Juan 8 - Biblia Mixe de Quetzaltepec

¹ Ënät ja Jesús ojts nyijkx jam ma Olivo kopkën,

² ets ko xyiinytyäky, tää ojts nyijkx ma ja mëjtsajptëjkën. Ënät ja ja'ay tyukye'eymyujkë ets nyaaxwe'tsy ets yaj'ijxpëjktso'ony.

³ Ja tsajptëkotyëtë yaj'ijxpëjkpëtëjk ets ja fariseë ja'ayëty ojts tyajnëjkxtë tu'uk ja to'oxytyëjk mëti'ipë ënäty të tkupaatëtën ko ye'etyëjk tmëëtëty mëti'ipë ka'ap tpëkyëtyën ets ojts tpëjkta'aktë mayjyä'äyjoty.

⁴ Ënät t'ënëmaaytyë ja Jesús: Wintsën, ya'atë to'oxytyëjk tëëjës nkupaatëtë mëët yë ye'etyëjk mëti'ipë ka'ap tpëkyëtyën.

⁵ Jëtu'un ja Moisés ja y'ënä'ämën y'ënä'äny ko yajkuka'atsëty jëtu'unpë to'oxytyëjk. ¿Wi'ix mijts m'ënaanpë?

⁶ Jëtu'un ojts tyajtëwtë yë'ë y'ëk'ixantëp wi'ix ja Jesús y'ëtsoy, ko kyajpxtëkoyëty tääts ni'ëënëja'antë. Ja Jesús ojts wyintä'äky ets jyääy naaxkëjxy mëët ja kyë'ëwa'axy.

⁷ Ko ënäty tyajtëëw'ëtë'ëtstë ets ojts ja Jesús kyoowkukë ets y'ënëmaayëtë: Pën jää miitsëty mëti'ipë ka'ap tii poky tmëëtëtyën, wä'än yë'ë jëyëjp ja tsaa tka'atsë'ëky.

⁸ Tääts ojts jatëkok wyintä'äky ets jyääykyojnëpë naaxkëjxy.

⁹ Ko jëtu'un tmëtoowtë ets tsyo'ontë wintu'uk patu'uk, jëwyiin tsyo'ontë ja mëjja'aytyëjk. Ko ja Jesús ojts wyi'imy nätyu'uk mëët ja to'oxytyëjk mëti'ipë jam wintënaayëpën,

¹⁰ ko kyoowkujkëy ënät t'ijxy ko ka'ap maa ja ja'ayëtynyë, yi'iyë ja to'oxytyëjk jam nätyu'uk, ets t'ënëmaay: To'oxytyëjk, ¿maa ja ja'ayëty mëti'ipë mni'ë'ënëyëpën? ¿Këtii jëtu'un y'ëna'antë ko m'ookëtyë?

¹¹ Tääts ja to'oxytyëjk y'ëtsooy: Ka'ap maa pën, Wintsën. Ënät ja Jesús y'ënëmaayë: Ni ëjts mijts nkani'ënä'ämëty ets m'ookëty, nëjkx ets ka'ap m'ëk pokytyuunëty.

Jesús kujaj kutë'kxpë yaa naaxwiiny

¹² Ko ja Jesús ojts jatëkok tmëkäjpxy ja mayjyä'äy, ënät y'ënëmaayëtë: Ëjts kujajp kutë'kxp ma ja naaxwiinyëtën; pën xypyamiinpës, pyaatëp ja të'kxën jajën mëti'ipë yajjuuky'ajtpën ets ka'ap nijëna'a y'ëkyajpatnëty akootstuuy.

¹³ Ja fariseë ja'ayëty jëtu'un t'ënëmaaytyë: Kë'ëm mijts mnänyimëtyä'äkyë; tääpë mëtyä'äky ka'ap tyuny.

¹⁴ Tä ja Jesús y'ëtsooy: Oyës kë'ëm nänyimëtyä'äkyë, tsoowpatp yë'ë, jä'ä ko nija'apës tiis nkäjpxyp; nija'apës maas ntsoony ets maas nnëjkxyën e miitsëty ka'ap xynyijawëtë.

¹⁵ Jëtu'un miits winë xypyaye'eytyë ijxtëm tii kyëxë'ëkyën. Ëjts ka'apës pën npaye'ey.

