Jueces 7 - Biblia Mixe de Quetzaltepec

Gedeón tsyiptuny mëët yë Madián ja'ayëty ets ka'ap tyajmëtäky

¹ Gedeón mëti'ipë ënäty të txëëwmo'otën Jerubaal ets tëkokyë mëti'ipë ënäty jämyëët'ajtëpën tsojk ojts tsyo'onkojtë jopyëp ets nyëjkxtë jam Harod ma ja nëëwookyën. Ja Madián ja'ayëty jam ënäty të nyäpyëjkta'akëtë anëkëjxytsyow, ma tu'uk ja mëj joyën mëti'ipë yajpatpën jam kopk'ëjx mëti'ipë xyëëwajtypyën Moré.

² Ënät ja Wintsën t'ënëmaay ja Gedeón: Naxy yë ja'ay nimay xywyoomiinë, ko ënät ka'ap tyajmëta'aktëty yë Madián ja'ayëty ëna'antëp ënät ko jä'ä ko nyimay'atë paaty të myëta'aktë.

³ Paaty nëjkx ets xy'ënëëmëty, ko pën tsë'këp oy wyimpitëty ets nyëjkxëty ma tyëjkën. Jëtu'un'äämpy ojts ja Gedeón t'ixy ko may ënäty ja ja'ay wintse'knyëpë, jä'ä wyimpijtë ja ja'ayëty i'px mäjtsk mil ets je'eyë ojts wyë'ëmtë majk mil.

⁴ Ënät ja Wintsën ni'ikyë y'ënaan'ëtë'ëtsy: Jaaknimaynyëm yë ja'ay: Woownëjkxta'a jam nëë'ëkë'ëm ets xyajnëë'uukëty, jamts ntuk'ëwaanëty pënjaty mpanëjkxëtëp tsiptuunpë.

⁵ Tä ojts ja Gedeón ja ja'ay twoonëjkxta'ay nëë ukpë ets jam ja Wintsën y'ënëmaayë: ëpëky pëjkta'ak ja ja'ay kë'ëmëëtpë nyëë'uutën ets nän pëjkta'ak ëpëky mëti'ipë jëtu'unyë ja nëë nyinaxkuko'owëtyëpën ukën, ëkë mëti'ipë tim näjyujpëpën ets nyëë'uuky.

⁶ Ja ja'ayëty mëti'ipë nëë''uktën kë'ëmëët ets mëti'ipë jëtu'unyë ja nëë wye'epyën ukën, jä'ä nyiwinë'ajtë nitëkëëk mëko'px. E ja wiinkëtypë koonëm ja t'ëktimwyinkoxtänë tääts nyëë'uuktë.

⁷ Ënät ja Gedeón y'ënëmaayë ja Wintsën: Ya'atë nitëkëëk mëko'pxpë ja'ayëty yë'ë mëët nyajtso'oka'any yë Israel kajpn, etsës nyajkutëkoyä'äny yë Madián ja'ayëty. Ja nimaypyë ja ja'ayëty oy wyimpitëty.

⁸ Ënät ja Gedeón t'ënëmaay ja ja'ayëty mëti'ipë ënäty ka'ap nyëjkxa'antën tsiptuunpë: Miitsëty oy mnëjkxtëty ma mtëjkëtyën. Yë'ë tëy yajwë'ëmtë ja mxutyëty, ja mnëë'apëjkënëty ets ja mtsajpkaawajëty. Tää ojts je'eyë mëët wyi'imy ja ja'ay nitëkëëk mëko'px ets ojts nyëjkxtë jam anëkëjxmtsow ma ja Madián ja'ayëty ënäty të näpyëjkta'akëtën jamts yë'ëjëty nyäpyëjktakëtë, ma ja joyjyot jam tsyo'ontä'äkyën.

⁹ Koots ojts ja Wintsën tmëkäjpxy ja Gedeón ets t'ënëmaay: Gedeón ëkpëtë'ëk, nänyipëjktaakët ënätyë ets nëjkx xytyukja'ty yë Madián ja'ayëty jam ma yajpaatën jam joyjyotm, jä'ä ko tëëjës nkë'ëyäky ma mijtsën.

