Lucas 6 - Biblia Mixe de Quetzaltepec

Ko ja Jesús ja y'ijxpëjkpëtëjk tkutsë'ëptë ja tsajpmok yon po'kxënxëëwjoty

¹ Po'kxënxëëw ënäty, ko ja Jesús jam nyäjxy tsajpmok yon kamjotm mëët ja y'ijxpëjkpëtëjk. Tääts ja y'ijxpëjkpëtëjk tkutsëptë ja tsajpmok yon ets twinxatstë ja pyajk ets tjë'kxtë.

² Tam ja fariseë ja'ayëty mëti'ipë ënantëpën: ¿Tii ko jëtu'un m'ëtë'ëtstë, yë'ë mtuuntëp mëti'ipë po'kxënxëëwjoty ka'ap mëpaat yajtunyën?

³ Tääts ja Jesús y'ëtsooy: ¿Ka'anëm miits xykyajpxtënëm nokyjoty tii ja David tëkok tyuunën mëët ja myëku'uktëjk ko ja yuu pyatëtë?

⁴ Tsajptëkoty tyëjkëy ets ja tsajpkääky kënu'kxypyë tyajpëtsëëmy ets tkaay, ojts tmo'oy näjyëtu'un ja myëku'uktëjk ets ka'ap ënäty kyutukyëty tkaytyëty, yi'iyë kyääytyëp ja teetyëjk.

⁵ Tääts jyaak'ënany: Yë naaxwiinyëtë ja'ay y'U'unk myëët'ajtyp ja kutujkën po'kxënxëëwjoty.

Jesús tyajtso'oky tu'uk yë pa'amja'ay, po'kxënxëëwjoty

⁶ Wiinkpë po'kxënxëëw ënäty, ko ja Jesús tyëjkëy tsajptëkoty ets yaj'ijxpëjktso'ony. Japts ënäty tu'uk ja ja'ay mëti'ipë kyë'ëjën të'ëts tu'k'atu'um aka'anypë;

⁷ ja tsajptëkotyëtë yaj'ijxpëjkpëtëjk ets ja fariseë ja'ayëty je'eyë tpa'ix tpawoontë ja Jesús, yë'ë y'ixantëp pën y'ëkyajktsokpy ja pa'amja'ay po'kxënxëëwjoty, jëtu'unts tni'ëënëja'antë.

⁸ Ja Jesús wa'ats tnijawë wi'ix ja ja'ay myäytyë tyajtën, tääts t'ënëmaay mëti'ipë ënäty ja kyë'ëjën të'ëts: Pëtë'ëk, tänë yaa itkujky. Tääts ja ja'ay pyëti'ky ets wya'kujkëy,

⁹ ënät ja Jesús t'ënëmaay ja mayjyä'äy: Nyajtëwantëp miits tyam. ¿Oy ko po'kxënxëëwjoty ntu'unmëty ja oypyë ëkë ja ëxëëkpë, ko ja'ay nyaj'o'kmëtyë ëkë ko ja'ay nyajtsokmëtyë?

¹⁰ Ënät twin'ijxpejty ni'ëmukë mëti'ipë ënäty jamëtyën winkon ets t'ënëmaay ja pa'amja'ay: Xajtëw. Tääts ja ja'ay xyajtëëy ets ja kyë'ë ojts tsyo'oky.

¹¹ E ja wiink ja'ayëty ojts jyoot'anpëktë ets xim yam nyäyajtëëwëtë wi'ix ja Jesús t'ëktuntëty.

Ko ja Jesús twinwitsy ja nimajkmäjtskpë ja y'ijxpëjkpëtëjk

¹² Jää po'o ja Jesús ojts nyijkx Tios mëkajpxpë kopkëjxm, tu'ktsu'um ja Tios ojts tja'amyetsy.

¹³ Ko xyiinytyäky ënät tyaxtsooy ja y'ijxpëjkpëtëjk ets twinwijtsy nimajkmäjtsk mëti'ipë ojts txëëwmo'oyën ayukkajpxwa'kxpë.

