Jueces 11 - Biblia Mixe de Quetzaltepec

Jefté

¹ Jefté jotmëkja'ay ijty ets tsip'ixy, jam kyukajpnëty Galaad, yë'ë tyaak'ajtyp tu'uk yë to'oxytyëjk mëti'ipë jyot nyini'kx ijty tyo'kpyën ets yë'ë tyeety'äjtyp tu'uk yë ye'etyëjk mëti'ipë xyëëwajtypyën Galaad.

² E yë Galaad mëti'ipë tyo'oxytyëjk'ajtypyën tam ijty nimay ja y'ëna'k, ënät ojts t'ëxwoptë ja Jefté jam ma tyëjkëtyën ets t'ënëmaaytyë ko ka'ap nitii kuma'ayën tjëjp'ixëty mëti'ipë tyeety jeexyë mooyëpën jä'ä ko wiink to'oxytyëjk tyaak'ajtyp.

³ Paaty yë Jefté ojts timy kyuke'eky ja myëku'uktëjk ets ojts jam nyijkxy tsënääpyë ma Tob itjotmën, jam twoomujky yë ja'ay mëti'ipë ijty je'eyë yajja'ay'o'ktëpën ets yi'iyë tyuunk'ajtëp tsyoontë mëët ja Jefté ets nëjkx muum tii tuuntëkoytyë.

⁴ Nëjkxëp ojts tëkok ja Amón ja'ayëty tnitëkëtë yë Israel kajpn,

⁵ ets ja mëjja'aytyëjk, ja kopktëjkëty mëti'ipë kukajpnajtëpën jam Galaad ojts nyäkyajpxëtë ko twowa'antë ja Jefté, jampë yajpaatyën ma ja itjot txëëwatyën Tob,

⁶ ets ojts t'ënëëmëtë: Min yam ma ëëtsëtyën, ntsojktëpës ets mijts xytyu'uwinwowëty ya'atë tsip mëti'ipë ëëts nmëët'ajtëpën mëët yë Amón ja'ayëty.

⁷ Ënät ja Jefté y'ëtsooy: ¿Tiixë këtii xyjyä'ämyätstë ko miitsëty xy'ëxëëk'ijxtëpës, koos xy'ëxwojptë maas nteety yë tyëjkënë? ¿Wi'ix ko ënät tyam m'ëwtijta'aktë ets xy'ixta'atës ko mnäyjyawëtë jotmayjoty myajpaatë?

⁸ Patyën yam mijts myaj'ixta'ay jä'ä ko jotmayjoty nyajpaatës. Jëtu'un y'ëtsoowtë. Ëëtsëty ntsojktëpës ets xypyamintëtyës ets mtsiptunëty mëët yë Amón ja'ayëty ets mijts mniwintsën'atëp tëkokyë yë ja'ayëty jënu'un yajpaatën Galaad.

⁹ Pën miitsëty mjanty tsyojktëp etsës nwinpitëty jatëkok ma jam myajpaatën etsës ntsiptunëty mëët yë Amón ja'ayëty. Koos yë Wintsën xyajmëta'akëty, ëjts nëjkx miits xywyintsën'atë. Jëtu'un y'ëtsooy ja Jefté.

¹⁰ Ets ja mëjja'aytyëjk y'ëtsoowtë: Yë Tios yë'ë yam wa'ats xy'ijxyp nyija'ap ko ëëtsëty tyamës nkupëktë tä yam m'ëna'anyën:

¹¹ Ënät ja Jefté ojts tpanëjkxy ja mëjja'aytyëjk, ko jam jyajtë kajpnjotm, ënät ja kajpn ojts tnikajpxpety ja Jefté ets yë'ë wyintsën'atëty ets tu'uwinye'eyëty ja tsip. Jam Mispá, jam ojts yë Jefté Tios tuk'ëwaanë tä ënäty të y'ënä'änyën.

¹² Ënät tkejxy tu'uk ja kukäjpxy jam ma ja yajkutujkpën mëti'ipë ënä'ämpëy ma Amón ja'ayëtyën ets tyajtëwtëty: ¿Tii tsipën mijts mjëkyejpy mëët ëjts etsës nëkoo nnaax nkajpn xymyëma'ayëyëty?

¹³ Ënät ja yajkutujkpë Amón ja'ay y'ëtsooy: Miitsëty ko mtso'ontë jap Egiptë, ojtsës yë nnaax xypyëjkëtë mëti'ipë jam tso'ontakpën Arnón ets jyä'ty Jaboc ets ma Jordán mëjnëëjën. E tyamts npëjktsoy ets xyakëty a'oy.