¹⁰ E pën mtsë'këpts xynyipëtë'ëkëty yë mmëtsip. Yë'ë mëët jëjpta'ak yë mtuunpë mëti'ipë xyëëwajtypyën Purá, jam ma ja mmëtsip jam yajpaatën.

¹¹ Ets mëtoow'it wi'ix y'ëna'antë yë mmëtsipëty ame'tsyë, tääts ënät mjotmëkta'akëty wi'ix xynyipëtë'ëkëtyën. Paaty ojts yë Gedeón jyänty tsyoony mëët ja tyuunpë mëti'ipë xyëëwajtypyën Purá ets tyimja'ajtë jampaat ma ja myëtsipëty ja wyittëjk jyëjpkëxtën.

¹² E ja Madián ja'ayëty, Amalec ja'ayëty ets tëkokyë jënu'un ënäty jam tsyoontën xëëwpëtsëmtsyow ets të nyäpyëkëtë, tu'ukyë ënäty jam joyjyotm të nyäpyëjkta'akëtë tä yë poomxots tyajwintukyën muum yë kam tu'u ko kyëtyeyä'äny. Yajxon ënäty myäy'ajnë ja jëyujk jëku'ux, jëtu'un tä nëë'ajinën.

¹³ Ko ja Gedeón tu'uk ja wit tëjk tmëwinkoony jam ma ënäty ja myëtsiptëjk yajpaatën, ënät tmëtooy wi'ix tu'uk ja tsiptuunpë tnimëtyä'äkyën ja kyëma'ay ma ja myëku'ukën, jëtu'un y'ënä'äny: Tyaajës të nwinkuma'ay: tu'ukën yë tsajpkääky janty mëjpë mëti'ipë oytyunyën mëët yë tsajpmok të kyëpijptsoony jam jëkäm, e ko tu'uk ja wit tëjk të tukja'ty tëë tjijtë'ëky.

¹⁴ Ets ja myëku'uk y'ëtsoowë: Tääpë yë'ë nyikäjpxyp yë Gedeón yë yenypyujxn, yë Joás yë myaank, yë Israel ja'ay. Yë Tios tëë kyë'ëyakëtë yë Madián ja'ayëty mëët tëkokyë yë wyitëjkëty ets jyëyujk tsyajpkaajëty ma Gedeónkën.

¹⁵ Ko jëtu'un yë Gedeón tmëtooy wi'ix yajnimëtyä'äkyën ja kuma'ay ets wi'ix ojts tyajniwijtën yë'ë kë'ëmëty, ënät yë tmëjja'awëy tkënu'kxy ja'awëy yë Wintsën. Tääts ojts poj'am nyijkxy ma ënäty ja myëku'uktëjk yajpaatën, ja Israel ja'ayëty ets y'ënäny: Pëtë'ëktë Israel ja'ayëty, yë Wintsën tëë xykyë'ëmo'oyëmë yë Madián ja'ayëty.

¹⁶ Tä ja Gedeón ojts tëkëëkpëky tyajwä'kxy ja tsyiptuunpëtëjk ets tmooy këëktu'uk yë tu'ts'u'unk ma ja piity tyaj'itën mëti'ipë toopyën ets yë'ë nyätyukutu'kxëtëty ets näjyëtu'un tmooy këëktu'uk yë tsajpkaawaj.

¹⁷ Ets ojts tkajpxtë'ëy: Koos nja'tëty jamtsow ma ja mëtsip yajpaatën, yajxon xy'ixtëty wi'ixës winë ntunyën ets näjyëtu'un winë xytyuntëty.

¹⁸ Koos nyaj'ëna'anëty yë tsajpkaawaj ets näjyëtu'un tyaj'ëna'antëty ja jyä'äyëty mëti'ipës xypyanëjkxtëpën, ënätyë miits ja mjä'äjëty xyaj'ënaanta'aktëty na'ëwtity ma ja mëtsiptëjkëtyën ets mëk m'ëna'antëty: Yë Wintsën mëët ets Gedeón mëët.