¹⁴ Tam ënäty ja Simón, mëti'ipë Jesús ojts yajxëëwpetyën Pedro, ja y'uty ja Andrés; tam ja Santiagë mëët ja Juan, Felipe, Bartolomé,

¹⁵ Mateo, Tomás, Santiagë, mëti'ipë Alfeo myaank'ajtypyën, Simón ja Celote,

¹⁶ Judas, mëti'ipë Santiagë y'u'unk'ajtypyën ets ja Judas Iscariote, mëti'ipë Jesús kyë'ëyajkën.

Ko Jesús tyaj'ijxpëky ja mayjyä'äy mejypyë'am

¹⁷ Tääts ja Jesús tsyo'ony jam kopkëjxm mëët nimay ja y'ijxpëjkpëtëjk ets wya'ak'o'oyëy ma tu'uk ja joyën. Tam ënäty nimay ja ja'ayëty të myuktë mëti'ipë tso'ontëpën Judea y'itjotm, Jerusalén ets mejy ëkë'ëmpë tsyoontën ma ja Tirë kajpnën ets Sidón kajpnën.

¹⁸ Yë'ë ënäty të myintë ets tmëtoow'ita'antë ja Jesús ja y'aaw y'ayuk ets ja pa'amja'ay tyajktso'okëty. Tam mëti'ipë ja ku'oypyë myëët'ajtypyën. Ojts tsyokta'atë.

¹⁹ Paaty ja ja'ayëty aak tyonantëp ja Jesús, jä'ä ko yajtsokpy ja pa'amja'ay mëët ja myëk'ajtën.

Mëti'ipë tsoowpatpën ma Tiosën

²⁰ Ënät ja Jesús twin'ijxpejty ja y'ijxpëjkpëtëjk ets t'ënëmaay: Akujk jotkujk miitsëty myajpaatë mëti'ipë ëyoowtëpën, jä'ä ko miits mjä'ä'ajtëp ja Tios ja kyutujkën.

²¹ Akujk jotkujk miitsëty myajpaatë mëti'ipë tyam yuu'o'këtëpën, jä'ä ko m'itantëp ku'uxyë jotkëtä'äky. Akujk jotkujk miitsëty myajpaatë mëti'ipë tyam jëëytyëp yaxtëpën, jä'ä ko m'itantëp xi'iky xony.

²² Akujk jotkujk miitsëty myajpaatëty ko ja ja'ay m'ëxëëk'ixëtëty, m'ëxwopëtëty, m'ojëtëty ets jëtu'un myaj'ixtëty m'ëxëëkja'ay'ajtëp yowë, mëët ko yë'ë xymyëjwa'kpätë ja naaxwiinyëtë ja'ay ja y'U'unk.

²³ Jotkujk itë ets xoonta'aktë ko jëtu'un myajtun myaj'ënëëmëtëty, jä'ä ko mëj myajkumaya'antë tsajpjotm; jä'ä ko ja y'aptëjkëty tääpë ja'ayëty mëti'ipë tyam juuky'ajtëpën näjyëtu'un ojts ëxëëk tuntë ja Tios ja kyäjpxynyajxpëtëjk.

²⁴ Miits kumeenyjyä'äyëty mon tuk myajpaatë, jä'ä ko tyämyë miits xytyukxoonkojtë.

²⁵ Mon tuk myajpaatë miitsëty, mëti'ipë tyam ku'uxyë jotkëtä'äky kaaytyëp uktëpën, jä'ä ko m'ayuu'atantëp miitsëty ok. Mon tuk miits myajpaatë, mëti'ipë tyam xiktëp xoontëpën; jä'ä ko mjë'ëjan mya'axantëp miitsëty ok mëët ja jotmay.

