Juan 9 - Biblia Mixe de Quetzaltepec

Ko ja Jesús tyaj'ijxë'ëky mëti'ipë wiints mëxu'unk'ajtën

¹ Najxp ënäty ja Jesús ko t'ijxpaty tu'uk ja ye'etyëjk mëti'ipë wiints mëxu'unk'ajtën.

² Ets ja y'ijxpëjkpëtëjk yajtëëwëtë: Wintsën, ¿tii ko ya'atë ye'etyëjk ojts myëxu'unk'aty wiints? ¿Tyaak tyeety jëtää poky myëët'ajtyp ëkë kyë'ëmpoky jëtu'un kyujajtëpë?

³ Ënät ja Jesús y'ëtsoowëtë: Ni kyë'ëmpoky ets ni tyaak tyeety jëtu'un yë pyoky tkakujajtëyë. Yë'ëkyëjxm jëtu'un yajpaaty ets yaj'ix yajnijawëty pën mëpaat Tios myäyë yajtso'okëtëty.

⁴ Ma tyam jyaakxënyëmëty, kopkpëky ko ntu'unmëty ja tyuunk mëti'ipës të xykexyën. Miimp ja kootsajtën ma ka'ap t'ëkjëkyäpnëtyën ets pën tyunëty.

⁵ Maas njaakyajpaatynyëm naaxwiiny, ëjts jëtu'un ijtp ijxtëm ja kutë'kxnën.

⁶ Ko jëtu'un ojts y'ënä'äny ënät ojts nyajtstsujë naaxkëjxy ets ja mo'onts wäänë tyaj'o'ky ets ja wiints tukwinkuja'axëy.

⁷ Tä t'ënëmaay: Nëjkx jam mwinpujy ma ja Siloé nëëjën. Jä'ä nyiwijy Kexyye'epyë. Tääts ja wiints ojts nyijkx winpujpë. Ko wyiinpujtaay, ënätyë y'ijxë'ky.

⁸ Ja myëjëën myëtëjk ets mëti'ipë ënäty të t'ixtën ko t'amëtoy ja ayajk ako'onën, jä'ä näyajtëëwëtë: ¿Këtiijën yë'ëjëty ya'atë ja'ay mëti'ipë ijty ja ayajk ako'onën y'amëtoopyënë?

⁹ Jënaakën y'ëna'antë: Jä'ä yë'ë. Wiinkpë y'ëna'antë: Ka'ap jyä'äjëty, oy jëtu'un jyakëxë'ëky. E yë'ë jëtu'un kë'ëm y'ënä'äny: Ëjts jëtu'un.

¹⁰ Ënät tyajtëëwtë: ¿Wi'ix tyam m'ijxnë?

¹¹ Ets ja ja'ay wiintspë y'ëtsoowëtë: Ja ye'etyëjk mëti'ipë Jesús'ajtpën, yë'ëjës mo'onts të xytyukwinkupëkë, je'eyë wäänë të tyaj'ooky mëët yë tsyujy ets nwiinës të tukkuutsy ets të xynyëëmës: Nëjkx mwinpujy ma ja Siloé nëëjën. Jamës të nnëjkxy ets koos të nwinpujta'ay, täätsës të n'ijxë'ëky.

¹² Ënät yajtëëwëtë: ¿Maatsën tääpë ja'ay ënät? Ets yë'ë y'ëtsooy: Ka'apës nijawë.

Ko ja fariseë ja'ayëty tyajtëwtë wi'ix ojts tsyo'okyën mëti'ipë ijty wiintsën

¹³ Po'kxënxëëw ënäty ko ja Jesús ojts tyaj'ooky wäänë ja mo'onts ets ja ja'ay wiintspë tyaj'ijxë'ky.

¹⁴ Paaty ojts twoownëjkxtë ja ye'etyëjk mëti'ipë ijty wiintsën ma ja fariseë ja'ayëtyën,

¹⁵ ets ja fariseë ja'ayëty tyajtëëwtë wi'ix ënäty të y'ijxë'ëky ets y'ëtsoowëtë: Mo'ontsës të xytyukwinjaaxë, täätsës të nwinpujy etsës të n'ijxë'ëky.

¹⁶ Ënät jënaakën ja fariseë ja'ayëty y'ënantë: Ja ja'ay mëti'ipë ya'atë tyuunpyën ka'ap yë'ëjëty Tios yajtunyë, jä'ä ko ka'ap yë po'kxënxëëw t'ëmaay'äty. Ets ja wiinkpë y'ënantë: ¿Wi'ix jëtää mëj'ajtën tunëty pën pokyjyä'äy? Tääts ojts nyäpyëjkwa'kxëtë xim yam.

¹⁷ Ënät ojts jatëkok tyajtëëwkojnëtëpë mëti'ipë ënäty wiints të yajpaatyën: E mijts, ¿wi'ix m'ëna'any, pën yë'ë mëti'ipë të myaj'ijxë'ëkyën? Ets ja ye'etyëjk y'ënäny: Jëtu'unës n'ëna'any ko Tios yë kyäjpxynyajxpë.

¹⁸ E ja jutiis ja'ayëty ka'ap ojts tmëpëktë ko ja ye'etyëjk ijty wyiintsëty ets ko të y'ijxë'ëky. Ënätnëm tmëpëjktë ko ja tyaak tyeety ojts twowtë,

¹⁹ ets tyajtëwtë: ¿Mijts ya'atë mmaankë? ¿Wiints yë'ë ojts jyänty myëxu'unk'atyë? ¿Wi'ix tyam y'ijxnë?