¹⁶ E koos ja'ay npaye'eyëty, tëyajtën mëët npaye'eyëtyës, jä'ä ko ka'apës nätyu'uk tii npaye'ey, Tios Teetyës mëët npaye'ey, mëti'ipës të xykyexyën.

¹⁷ Jëtu'un jap y'ënä'äny ma miits ja m'ënä'ämënëty; ko nimäjtsk ja ja'ay tii nikajpxtë mëti'ipë nyija'awëtëpën tuunp jä'ä ets tsoowpatp.

¹⁸ E oy y'ëkjëtunëty, ëjts, kë'ëmës nänyikäjpxyë ets oyës nänyikäjpxyë e ja nTeetyës mëti'ipës të xykyejxyën nän oyës xynyikäjpxy.

¹⁹ Ets tyajtëëwtë: ¿Maaxë ja mteety? Ets ja Jesús y'ëtsoowëtë: Ka'ap miits xy'ixy'atës, nän ka'ap ja nteetyës xy'ixy'ajtëtë; ko jeexyë xy'ëk'ixy'atës, m'ixy'ajtëp jeexyë näjyëtu'un ja nTeetyës.

²⁰ Jëtu'un ja Jesús y'ënäny tam ënäty yaj'ixpëky ma ja mëjtsajptëjkën ma ja ayajk ako'onën meeny nyipetyën. E ni pën ojts kyamatsyë, jä'ä ko ka'anëm ënäty ja nyixëëw tpaatynyëm.

Maas nnëjkxyën, ka'ap tjëkyepy jam mnëjkxtëty

²¹ Ënät ja Jesús t'ënëmaaykyojnëpë ja mayjyä'äy: Nëjkxpës ets miits xy'ixta'aja'antës, je'eyëp ko mku'ookëjantëp miits ja mpokyëty. Maas nnëjkxyën, ka'ap tjëkyepy jam mnëjkxtëty.

²² Tääts ja jutiis ja'ayëty y'ënantë: ¿Wä'än jëtää nyäyaj'ooka'anyë, paaty jëtu'un y'ënä'äny ko ka'ap tjëkyepy jam nëjkxmëty ma nyijkxyënë?

²³ Tä ja Jesús y'ënëmaayëtë: Miitsëty, yaa naaxwiiny mmintë mkä'äxtë; e ëjts tsajpjotmës ntsoony. Naaxwiinyëtë ja'ay miitsëty; e ëjts ka'apës naaxwiinyëtë ja'ayëty.

²⁴ Paaty miits nëëmëtë ko mku'ookëjantëp ja mpokyëty; jä'ä ko, pën ka'ap miits xymyëpëktës, më'ookëjantëp ja mpokyëty.

²⁵ Ënät tyajtëëwtë: ¿Pën mijts? Ets ja Jesús y'ëtsoowëtë: Miitsëty ka'ap xyjyä'äkyukëtë mëti'ipë yam njatukmëmëtyaktëpën, nëkoopë njaakmëëtmëtya'aktëty.

²⁶ Mayës ja winma'any nmëët'aty mëti'ipës nnikajpxäämpyën ets ntukpaye'eytyëty. Mëti'ipës xykyäjxpën mëtëy të y'ënä'äny; paaty mëti'ipës nimëtyäkpyën ma ja ja'ayëtyën nän yë'ë mëti'ipës të nmëtoyën maas ja nteetyën.

²⁷ Ka'ap ja ja'ay tja'akyujkëtyë ko ja Jesús tjanikäjpxy ja Tios Teety,

²⁸ Paaty ojts y'ënë'ëmxëtë: Ko ënäty miits xypyëjkta'aktëty këjxm ja naaxwiinyëtë ja'ay ja y'U'unk, jäänëm xynyijawëtëty pën ëjts, ets ko ka'apës ja nkë'ëm winma'anyëty nyajtuny; yi'iyës ntuunpy mëti'ipës ja Tios Teety të xytyuk'ijxpëkyën.

²⁹ Mëti'ipës xykyäjxpën, mëëtës n'ity; nijëna'ajës nätyu'uk xykya'ëxmatsy, jä'ä ko yë'ëjës xëmë ntuunpy mëti'ipë tyukjotkëtäkpyën.

