Juan 14 - Biblia Mixe de Quetzaltepec

Jesús mëët npatmëty ja Tios Teety

¹ Këtii mjotmay'ooktëty, mëpëktë ja Tios Teety ets mëpëjktëk ëjts näjyëtu'un.

² Maas ja nteetyën, may ja tsënaaytyakn jap. Ko jeexyë kyajëtu'unëty, ka'ap jeexyë nëkoo yam jëtu'un nëëmëtë koos nëjkx nipëjktaakëja'any ja tsënaaytyakn ma m'itëtyën.

³ Ets koos nnëjkxëty ets nipëjktaakëja'anyës miits ja m'ijtaknëty, minaanpës jatëkok ets nyajtsoona'antë, jëtu'un miits nän jap myajpaatëty ma ëjtsën.

⁴ Mnija'awëtëp miits ja tu'u mëti'ipë ja'ajtpën maas nnëjkxyën.

⁵ Ënät ja Tomás t'ënëmaay ja Jesús: Wintsën, ka'apës nijawëtë maa mijts mnëjkxy, ¿Wi'ixës nnijawëty ja tu'u?

⁶ Ënät ja Jesús y'ëtsoowë: Ëjts jëtu'un tu'u'ajtp, ja tëyajtën ets ja juukyajtën. Ëjtskyëjxm je'eyë tjëkyepy pën jya'tëty ma ja Tios Teetyën.

⁷ Pën miitsëty xy'ixy'ajtëpës, m'ixy'atantëp näjyëtu'un ja nTeetyës; m'ixy'ajnëtëp tyamnë ets tääjën ja xy'ijxtë.

⁸ Ënät ja Felipe t'ënëmaay ja Jesús: Wintsën, tuk'ijxtëkës ja Tios Teety, ets jotkujk nwë'ëmtëtyës.

⁹ Ënät ja Jesús y'ëtsoowë: Felipe, tëë miits yaa jeky nmëët'atë, ¿ets ka'anëm xy'ixy'ätyësë? Pën të xy'ijxyës, tëëjën ja t'ixy ja Tios Teety. ¿E tii ko m'ëna'any ko ntuk'ixëty ja Tios Teety?

¹⁰ ¿Këtii xymyëpëky koos nyajpaaty mëët tu'ukyë ja Tios Teetyë ets ja Tios Teety mëët ëjtsë? ja mëti'ipë të ntukmëmëtya'aktën ka'ap kyë'ëm winma'anyëty të nnikäjpxyës. Ja Tios Teety mëti'ipë juukyajtpën ma ëjtsën, yë'ë kë'ëm winë të tuny.

¹¹ Mëpëjktëkës koos n'ëna'any koos n'ity tu'ukyë mëët ja Tios Teety ets ja Tios Teety y'ity tu'ukyë mëët ëjts; pën ka'ap, oy yi'iyë xymyëpëktëty mëti'ipës ntuunpyën.

¹² Tëy miits nëëmëtë, pën xymyëpëjkpës, tyunëp näjyëtu'un ja tuunk mëti'ipës ntuunpyën; ets tyunëp ja tuunk jaakmëjpë, yë'ë koos jap nnëjkxy ma ja Tios Teetyën.

¹³ Ets tu'kë'ëyë mëti'ipë miits m'amëtoowtëpën ëjts nxëëwkyëjxmës, ntunäämpyës, ets mëët ja Tios U'unk yaj'ixëty ja Tios Teety ja myëj'ajt jyääntyajtën.

¹⁴ Ntunëpës mëti'ipë m'amëtoowtëpën ëjtskyëjxm.

Ko ja Jesús nimëtyä'äky ko ja Kënu'kxymyëkajtën tkäxa'any

¹⁵ Pën xytsyojktëpës miits, mpatuntëp ja n'ënä'ämënës.

¹⁶ Ets n'amëtowëpës ja Tios Teety ets tkäxëty ma miitsëtyën ja wiinkpë ja nikajpxtutpë; jä'ä jëtu'un ja Kënu'kxymyëkajtën tëyajtënpë, xëmëpë yajpaata'anyën mëët miitsëty.

¹⁷ Mëti'ipë yi'iyë myëmaay myëtajtëpën ja naaxwiinypë ka'ap t'ëxajëja'antë, jä'ä ko ka'ap t'ixtë ets ka'ap t'ixy'atë; e miitsëty m'ixy'ajtëp, jä'ä ko yë'ë yajpaaty mëët miitsëty ets xëmë yajpaata'any ma miitsëtyën.