¹⁹ Tä yë Gedeón mëët yë jyä'äy nimëko'px jamtsow nyëjkxtë ma ja myëtsip ënäty yajpaatën, tsu'um jam nyajxtë ma ënäty tyajtso'onta'aka'antën ja tsip. Tääts tyëjkëtyë xuxpë wikpë mëët ja tsajpkaawaj ets tpu'utaaytyë ja tu'ts'u'unk mëti'ipë ënäty myënëjkxtëpën.

²⁰ Tëkëëkpëky ja tsiptuunpëtëjkëty ojts tyaj'ënaanta'aktë ja tsyajpkaawajëty ets tpu'utaaytyë ja tsyu'tsëty mëti'ipë ënäty myënëjkxtëpën. Ja y'anajnykyë'ëjëty yë'ë mëët nyätyukutë'kxëtë, e ma ja y'a'oykyë'ëjën yë jam myajts'ijtëp ja tsyajpkaawaj, ets mëk jyänty ya'ax jyänty jyoktë: Tsip tuunëp mëëtkyëjxm yë Wintsën ets mëëtkyëjxm yë Gedeón.

²¹ E ja Israel ja'ayëty jëtu'unyë ojts wyë'ëmta'atë ma ënäty jam ya'axtën jyoktën, jam pë'am ma ja myëtsip yajpaatën, tyamts ja Madián ja'ayëty tsë'ëkë tsë'ëkë jyänty pyëtsëmtë ma ja wyitëjkëtyën ets kyäktaaytyë,

²² ja nitëkëëk mëko'pxpë ja Israel ja'ayëty ni'ikë ja jyänty xyuux'ëtë'ëtstë, mëti'ipë tyukxuxtëpën ja tsajppaxwaj, ja Wintsën ojts kë'ëm tuknipëjktaakë ets ja Madián ja'ayëty tyëkëtëty tsiptuunpë aakyë'ë, yë Wintsën yë'ë ojts tuknipëjktaakë ets kyä'äktëty jampaat ma txëëwatyën Bet-sita, matsow yajninëjkxyën ja Sererá kajpn ets jampaat ma ja tsyëpa'an nyäxyën ja Abel-meholá winkon jam Tabat.

²³ Ënät ojts yajmëkajpxtë ja Neftalí ja y'u'unk y'ok, ja Aser ja y'u'unk y'ok ets ja Manasés ja y'u'unk y'ok ets tpapo'otëty ja Madián ja'ayëty.

²⁴ Ënät ja Gedeón ënätyë ja aaw ayuk tkejxy jam ma yajpaatën ja Efraín ja jyä'äyëty ets jyënaktëty, tu'u'ëtuktëty ja Madián ja'ayëty ma nyaxa'antën jam Bet-bara ets ma ja Jordán mëjnëëjën. Yë Efraín yë jyä'äyëty ojts ënätyë ja aaw ayuk tpatuntë.

²⁵ Mäjtsk ojts tmatstë mëti'ipë nyikopk'ajtëpën ja Madián ja'ayëty, Oreb ets Zeeb. Ja Oreb jam tyaj'o'ktë ma kopkën mëti'ipë tyam yajtijpën Oreb. E ja Zeeb jam tyaj'o'ktë ma ja itjotmën mëti'ipë xyëëwajtypyën tä ënäty yë'ë txëëwatyën, ma tääpë it naaxwiinyëtën jam ënäty ja'ay ja tsyätsym tyëëm twintääntë ets tyajvinëkojtë. Ko tyaj'o'ktaaytyë ja Madián ja'ayëty mëti'ipë ënäty të tpapo'otën, ënät ojts wyimpijnëtë, ojts tmënëjkxtë ja Horeb ets ja Zeeb ja kyëpajk jam ma Gedeón ënäty yajpaatyën, nëë'awinnaxy ma ja Jordán nëë jyënäkyën.