¹⁴ Ënät ja Jefté ojts wiinkpë ja kukäjpxy tkexy ma ja Amón ja'ayëtyën,

¹⁵ mëët ya'atë aaw ayuk: Ëëtsëty, Israel ja'ayëty ka'ap ma pën yë nyaax kyajpn të npëjkëtës, yë Moab ja'ayëty ets Amón ja'ayëty ka'apës maa nyaax npëjkëtë.

¹⁶ Koos jap ntso'ontë Egiptë, jëyëjpës ntuknajxtë yë Tsapts Mëj mëti'ipë yajtijpën Ookpyë Mejy etsës nja'ajtë jam Cadés.

¹⁷ Paaty ojts yë Edom yajkutujkpë nkäjpxynyikexyës etsës jeexyë jam xyajnaxtë ma nyaax kyamëtyën, e yë'ë ka'ap t'a'ijxëy. Ojts näjyëtu'un yë Moab yajkutujkpë njakäjpxynyikexyës, yë'ë näjyëtu'un ka'ap t'a'ijxëy paaty ojts jam ntimy wë'ëmtës Cadés.

¹⁸ E ëëtsëty jam të'ëts'itjotm, ojts na'ëwtitës ja nyaax kyajpnëty ja Edom ets Moab ja'ayëty ets nja'ajtës jamtsow a'oytsyow ma Moab y'itjotmën; jamtsës ojts tu'kjëmëjt ntsënaaytyaknpëktë jamtsow awinm ma Arnón mëjnëëjën. E kajts ojts ntuknaxtës jä'ä ko jam ënäty tsyo'ontä'äky ja Moab ja'ayëty ja nyaaxjotmëty.

¹⁹ Ënät ojts nkäjpxynyikäxtës yë Sihón, yë Amor ja'ay, jampë tsyëënën Hesbón ets n'amëtoowtës ets jeexyë xyajnaxtës nyaaxjoty ets jam tëyë nja'tëtyës maas ja nnaaxjotëtyën.

²⁰ E yë Sihón ka'ap ojts t'a'ixë naxtëtyës nyaaxjotm, ni'ikyë ojts ja tsyiptuunpë twinwoowmujkta'ay ets jam xytyu'u'ëtujktës Jahas ets xynyipëtë'ktës.

²¹ E yë Wintsën mëti'ipë yë Israel ja'ayëty Tyios'ajtëpën, yë'ë ojts xypyutëkëtës ets xyajmëtaktës, ojtsës ja Sihón nyajtëkoytyë ets ja tsyiptuunpëtëjk; ko jyëtu'un'ajty ënät ja Amor ja'ayëty ojts ja nyaax kyajpn niwa'ktaayëtës.

²² Ojts ja nyaax niwa'këtës jampë tsyo'ontä'äkyën ma ja Arnón mëjnëëjën ets jyä'ty Jaboc ets tso'ontä'äky jam wiinkpë të'ëts'itjotm ets tyimja'ty ma Jordán y'itjotmën.

²³ ¿E tyam mijts ënät xypyëjkëjantëpës ja naaxwiinyëtë mëti'ipë yë Amor ja'ayëty ojts yë Tios pyëjkxëtën etsës të xymyo'otësë?

²⁴ Yë Quemós mëti'ipë mTios'ajtypyën, ko tii mo'oyë, mijts mjä'äniwäämpy yë'ë: ¿Këtiijë? E näjyëtu'untsën ëëtsëty Tiosës ya'atë naaxwiinyëtë të xymyo'otë, paatyës njä'äniwa'antë.

²⁵ ¿Ëkë wi'ixën mijts mnäypyëjktä'äkyë jaakwäänë mëj'äämpy ni'ikë, këtiinëm jyëtu'unëty yë Balac, yë myaank yë Zipor, jampë yajkutukyën Moab? Yë'ë ka'ap yam maa mëët ntsippaatës.

²⁶ Ix jënu'un këjää të nyëjkxnë jëmëjt, tëkëëk mëko'px jëmëjt ma ëëts yaa ntsëënëtën yaa Hesbón, Aroer ets ma mutskëtypë kajpn ets ma ja kajpnën jampë yajpaatën pë'am ma Arnón mëjnëëjën; ¿Wi'ix ko ënätyë të xykyapaye'eytyë pën miitstën yë mjä'äjëty?

²⁷ Ëjts ka'ap mijts maa nmëtëkoy. Mijts jëtu'un kë'ëm mtëkoopy koos ëëts nëkoo xymyëmayëtë ets xynyipëtë'ëktës maas yaa ntsëënëtë njuuky'atën. E yë Wintsën yë'ë nyija'ap wi'ix tyaj'oyën ya'atë amay jotmay ma Israel ja'ayëty ets Amón ja'ayëty. Yë'ë nyija'ap pën yë poky myëët'ajtyp.