³⁰ Ko ja Jesús ojts jëtu'un y'ënä'äny, may ja ja'ay ojts myëpëktë.

Ja Tios ja y'u'unk y'ëna'k ets ja poky mëti'ipë nätyuktëytyuunëtëpën

³¹ Tääts ja Jesús y'ënëmaayëtë ja jutiis ja'ayëty mëti'ipë ënäty të myëpëktën: Pën miitsëty mpatuuntëp ja n'aaw n'ayukës, ënät n'ijxpëjkpë'atëty;

³² ets xynyijawëtëty ja tëypyë jaantypë ets ëwaatsëtum myajpaatëty.

³³ Tääts ja jutiis ja'ayëty y'ëtsoowtë: Abrahamës nteety'ajt n'ap'ajtëp, ka'apës pën të xyajtuntë juy tooky. ¿E wi'ix ko mijts m'ëna'any koos ëwaatsëtum xypyëjkta'aka'antë?

³⁴ Tä ja Jesús y'ënëmaayëtë: Tëy miits nëëmëtë, ni'ëmukë mëti'ipë pokytyuuntëpën, jëtu'un ja poky yaj'itëtë ijxtëm jeexyë myëtuunpë'atën nitooky.

³⁵ Tu'uk ja mëtuunpë nitookpyë ka'ap xëmë y'ity ma ja jëën tëjkën; ja wintsën ja y'u'unk y'ëna'k yë'ë xëmë ijtëp ma jëën tëjkën.

³⁶ Pën ja Tios U'unk, myaj'ëwaatsëpëtsëëmëtëp, ënät miits ëwaatsëtum m'ittëty.

³⁷ Nnija'apës ko Abraham xy'ap'at xy'ok'atë; je'eyëp ko xyaj'ookantëpës miitsëty, jä'ä ko ka'ap ja n'aaw n'ayukës xykyupëjkëtë.

³⁸ Yë'ëjës nkäjpxyp mëti'ipës ja nteety të xytyuk'ixyën, näjyëtu'un miitsëty nän yë'ë tuntë mëti'ipë ja nteetyës të mtuk'ëwaanëtën.

³⁹ E ja jutiis ja'ayëty jëtu'un y'ëtsoowtë: Abraham ëëts nteety'ajt n'ap'ajtëp. Tääts ja Jesús y'ëtsoowëtë: Ko jeexyë miits ja Abraham xy'ap'at xytyeety'atë, yë'ë jeexyë mtuuntëp mëti'ipë yë'ë tyuunën.

⁴⁰ Oy miitsëty tëë njatuk'ëwaanëtë ja mëtëypyë mëti'ipës ja Tios të xytyukmëtoyën, xyaj'ookantëpës miitsëty. Abraham kä'äp ojts jëtu'un y'ëti'itsy.

⁴¹ Näy yë'ë miits mtuuntëp mëti'ipë ja mteety tyuuntëpën. Tääts ja jutiis ja'ayëty y'ëtsoowtë: Ka'apës kyanaak'atë yë nteetyëty, Tiosës tu'ukyë nteety'ajtëp.

⁴² Ënät ja Jesús y'ëtsoowëtë: Ko jeexyë miits ja Tios xytyeety'atë, xytsyojktëpës jeexyë, jä'ä ko jamës ntsoony ma ja Tiosën ets tyaajës nyajpaaty. Ka'apës nkë'ëmwinma'any të nyajtuny koos yaa të nminy, Tiosës të xykyexy.

⁴³ ¿Tii ko ka'ap miits xyjyä'äkyukëtë yë n'aaw n'ayukës? Yë'ë ko miits ka'ap xymyëtowtë mëti'ipës njakäjpxypën.

⁴⁴ Ja mëjku'u miits mteety'ajtëp, yë'ë miits mtuuntëp mëti'ipë yë'ë tsyojkpyën. Tëëyëp yë mëjku'u tyajtso'ontä'äky ko je'eyë yajja'ay'ooky. Nijëna'a tëypyë jaantypë tkatuny ets nijëna'a mëtëypyë tkakäjpxy. Ko wyin'ëëny, kyë'ëm jä'ä kyäjpxyp, jä'ä ko win'ë'ënpë yë'ë ets yë'ë yajtso'ontak ja win'ë'ënën.

