Rut 1 - Biblia Mixe de Quetzaltepec

Nyëjkxtë jam Moab yë Elimélec mëët yë y'u'unk y'ëna'k

^1-2 Jä'ä xëëw, jä'ä jëmëjt, ma ënäty y'ënä'ämtën yë tsiptuunpë ja'ayëty tsip'ixypyë jam Israel kajpnjotm, ojts yë yuu xëëw y'ity. Paatykyëjxm ojts tsyo'onë tu'uk yë ja'ay, Elimélec xyëëwajtyp, jam kyukajpnëty Belén, Judá y'itjotm ets ojts nyijkxy tsënääpyë ma Moab y'itjotmën. Ojts twoownëjkxy yë tyo'oxytyëjk Noemi ets nimäjtsk yë myaank: tu'uk txëëwaty Mahlón ets tu'uk Quelión. Jä'ä yajtijtë Éufrates ja'ayëty, jä'ä ko jam tsyoontë Belén. Ojts jya'të jam Moab ets jam tsyënaaytyaknpëjktë.

³ Ok ja Elimélec ojts y'o'knë, ja Noemi nyiye'etyëjk; tää ja Noemi ku'ooky wyë'ëmnë mëët nimäjtsk ja myaank.

⁴ Kom'ok ja myaank ja nimäjtskpë pyëjktë mëët ja to'oxytyëjk, Moab ja'ayëty; tu'uk txëëwaty Orfa ets tu'uk Rut.

⁵ Kom majk jëmëjt ojts y'o'knë ja Mahlón ets ja Quelión näjyëtu'un. Ko jëtu'un jyäjty kyëpejty yë Noemi o'ktëy nyäjya'awëyë, tyam tëë ja nyiye'etyëjk y'ooky ets ja myaank nimäjtsk jyaak timy'ooky.

Nyëjkxtë jam Belén yë Noemi ets Rut

⁶ Kom ok ja Noemi ojts nijawë jam Moab, ko ma ja kyajpnën tëë ënäty ja yuu xëëw nyajxnë.

⁷ Paaty ojts jam Moab tsyo'onëtë ets nyëjkxnëtë jam Judá mëët nimäjtsk ja xyäkxy.

⁸ E jam tu'u'am ma wäänë wyimpo'kxnaxtën. Jam ja Noemi t'ënëmaay ja xyäkxytyëjk: U'unkëty maayëty, nëjkxtë ma mtëjkëtyën ma ja mteety mtaak yajpaatën. Yë Wintsën yë'ë oy tsuj xëmë mëët'atëtëp, jëtu'un tä miitsëty janty'oy janty tsuj të xymyëët'atës mëët yë n'u'unk n'ëna'kës,

⁹ Yë'ë y'a'ixëp ets miits oy jatëkok mpëktëty m'uuktëty ets xymyëët'atëty ja mjëën mtëjkëty, m'u'unk m'ëna'këty. Tääts je'eyë t'ëkjaaktsu'kxnë ets tjëëkajpxnë, e yë'ëjëty ojts tyëkëtë yaxpë ets y'ënantë:

¹⁰ Ka'ap y'oy'atëty, tëëjës ntuknipëjktaakëtë ko mijts npanëjkxa'antë ma mnaax mkajpnën.

¹¹ E ja Noemi mëktä'äky y'ënaan'ëtë'ëtsy: Wimpitë u'unk maayëty, ¿Tiijës ko nëkoo xypyamintëty? ëjts ka'apës yë u'unk maay n'ëkpaatan n'ëk'ixanë mëti'ipë jeexyë mëët mpëktën m'uuktën.

¹² Tiits nikë oy ko mnëjkxtëty ma mjëën mtëjkëtyën, ëjts tëëjës nmëj ja'ayë, ka'ap t'ëkjëkyäjpnë wi'ixës jatëkok mpëkëty. Ets oy jeexyë jyajëtu'un'ajtpë ets jeexyë ya'atë ux njapëjkpës ets ja u'unk maay nyajminy nyajja'tëtyës naaxwiinyëtë.

¹³ Miitsëty ka'ap mëta'aktëty m'ëwxitëty ets y'ëkyääk y'ëkpatëty tääts mëët mpëktëty. Ka'ap mëpaat jyëtu'un'aty u'unk maayëty. Yë Wintsën yë'ë të tyajkutuky etsës mon tuk nyajpaatëty, e ëjts nëjkxëpës ni'ik nmony ntuky koos n'ixëty miits o'ktëy mjajnëtë nkëpäjnëtë.

¹⁴ Tä ojts tyëkëtë jatëkok yaxpë. Ja Orfa jä'ä ojts nyëjkxnë, je'eyë ojts tjaaktsu'kxy ja tyaakxyäkxy Noemi ets mëët nye'ëxmajtsë. E ja Rut ojts wyi'imy mëët ja tyaakxyäkxy.

¹⁵ Tä ja Noemi t'ënëmaay ja Rut: Ëk'ix u'unk maay, yë m'ojy tëë nyëjkxnë ma nyaax kyajpnën ets ma ja tyios t'ëwtatën. Panëjkx yë mmëku'uk.

¹⁶ E ja Rut tyaa y'ëtsooy: Këtiijës xy'atsip'aty ets mijts n'ëxmatsëty. Ëjts tëëjës ntuknipëjktaakë ko mijts npanëjkxa'any; ma mnëjkxyën jamës nnëjkxa'any; ma mjuuky'ätyën jamës njuuky'ata'any. Yë mkajpn yë'ëjës nkajpn'atäämpy ets mTios yë'ëjës nTios'atäämpy.

¹⁷ Jamës n'ookëty ma ënäty m'ookyën ets jamës naaxtëkëty ma ënäty mnaaxtëkën. Tios mëkës nëjkx xytyiytyuny ko ënäty mijts n'ëxmajtspë, ënät tëy n'ëxmatsëty koos ntimy ookëty.

¹⁸ Ko yë Noemi t'ijxy ko tëë tu'ukyë wyinma'any tpëjktä'äky yë Rut ko ka'ap y'ëxmatsa'anyë, ka'ap ojts wi'ix t'ëk'ënëmaaynyë.

¹⁹ Ënät ojts jatëkok tsyoontë nimäjtsk ets jyajtë jam Belén. Ko jam jyajtë Belén, janty mëj'ixy yë ja'ay tja'awëtyë ets ja to'oxytyëjkëty y'ënantë: ¿Ti këtiijën tyaapë jyä'äjëty ja Noemijë?

²⁰ E ja Noemi tyaa y'ëtsooy: Këtiijës jëtu'un xy'ëktijnëtë Noemi; jä'äs xytyijtëty Mará, jä'ä ko yë Tios mëti'ipë maaytyääyëpën winë, tëëjës yë njuukyajtën tyajkëxy mëët yë monyëtukyë.

²¹ Koos yaa ntso'ony, mayës winë nmëtso'ony, tyam jëtu'unyës ja'ay'äjty të nwinpity, jä'ä ko jëtu'un yë Wintsën tsojkën'aty. ¿E tiijës ko je'eyëm xytyijtëty Noemi, pën tëë yë Wintsën mëti'ipë maaytyääyëpën winë xypyokyës ets të xymyo'oyës ja ëyo'on jotmay?

²² Jëtu'un'äämpy yë Noemi mëët yë Rut ojts jam tsyo'onëtë ma Moab y'itjotmën ets nyëjkxnëtë Belén, ko jam jyajtë yë'ë ënäty yë tsajpmok ja'ay kamwinm yajpëtë'ëkantëp.