²⁰ Ënät ja u'unktaak u'unkteety y'ëtsoowtë: Nnija'awëtëpës ya'atë n'u'unk ko wiints ojts myëxu'unk'aty.

²¹ Ni ëëts nkanijawëtë wi'ix tëy tyam y'ijxnë ets ni ëëts nkanijawëtë pën të yaj'ijxë'ëkyë. Yajtëwtë yë'ë kë'ëm. Mëj ëna'k yë'ënë. Wä'än kë'ëm nikäjpxy.

²² Jëtu'un ja tyaak tyeety ojts y'ëna'antë jä'ä ko tsyë'ëkëtë, tëë ënäty ja jutiis ja'ayëty tkäjpxy'atë ko ka'ap tkupëka'antë jap tsajptëkoty tu'kë'ëyë mëti'ipë ënantëpën ko Jesús yë'ë Kristë.

²³ Paaty ja tyaak tyeety y'ënantë: Yajtëwtë kë'ëm. Mëj ëna'k yë'ënë. Wä'än kë'ëm nikäjpxy.

²⁴ Ojts ja jutiis ja'ayëty jatëkok twowtë ja mëti'ipë ënäty wiints të y'ityën ets t'ënëmaaytyë: Tuk'ëwa'anëtëkës ja tëyajtën ma Tiosën, ëëtsëty nija'awëtëp ko ya'atë ja'ay pokyjyä'äy yë'ë.

²⁵ Ënät ja ye'etyëjk y'ëtsooy: Ëjts, ka'apës nijawë pën pokyjyä'äy ëkë kapokyjyä'äy, yi'iyës nija'ap ko wiintsës të n'ity e ijxnëpës tyamnë.

²⁶ Ets ojts tyajtëëwkojnëtëpë: ¿Wi'ix mtuunë, wi'ix ojts myaj'ijxë'ëkyë?

²⁷ Ets ja ye'etyëjk y'ëtsooy: Tëë miits njatuk'ëwaanëtë ets ka'ap xymyëpëktë. ¿Tii ko xyajtëwtë etsës nnikajpxwinpit nikajpx'atëjëty? ¿Yë'ë ko jëtää miits näjyëtu'un xypyanëjkxa'antë?

²⁸ Tääts ojts t'ojtë mëti'ipë ijty wiintsën: Jä'ä ko mijts ya'atë ja'ay mpanëjkxyp; e ëëtsëty Moisés npanëjkxtëpës.

²⁹ Nnija'awëptëpës ko Tios ojts myëkäjpxyë ja Moisés; e tääpë ja'ay ka'apës nijawëtë maa tsyoony.

³⁰ Ënät y'ëtsooy mëti'ipë ënäty wiints të y'ityën: Ka'apës nja'akyukë ko jëtu'un m'ëna'antë, ko miits ka'ap xynyijawëtë maa tsyoonyën e ëjts nija'apës ko yë'ëjës të xyaj'ijxë'ëky.

³¹ Wa'ats ëëts nnija'awëmë ko yë Tios ka'ap tmëtoow'ity yë pokyjyä'äy, yë'ë y'amëtoow'ijtyp mëti'ipë wintsë'këyëpën ets mëti'ipë tyuuntëpën mëti'ipë yë'ë tsyojkpyën.

³² Nimaa kyayajmëtoy'äty ja'ay y'ijxë'ëky mëti'ipë tëë myëxu'unk'atyën wiints.

³³ Ko jeexyë ya'atë ye'etyëjk kyatsoony ma Tiosën, ka'ap jeexyë tjëkyepy tii tunëty.

³⁴ Ënät t'ënëmaaytyë: Mijts pokyjoty të mëxu'unk'aty, ¿ka'ap tjëkyepy xyaj'ijxpëktëtyës? Ets t'ixkäjxtë jap tsajptëkoty.

Pën jëtu'un yajpatp ijxtëm ja ja'ay wiintspën

³⁵ Ojts ja Jesús tnijawë ko ënäty ja wiints të t'ixkäxtë jap tsajptëkoty; ko tpaty, ënät tyajtëëy: ¿Mmëpëjkpy mijts ja naaxwiinyëtë ja'ay ja y'U'unkë?

³⁶ Tääts y'ëtsooy mëti'ipë ënäty wiints të y'ityën: Wintsën, tuk'ëwa'anëkës pën yë'ë etsës nmëpëkëty.

³⁷ Ënät ja Jesús y'ëtsoowë: Tëë tyam xy'ixy. Ëjts jëtu'un mëti'ipë mmëmëtyakëpën.

³⁸ Ënät ja ye'etyëjk y'ënëmaayë: Wintsën, nmëpëjkpy mijts.

³⁹ Tääts ja Jesús y'ënëmaayë: Yë'ëjës të niminy naaxwiinyëtë etsës ja ja'ay mëtëy nipaye'eyëty; nyaj'ijxpëka'anyës mëti'ipë wiintsën ets nyajwiintsëja'anyës mëti'ipë ijxtëpën.

⁴⁰ Ko jëtu'un tmëtoowtë; jënaakën ja fariseë ja'ayëty mëti'ipë ënäty japëtyën tyajtëëwtë ja Jesús: ¿Wä'än jëtää ëëts näjyëtu'un nwiints'atë?

⁴¹ Ets ja Jesús y'ëtsooy: Ko jeexyë miits mwiints'atë, ka'ap jeexyë miits myajpoky'ixtë. Yë'ë ko m'ëna'antë ko m'ixtë paaty myajpoky'ixtë.