²⁶ Mon tuk miitsëty myajpaatë ko ni'ëmukë ja naaxwiinyëtë ja'ay oy mnixon mni''itëtë, jä'ä ko jëtu'un ijty tëëyëp tääpë ja'ayëty yë y'aptëjk y'ëtë'ëtstë mëët ja win'ë'ënpëtëjk mëti'ipë nätyijëtëp ko Tios kyäjpxynyajxpë'atëtë.

Wi'ix mëtsip yajtsokëtyën

²⁷ E miitsëty mëti'ipës n'aaw n'ayuk myëtoow'ijtëpën, tsoktë ja mmëtsip, putëkëtë mëti'ipë mkatsojkëtëpën.

²⁸ Amëtowtë Tios ets tkënu'kxëty mëti'ipë mkajpxpojkëtëpën, tuknija'amyätsëtë Tios mëti'ipë oywyi'ixjaty mtuunëtëp mnëmaayëtëpën.

²⁹ Ko pën m'apojtsë'ëkëtëty, jaaktimmo'o ja tu'k'atu'um, wä'än mjaaktimy'apojtsë'ëkyë; ko pën yë mnëxuy mpëjkëtëty, jaaktimmo'o yë mnijän.

³⁰ Pën tii m'amëtoowëp, mo'o; ko ja'ay tii mpëjkëtëty, këtii jatëkok xy'amëtowëty.

³¹ Ijxtëm miits xytsyoktën ets ja ja'ay winë tunëty, näjyëtu'un miits winë tuntë.

³² Pën yi'iyë miits m'oyjya'awëtëp mëti'ipë mtsojkëtëpën, ¿tiijën ja jëtu'unpë xyajnätyijëtë? Yë'ëpaat yë ëxëëkja'aytyëjk jëtu'un winë tuntë.

³³ Pën yi'iyë miits ja oypyë mtukmëtuuntëp mëti'ipë winë oy tyuuntëpën ma miitsëtyën, ¿tiijën ja jëtu'unpë xyajnätyijëtë? Yë'ëpaat yë pokyjyä'aytyëjk jëtu'un winë tuntë.

³⁴ Pën yë'ë ja ja'ay mtuk'ënu'kxtëp winë mëti'ipë näjyëtu'un winë mtuk'ënu'kxëtëpën, ¿tiijën ja jëtu'unpë xyajnätyijëtë? Yë pokyjyä'äytyëjk näjyëtu'un winë nyätyuk'ënu'kxëtë ets jyëjp'ijxtëp ets jatëkok winë yajmooywyimpitëty.

³⁵ Mtsoktëp miits ja mmëtsip, tuntë ja oypyë, tuntë ja mëyajtën; tuk'ënu'kxtë winë mëku'uk ets këtii xyjyëjp'ixtëty ets jatëkok mooywyimpitëtëty. Jëtu'un miits mëj nëjkx myajkumaytyë ets nëjkx m'u'unk'atëtë ja Tios tsajpjotmëpë, jä'ä ko yë'ë oy Tyios'aty ma ja ja'ayëtyën mëti'ipë ka'ap tii tkukajpxën ets ëxëëkpë jyä'äy'ätyën.

³⁶ Mpa'ëyowtëp miits ja ja'ay ijxtëm ja Tios Teety pya'ëyoyën.

Ka'ap yë'ë yaj'ix yajtunëty tii ja jëëky mëku'uk tyuunpy oy ka'oy

³⁷ Ka'ap wiinkëtypë xy'ixtëty xytyuntëty ets ja Tios ka'ap näjyëtu'un m'ixëtëty mtunëtëty. Ka'ap wiinkëtypë xypoky'ixtëty ets ja Tios ka'ap mpoky'ixëtëty. Nimä'kxtë ja ja'ay ets ja Tios mnimä'kxëtëty.

