Juan 21 - Biblia Mixe de Quetzaltepec

Ko ja Jesús nyänyikëxë'ëkyë ma niwëxtujkpë yajpaatën ja y'ijxpëjkpëtëjk

¹ Ko jëtu'un tyuuntaay jyajtaayë, ënät ja Jesús ojts jatëkok nyänyikëxë'ëkyë ma ja y'ijxpëjkpëtëjkën jam Tiberias mejypyë'am. Jëtu'un ojts tyunyë jyätyë:

² Tam ënäty ja Simón Pedro mëët ja Tomás mëti'ipë yajtijpën xeeny u'unk ets ja Natanael mëti'ipë kukajpn'ajtpën Caná, Galilea y'itjotm. Näy tam ja Zebedeo myaank ets nimäjtskpë ja Jesús ja y'ijxpëjkpë.

³ Ënät ja Simón Pedro y'ënëmaayëtë: Ajkxmajtspës nnëjkxytë. Ets y'ëtsoowtë: Oy nja'amëty. Ënät ojts nyëjkxtë ets tu'uk ja kepy nëëwinye'epyë tuktëjkëtyë ets ojts nyëjkxtë. Jä'ä koots nitu'uk ja ajkx tkamajtstë.

⁴ Ko xyiinytyaknë, tam ja Jesús ënäty tyänë mejypyë'am, je'eyëp ko ja y'ijxpëjkpëtëjk ka'ap tnijawëtë ko jyä'äjëty.

⁵ Ënät ja Jesús yajtëëwëtë: Mexyëty, ¿ka'ap tii ajkx të xymyatstë? Ets y'ëtsoowtë: Ka'ap tii.

⁶ Tääts ja Jesús y'ënëmaayëtë: Nëëkujëpiptë yë mtsaay aka'anytsyow ets may nëë jëyujk xymyatstëty. Ënät nëëkujëpijptë ja tsyääyëty, may ja ajkx tmajtstë, ka'ap y'ëkmaayënëtë tjuutëty, jä'ä ko nëkooyë ja nëë jëyujk myäy'ajnë

⁷ Ja ijxpëjkpë mëti'ipë Jesús ni'ik tyimtsojkpyën, jä'ä ojts t'ënëëmë ja Pedro: Wintsën yë'ë. Je'eyë ja Simón Pedro ojts tnamëtoy ko jyä'äjëty ja Wintsën, ënät ja wyit tuktëjkëy, jä'ä ko tëë ënäty ja wyit tjeny ko të nyëëtëkë.

⁸ Ets ja wiinkpë ja y'ijxpëjkpëtëjk jyajtë jam mejypyë'am yë'ë pyajëtujtëp ja tsaay ujts mëët ja ajkx, ja nëëpë'aaypyë jä'ä tmëjëkämëty mëko'px metrën.

⁹ Ko jyajtë jam nëëpë'am ënät t'ijxpatë ko tam ja jëën tyoy, ets ma ja jëënkopkën ajkx jam jëëntëtsp ets tsajpkääky jam këëp.

¹⁰ Ënät y'ënëmaayëtë ja Jesús: Yajmintë ajkx mëti'ipë të xymyatstën.

¹¹ Tääts ja Simón Pedro tyëjkëy kepy nëëwinye'epyëjoty ets twijtspëtsëëmy ja tsaay ujts mëët ja ajkx mëjëtypë. Mëko'px ja wëxtyikxy majktëkëëk ja ajkx y'ijty; ets oy ja ajkx jënu'un jyamayëty, kä'äp ojts ja tsaay kyiitsy.

¹² Ets ja Jesús y'ënëmaayëtë: Min m'ajop'atë. Ni pën ojts tkayajtëwtë pën jä'ä, jä'ä ko nyija'awëtëp ko yë'ëjëty ja Jesús.

¹³ Ënät ja Jesús myëwinkoonëtë ets ja tsajpkääky tkoonë'ky ets myooyëtë mëët ja ajkx.

¹⁴ Mëtëkëëk'ok ënäty ja Jesús nyänyikëxë'ëkyë ma ja y'ijxpëjkpëtëjkën maju'unëm jyuukpyikyën.