¹⁸ Ka'ap miits ku'ooky u'unkën nyajwë'ëma'antë; winpitaanpës jatëkok ets miits mëët nyajpaata'anyës.

¹⁹ Tim jawäänë jëtu'un, ets ka'ap nëjkx xy'ëk'ijxnëtës mëti'ipë yi'iyë naaxwiinypë myëmaay myëtajtëpën; e miitsëty nëjkxëpës xy'ixtë ets mjuuky'attëty jä'ä koos juuky'ajtpës.

²⁰ Jä'ä xëëw miits xynyijawëtëty koos n'ity tu'ukyë mëët ja nTeetyës, ets miits tu'ukyë m'itë mëët ëjts, ets ëjts tu'ukyës n'ity mëët miitsëty.

²¹ Pën kyupëjkpy ja n'ënä'ämënës ets pyatuumpy, yë'ë yajnikëxë'kpy koos xytsyoky, ets pën xytsyojkpës, tsokanëp ja nTeetyës ets ntsokäämpyës näjyëtu'un ets nnänyikëxë'ëkanëp ëjts ma yë'ëjën.

²² Ënät ja Judas, ka'ap jyä'äjëty ja Iscariote, tyajtëëy: Wintsën, ¿tii ko mnanyikëxë'ëka'anyë ma ëëtsëtyën ets ka'ap ma ja ja'ayëtyën ka'apë myëpëktën?

²³ Tä ja Jesús y'ëtsoowë: Pën xytsyojkpës, myëjpëjktäkpy ja n'aaw n'ayukës; ets tsokanëp ja nTeetyës, ets nTeetyës mëët nmina'anyës etsës nyajpaata'antë mëët yë'ë.

²⁴ Pën xykyatsojkpës, ka'ap tmëjpëjktä'äky ja n'aaw n'ayukës. Ja aaw ayuk mëti'ipë miits tyam mmëtoowtëpën, ka'ap y'ëjtsëty nkë'ëm'aaw nkë'ëm'ayuk, Tios Teety yë jyä'ä, mëti'ipës të xykyexyën.

²⁵ Tyam miits winë ntuk'ëwa'anëtya'atë naam tyaanëm nyajpaatyës mëët miitsëty;

²⁶ e ja nikajpxtutpë, ja Kënu'kxymyëkajtën mëti'ipë ja Tios Teety kyäxäämpyën ëjts nxëëwkyëjxmës, yë'ë mtuk'ëwaanëjanëtëp tu'kë'ëyë winë ets xyjyä'ämyätstëty wi'ixjaty miits të nëëmëtën.

²⁷ Tyam ntukmëwë'ëmtë ja jotkujk'ajtën. Nmooytyëp miits ja jotkujk'ajtën, je'eyëp ko ka'ap yë'ëjëty jëtu'unpë mëti'ipë yajktëpën yë naaxwiinyëtë ja'ay. Këtii mmaytyëty mtajtëty ets këtii mtsë'ëkëtëty.

²⁸ Tëë xymyëtowtë koos n'ëna'any koos nnëjkxy ets ko jatëkok nmina'anyës ets nyajpaata'anyës mëët miitsëty. Ko jeexyë miits xytsyoktës, mxoontaktëp jeexyë ko xynyijawëtë koos nnëjkxy ma ja Tios Teetyën, jä'ä ko Tios Teety wäänë mëj yë'ë këtiinëm ëjts.

²⁹ Paaty ya'atë ntuk'ëwaanëtë jëwyiin jëyëjp, jä'ä ko ënäty jëtu'un jyäty kyëpety, tääts nëjkx xymyëpëktë.

³⁰ Ka'apës nëkooyë n'ëkmëtya'akanë mëët miitsëty, jä'ä ko tää wyinkony mëti'ipë ënä'ämpën yaa naaxwiiny; oy tkamëët'aty nitii mëk'ajtën ma ëjtsën,

³¹ kopkpëky ko jëtu'un tyunëtëty jyatëtëty, ets tëkokyë ja'ay nija'awëtya'atëty koos yë'ëjës ntsojkpy yë Tios Teety ets koos yë'ë ntuny mëti'ipës të xytyuk'ëne'emyën. Pëtë'ëktë ets ja'amtë.