²⁸ E ja Jefté oy ojts ja aaw ayuk tjakexy, ja yajkutujkpë mëti'ipë jam ënä'ämpën ma Amón ja'ayëtyën ka'ap tja'akyujkëy ets ka'ap timtyuunyë këwentë.

Mëti'ipë ja Jefté wyinwa'anëyën

²⁹ Ënät ojts ja Jefté ja Wintsën ja myëk'ajtën tyuktëkëty ets tsyo'ony, nyijkxy jam Galaad ets jam Manasés, tukye'eyëtyääy yë Mizpá itjot, mëti'ipë yë Galaad nyitënääpyën ets jëtu'un tuknipëjktakëy wi'ix tnitëkëja'anyën ja Amón ja'ayëty ma ja nyaax kyajpnëtyën.

³⁰ Ënät ja Jefté ojts tu'uk yë waantakën tuny ma Tiosën ets t'ënëmaay: Pën mijts xyajmëtakpës,

³¹ yë'ë nëjkx ntukwintsë'ëkë no'oky xämy mëti'ipë ënäty pëtsëëmpën mëjëyëjp maas yë njëën ntëjkën koos nwinpitëty tsiptuunpë.

³² Jefté ojts nitëjkëtyä'äy yë Amón ja'ayëty yë nyaax kyajpnëty ets myëtäky, yë'ë ojts yë Wintsën pyutëkëty.

³³ Jefté may ojts yë myëtsip tyaj'ooky, i'px ja kajpn tniwä'ky, yë Aroer, Minit ets Abel-queramim, jëtu'un tëkëëk yajnikäjpxy. Jëtu'un'äämpy yë Israel ja'ayëty ojts jam yë'ë y'ënä'ämtë ma Amón ja'ayëtyën.

³⁴ Ko yë Jefté wyimpijty ets jyä'äjty ma tyëjkën jam Mizpá, ënät ja nyëëx tu'kpajkpë pyëtsiimy pëyi'ikyë äjtspë mëët yë panderë. Yi'iyë ijty tu'uk nyëëx'ajtyp ka'ap wiinkpë y'ëna'k

³⁵ Ko jëtu'un t'ijxy ënät ojts yë wyit amëjaaw tnënuky ets tkë'ëtswä'kxy mëët ko janty mëk tja'awëy ko jä'ä ja nyëëx pyëtsiimy äjtspë ets t'ënëmaay: U'unk maay janty o'ktëyës näjyawëty. Mijtsës ënät tyam ëxëëk xyajjajtp xyajkëpäjtp. Tëës yë waantakën tu'uk ntuny ma Wintsën e kopkpëky koos ënät nmo'ojëty mëti'ipës të ntukwinwanën.

³⁶ Tä ja nyëëx y'ëtsooy: Tatë, ëjts tyaajës nyajpaaty. Ix tii mtunäämpy mëët ëjts, mëti'ipë Tios të xytyukwinwanën, yë'ë tëë yë y'ayuk tpatuny ix tëë myajmëtä'äkyë tsipjotm ma Amón ja'ayëty ma mëët yë tsip të yajmëët'atyën.

³⁷ E mijts yë'ë yam tu'uk yë mëyajtën npëjktsoopy etsës xymyo'ojëty yë xëëw mäjtsk po'o, wä'änës nëjkx mëët yë nmëto'oxy ëna'k n'ëkjë'ëy n'ëkyä'äxy jam kopkëjxm mëët koos ëjts n'ooka'any maas ka'ap të npëky të n'uukyën.

³⁸ Ënät yë Jefté ojts tjanty mye'ey yë xëëw mäjtsk po'o, jam ojts nyëjkxtë kopkëjxm mëët yë myëto'oxy'ëna'k, jam jyiiytyë yaxtë mëët ko ënäty y'ooka'any ets ka'ap pyikynyëm.

³⁹ Ko nyäxy ja xëëw mäjtsk po'o, ënät ojts jatëkok wyimpijnë ma ja tyeety yajpaatyën ets jëtu'un ja Jefté ojts tyaj'ëtuky ja wyaantakën mëti'ipë ënäty të tunyën ma Tiosën. Yë Jefté yë nyëëx wa'ats y'o'ky, ni pën ye'etyëjk ojts mëët kyatsëënë.

⁴⁰ Paaty jam ma Israel kajpnën, yë to'oxy'ëna'këty xëmë jam kopkëjxm nyëjkxtë taxk xëëw, mëët ko ja ja'amyäjtsën tuntë wi'ix ja Jefté ja nyëëx ojts tyäkyën ma Tiosën.