Ko Jesús mëët ja Simón Pedro myëtyä'äky

¹⁵ Ko y'ajop'ajtaaytyë ets ja Jesús tyajtëëy ja Simón Pedro: Simón, Juan yë myaank, ¿Xytsyojkpës mijts wäänë ni'ikë këtiinëm ya'atëtyë? Ets ja Pedro y'ëtsooy: Ntsojkpy mijts, Wintsën, mnija'ap mijts ko ntsoky. Ets ja Jesús y'ënëmaayë: Këwent'ajtëkës yë nkupixyny.

¹⁶ Ets ojts jatëkok yajtëëwkojënëpë: Simón, Juan yë myaank, ¿Xytsyojkpës mijts wäänëni'ik këtiinëm ya'atëtyë? Ets ja Pedro y'ëtsooy: Ntsojkpy mijts, Wintsën, mnija'ap mijts ko ntsoky. Ets ja Jesús y'ënëmaayë: Këwent'ajtëkës yë nkupixyny.

¹⁷ E mëtëkëëk ok yajtëëwkojënëpë: Simón, Juan yë myaank, ¿xytsyojkpësë? Ets ja Pedro jyotmaytyëjkëy ko mëtëkëëk ok yajtëyë pën tsyojkpy ets t'ëtsooy: Wintsën, mnija'ap mijts tu'kë'ëyë winë, mnija'ap mijts ko ntsoky. Ets ja Jesús y'ënëmaayë: Këwent'ajtëkës yë nkupixyny.

¹⁸ Tëy mijts t'ënëëmë, ko ijty m'ëna'k'aty, kë'ëm ijty mnäxyoxyë ko muum mnëjkxa'any; e ko nëjkx mmëjja'ayënë mxajwa'kxëp yë mkë'ë ets wiinkpë mxoxëtëty ets myajnëjkxëtëty ma ka'ap xytsyokyën.

¹⁹ Ko jëtu'un y'ënäny, ja Jesús yë'ë ojts tijy wi'ix ënäty ja Pedro y'ooka'anyën ets tyajknikëxë'ëkëty ja Tios ja myëj'ajt y'oyajtën. Ënät ja Jesús y'ënëmaayë: Pamiinkës.

Ijxpëjkpë mëti'ipë Jesús ni'ik tsyojkpyën

²⁰ Ko ja Pedro y'ijxwinpijty ets t'ijxy ko ja ijxpëjkpë ix'ok myiny mëti'ipë ja Jesús mëk tsyojkpyën, mëti'ipë ënäty të tyajtëyën ja Jesús ma jam y'a'ux'atën: Wintsën, ¿pën mkë'ëyakanëp?

²¹ Ko ja Pedro t'ijxy ets tyajtëëy ja Jesús: Wintsën e yë'ë, ¿wi'ix jyata'any?

²² Ënät ja Jesús y'ëtsoowë: Pën ntsojkpyës ets jyuuky'atëty jääpaat maajës ënäty nwinpityën, ¿ka'ap kyopkpëkyëty ets mijts xynyijawëty? mijts pamiinkës.

²³ Ets ja ayuk ojts ye'eywyä'kxy ma ja mëpëjkpëtëjkën ko ya'atë ijxpëjkpë ka'ap ënäty y'ooka'any. E ja Jesús ka'ap ënäty jëtu'un të y'ënä'äny ko ka'ap y'ooka'any: Jä'ä ënäty të y'ënä'äny: Pën ntsojkpyës ets jyuuky'atëty jääpaat maajës ënäty nwinpityën, ¿ka'ap kyopkpëkyëty ets mijts xynyijawëty?

²⁴ Ya'atë jëtu'un ja ijxpëjkpë mëti'ipë yam winë nyimëtyäkpyën, ets yë'ë të tkuja'ay. Ets nija'awëm ko tyiyëty mëti'ipë nyimëtyäkpyën.

²⁵ May ja Jesús ojts winë tjaaktuny mëti'ipë ka'ap kyëxja'ayëtyën ma ya'atë nokyën. Ko jeexyë të yajkujaaytyä'äy, ni kyanipaatë jeexyë ja naaxwiinyëtë mëët ja maynyoky mëti'ipë yajjääpyën.