⁴⁵ E ëjts, jä'ä ko tëyës nmëtyä'äky paaty ka'ap xymyëpëktës.

⁴⁶ ¿Pën nyikajpxäämpy koos pokymyëëtës? E pën jaantyës nmëtyä'äky, ¿tii ko xykyamëpëktë?

⁴⁷ Pën ja Tios ja'ay'ajtëp, y'amëtoow'ijtyp mëti'ipë ja Tios kyäjpxypën; miitsëty ka'ap yë Tios mja'ay'atëtë paaty ka'ap xymyëtoow'itë mëti'ipës nkäjpxypën.

Taayëm yë Kristë këtiinëm ja Abraham

⁴⁸ Ënät ja jutiis ja'ayëty t'ënëmaaytyë ja Jesús: Tëyës n'ëna'antë ko mijts msamaariëtë ja'ay ets ko mijts ku'oypyë mmëët'ajtyp.

⁴⁹ Ënät ja Jesús ojts y'ëtsoy: Ka'apës ku'oypyë nmëëtëty. Ëjts nteetyës nyajmëjnajxyp; e miitsëty ëxëëkjatyës xytyijtë.

⁵⁰ Ka'apës yë'ëjëty n'ixta'ay wi'ixës yë ja'ay xymyëjjawëtyën; tää mëti'ipë jëtu'unpë y'ixtääpyën ets yi'iyë y'ijxyp tyuunpy tii oy yajtuunp kayajtuump.

⁵¹ Tëy miits nëëmëtë, pën ja n'aaw n'ayukës pyatuunpyën, nijëna'a kya'ookëty.

⁵² Ets ja jutiis ja'ayëty y'ëtsoowtë: Tyamës nnijawëtë ko mijts ku'oypyë mëët'ajtyp. Abraham ets tëkokyë käjpxynyajxpëtëjkëty ojts y'o'kta'atë e mijts jëtu'un m'ëna'any: Pën yë n'aaw n'ayukës pyatuunpyën, nijëna'a kya'ooka'any.

⁵³ ¿Wä'än jëtää mijts mjaaktimyëjëtyë këtiinëm ja n'ap n'okëtyës Abrahamë? O'k jä'ä ets näjyëtu'un ja Tios ja kyäjpxynyajxpëtëjk. ¿Pën mijts mtimnyäjya'awënë?

⁵⁴ Tääts ja Jesús y'ëtsoowëtë: Pën kë'ëmës nnämyëjjawëty, ka'ap maa tyuny. Ja nteetyës xymyëjja'ap, nän yë'ë mëti'ipë miits mtijtëpën ko xyTios'atë.

⁵⁵ E miitsëty ka'ap xy'ixy'atë. Ëjts, n'ixy'äjtypyës yë'ë; ets koos jeexyë n'ëna'any ko ka'ap n'ixy'ätyës, näjyëtu'un ënäty ëjts nwin'ëënyës ijxtëm miitsëtyën. E ëjts, n'ixy'äjtypyës yë'ë ets npatuumpyës yë y'aaw y'ayuk.

⁵⁶ Ja Abraham, mëti'ipë miits m'ap'ajt mteety'ajtëpën, ojts ja xyoontä'äky ko tnija'awëy koos nmina'any ets ko t'ijx akujk jotkujk ojts nyäjyawëty.

⁵⁷ Tääts ja jutiis ja'ayëty t'ënëmaaytyë ja Jesús: Ka'anëm ja mjëmëjt wyëxytyikxymyajkënëm, ¿ets m'ëna'any ko të xy'ixy ja Abrahankë?

⁵⁸ Ets ja Jesús tyaa y'ëtsoowëtë: Tëy miits nëëmëtë, naamka'anëm ja Abraham ënäty myëxu'unk'atynyëm, koos ëjts njääjëty.

⁵⁹ Ënät ja tsaa tkoonë'ktë ets tjaka'atsantë ja Jesús; je'eyëp ko näyu'tsë ënätyë ets pyëtsiimy ma ja mëjtsajptëjkën.