³⁸ Mo'otë ja ja'ay tii yajmëyäjtypyën, ets ja Tios näjyëtu'un mmo'ojëtëty mëj këjää winë, mëët ja oykyijpxn, kä'pxy ako'ow ajääpë. Näyjyëtu'un miits ja Tios winë mo'ojëtëty ijxtëm ënäty ja ja'ay winë xymyo'otën.

³⁹ Tääts ja Jesús tnimëtyäky ya'atë ijxpäjtën: ¿Wä'än jëtää tu'uk ja ja'ay wiintspë ja myëwiints tu'uwinwitsëtyë? Ka'ap ¿nimäjtsk jyutkukëtawa'antë?

⁴⁰ Ni pën ijxpëjkpë tkamëpaaty mëti'ipë yaj'ijxpëjkëpën. Ko ja y'ijxpëjkën tyajka'pxëty ënät tmëpaatëty ja mëti'ipë yaj'ijxpëjkëpën.

⁴¹ Mijts, ¿wi'ix yë mmëku'uk ja pyu'uxm xy'ijxpatënë jap wyiinjoty ets ja mjä'ä ka'ap xy'ixy mëti'ipë japën mwiinjoty mëj ijxtëm tu'uk yë kepyën?

⁴² Jëtu'un mijts ijxtëm tu'uk ja ja'ayën mëti'ipë mëj kepy myëët'ajtypyën wyiinjoty ets ja myëku'uk t'ënëëmë: Mëku'uk, minës n'ëkyajpëtsëmy yë pu'uxm mëti'ipë japën mwiinjoty. Win'ë'ënpë. Yaj'oyë mjä'ä jëyëjp ets ok ja mmëku'uk ja jyä'ä xyaj'o'oyëyëty.

Yaj'ijxkajp ja ja'ay mëët ja jyä'äyajtën

⁴³ Ma ja kepy ja oypyën, ka'ap ja tyëëm ëxëëk pyëtsimy; ëkë ja ka'apë y'oykyepëtyën, nimaa ja tyëëm kyapëtsemy oy.

⁴⁴ Ja tyëëm yajtuk'ijxkajp pën oy ëkë ëxëëk ja kepy: Ka'ap ja xe'enky tsya'am yajtuky ma ja äpny kepyën; ets ka'ap ja tsatsymtsya'am jam yajtuky ma ja tsëmu'un kepyën.

⁴⁵ Ja oyjyä'äy, oy ja kyajpxën myëtyakën, jä'äkyëjxm ko twinma'any'äty ja oypyë. Ja ëxëëk ja'ay, ëxëëk ja kyajpxën myëtyakën jä'äkyëjxm ko twinma'any'äty ja ka'apë y'oyëtyën. Mëti'ipë jyootjoty wyinma'anyjyotyën, yë'ë kyajpxpëtsëëmpy.

Mäjtskpëkpyë potsy

⁴⁶ Wintsën, Wintsën, jëtu'unës miits xynyëëmëtë, je'eyëp ko ka'ap xypyatuntë ja ënä'ämën mëti'ipës nikäjpxypën.

⁴⁷ Tyam ntuk'ëwaanëtëty wi'ix ja ja'ayën mëti'ipës xynyimiinpën ets tmëtoow'ity ja n'ayukës ets tpatuny tiis ntuk'ëne'empyën.

⁴⁸ Jëtu'un yë'ë ijxtëm ja ja'ay ja tyëjk tkojyën. Jëwyiin yajxon këk tnitajë ets tsaakëjxy tpojtsë'ëky. Tääts ko ja nëë kyomy, mëk ja nëë jyatukja'tyë ets niwi'ix kyajaty, jä'ä ko tsaa y'ëjx'ajtyp.

⁴⁹ Pën ja n'aaw n'ayukës myëtoow'ijtypyën ets ka'ap tpatuny, jëtu'un yë'ë ijxtëm ja ja'ayën mëti'ipë ja tyëjk të tkojyën naaxwiinkëjxy, ka'ap këk të tnitajë ets ja nëëkom të tyukja'tyë ets të jyë'ëtë'ëky.