Josue 18 - Biblia Mixe de Quetzaltepec

Ja naaxwiinyëtë mëti'ipë wiinkëtypë ja Israel ja'ayëty ojts yajmo'otën

¹ Ja Israel ja'ayëty jam ojts jya'ajtmujkta'atë Siló ets jam tkoja'antë ja Wintsën ja wyittëjk ma mëët ja näpyaatë y'ityën. Ja naaxwiinyëtë jampë yajpaatyën oy ënäty të tjajä'äpëjkta'atë,

² tamnëm ënäty niwëxtujk ja Israel kajpn ka'apë nyaax yajmo'otënëm.

³ Ënät ja Josué t'ënëmaay ja Israel ja'ayëty: ¿Miitsëty tiijën m'ëwxijtëp ko ka'ap yë mnaaxëty xynyiwa'aktë mëti'ipë të mo'ojëtën yë Wintsën, mëti'ipë yë m'ap m'ok Tyios'ajtëpën?

⁴ Win'ixtë nitëkëëk yë ye'etyëjkëty ma tu'ukjaty yë Israel ja'ayëtyën, mëti'ipës nkäxtëpën ets nëjkx tukjëtitëtë yë it naaxwiinyëtë ets yë'ë xytyukmëmëtya'aktëtyës wi'ix mëpaat wyä'kxyën.

⁵ Ya'atë ja'ayëty nitëkëëkpë ënäty nkäjxtënës wëxtujkpëky nëjkx t'ijxwa'kxtë ja it naaxwiinyëtë, ëpëky ja Judá ja jyä'äy ja nyaaxëty mëti'ipë jam yajpatpën ëpa'tkë'ëmtsow ets ja José ja y'u'unk y'ok ja nyaaxjotëty jampë yajpaatyën anëkëjxmtsow.

⁶ E ko ënäty jëtu'un të tkijpxta'atë, täätsës yaa xytyuknimintëty ja aaw ayuk, etsës ja Wintsën ntuk'ëwaanëty ets yajpëjkwa'kxëty Tios wintum.

⁷ Yë Leví ja'ayëty ka'ap nëjkx yë nyaax yajmo'otë, jä'ä ko yë'ëjëty yë'ë nëjkx teety'ajtk tuntë ma wyintsën Tyiosëtyën. Yë Gad ets Rubén yë jyä'äyëty ets näjyëtu'un kujkwä'kxy ja Manasés ja jyä'äy tëë yë nyaax tpëjknëtë jam awinmtsow ma Jordán mëjnëëjën, mëti'ipë Moisés mooyëtën, ja Wintsën ja tyuunpë.

⁸ Ënät ja ja'ayëty ojts nyänyipëjktaakëtë mëti'ipë ja it naaxwiinyëtë y'ijxwa'kxantëpën ets ja Josué y'ënëmaayëtë: Nëjkx tukjëtitëtë tääpë it naaxwiinyëtë ets xykyijpxwa'kxta'atëty. Ko ënäty të xykyijpxta'atë tääts yaa mwinpijtkojnëtëty ets n'ijxmëty yaa Siló, Tios wintuuy, jënu'un ënäty pën tyuka'ayën.

⁹ Ënät tääpë ja'ayëty ojts tsyoontë ets tukjëtijtëtyääytyë ja it naaxwiinyëtë, wëxtujkpëky ojts tkijpxwa'kxtë ets aak nokyjoty tkëxjaaytyääytyë. Ko tkijpxtaaytyë tä ojts wyimpijtkojnëtë jam Siló ma ja Josué jamën.

¹⁰ Ënät ojts ja Josué tyajwä'kxy ja naaxwiinyëtë jam Siló ma ja Israel ja'ayëtyën, t'ijxpëtsëmtë mëët ja xyëëw pyo'o Tios wintum jënu'un tu'kpëky ja ja'ay pyäätyën.

