²⁰ Man je ta c'u ri'. Xane' quinbij chi ri tabal tok'ob ri cäquiya' ri winak chquiwäch ri qui diosib, chquiwäch ri itzel tak uxlabal cäquiya' wi, man chuwäch ta ri Dios. Man quinwaj ta c'ut chi ri ix quic'am iwe cuc' ri itzel tak uxlabal.

²¹ Man cuya' taj quiwuq'uiaj ta iwe che ri ruq'uiabal ri Ajawaxel, xukuje' quiwuq'uiaj iwe che ri cuq'uiabal ri itzel tak uxlabal. Mawi cuya' quic'am ta iwe pa ri u mexa ri Ajawaxel, xukuje' quic'am iwe pa ri qui mexa ri itzel tak uxlabal.

²² O ¿la cäkayac royowal ri Ajawaxel? ¿La are ta c'u lo c'o na ka chuk'ab uj chuwäch ri are'?

Ri ya'talic xukuje' ri lok'ok'ebal c'uxaj aj Crist

²³ Ronojel ya'tal u banic wumal, man ronojel ta c'ut c'o quechbex che. Ronojel cuya' quinbano, man ronojel ta c'ut cuya' ka chuk'ab pa ri ka cojonic.

²⁴ C'o jun mutzucuj ri utz che chbil rib, xane' chutzucuj ri utz che ri jun chic.

²⁵ Chilok'o' chitija' ronojel ri cac'ayix chupam ri c'ayibal ti'j, miban c'otoj chi'aj rumal rech ri etamabal c'uxaj.

²⁶ Rumal chi ri Ajawaxel are ajchak'e ri ulew, xukuje' ronojel ri c'o cho ri uwächulew.

²⁷ We c'o jun ri man cojonel taj quixusiq'uij che jun wa'im, we c'u quiwaj quixbec, ronojel ri cäya' chiwäch chitija'. Mixc'otow chi'aj rumal rech ri etamabal c'uxaj.

²⁸ We c'o jun cubij chiwe chi yo'm che u k'ijilaxic jun dios, mitijo, rumal ri jun ri xuk'alajisaj chiwäch, xukuje' rumal rech ri etamabal c'uxaj.

²⁹ Man quinbij ta rumal rech ri retamabal i c'u'x ix, xane' rumal rech ri re ri jun chic. ¿Jas c'u che cäk'at na tzij puwi' ri tzokopitalic rumal ri retamabal u c'u'x jun winak chic?

³⁰ We c'u quinmaltioxin che ri Dios rumal ri quintijo, ¿jas c'u che quinyok' rumal rech ri quintijo?

³¹ Je c'u ri', we quixwa'ic, we quixuq'uianic, o we c'o jun jasach chic quibano, chibana' ronojel che u nimarisaxic u k'ij ri Dios.

³² Mixux ya'l tzakibal chque ri aj judeyib, mawi chque ri man aj judeyib taj, mawi che ri comon cojonelab aj Dios.

³³ Ri in, pa wech wi, quintij nu k'ij quinban ri cäkaj chquiwäch conojel pa ronojel, man are' ta quintzucuj ri kas utz na chwe xane' are ri quech ri niq'uiaj chic, rech caquirik ri colobal ib.