Ja nyaax ja Benjamín ja jyä'äyëty

¹¹ Ko ojts yaj'ixtë mëti'ipë naax ënäty ja Benjamín ja jyä'äy të nyikääkëtën, ënät ojts yajnijawë ko yë'ë ojts tyuka'ajëtë ma ja Judá ets José tjä'ä'atën.

¹² Ja tsyëpa'anëty jam ojts tsyo'ontä'äky anëkëjxmtsow ma ja Jordán mëjnëë jyënäkyën ets jëtu'un tkunaxy yë Jericó y'itjot anëkëjxmtsow ets tyimnëjkxy, kyopktëkë jamtsow anajnytsyow ets pyëtsimy ma ja Bet-avén të'ëts'itjotmën.

¹³ E jam tsyoony wiinkpë mëti'ipë nëjkxpën ma ja it naaxwiinyëtë txëëwatyën Luz, yajtijp näjyëtu'un Betel ets ëpa'tkë'ëmtsow kyuye'eynyäxy ets jyëjptä'äky ma Atarot-adar y'itjotmën, jyä'ty jam ëpa'tkë'ëmtsow ma Bet-horón y'itjotmën.

¹⁴ Jamts jatëkok wyimpity ja tsëpa'an ets nyijkxy ma ja Mejyën Naax'akujkpyë, yë'ë pya'anajxyp ja kopk ëpa'tkë'ëytsyow mëti'ipë mëët nyäwyinku'ixëtyën yë Bet-horón ets jampaat jyä'ty Quiriat-Baal, mëti'ipë yajtijpën näjyëtu'un Quiriat-jearim ma Judá nyaaxjotën. Ya'atë ijty tsëpa'an'ajtp.

¹⁵ Ja tsëpa'an jampë ëpa'tkë'ëmtsow nyäxyën jam tsyo'ontä'äky Quiriat-jearim ets nyijkxy, anajnytsyow jyä'ty jam ma Neftóah nëëwookyën,

¹⁶ ets jam jyënajkë'ëky kopk'ëjxm mëti'ipë mëët nyäwyinku'ixëtyën ja Ben-hinom joyjyot, anëkëjxytsyow wyi'imy ma ja Refaim joyjyotmën. Jamts jatëkok jyënajkë'ëky ets jyëjptä'äky ma ja Hinom jyoyjyotmën; nyäxy jam ëpa'tkë'ëmtsow yä'äpwinm ma txëëwatyën Jebús ets tyimnëjkxy, jyä'ty ma tu'uk ja nëëwookyën jam En-roguel.

¹⁷ Jamts y'ëwtijtë'ëky ets pyëtsimy ma txëëwatyën En-semes, mëti'ipë tim nëjkxpën ets jyä'ty Guelilot, mëti'ipë mëët nyäwyinku'ixëtyën ja yä'äpwinmëtë mëti'ipë xyëëwajtypyën Adumim, jyëjptä'äky jyä'ty jam Bohan Ben-Rubén.

¹⁸ Jam nyajxë'ëky anëkëjxmtsow yä'äpwinm ma mëët nyäwyinku'ixëtyën ja joyjotm jampë yajpaatyën ma Jordán mëjnëëjën, anëkëjxytsyow ets tyimja'ty ma Jordán mëjnëëjën ëpa'tkë'ëmtsow,

¹⁹ nyijkxy jam anëkëjxmtsow ma txëëwatyën Bet-hoglá ets jyëjpkëxy jam anëkëjxmtsow ma ja naaxjëjpën kuwitsëpë, ma ja Ooky Myejyën, ma jam kyëtä'äkyën yë Jordán nëë. Ya'atë ënäty tsëpa'an'ajtp jampë yajpaatyën ëpa'tkë'ëmtsow.

²⁰ Ja Jordán nëë yë'ë ënäty tsëpa'an'ajtp ma ja a'oytsyowpë ja it naaxwiinyëtën. Ya'atë tsëpa'an'ajtp ma ja naaxën mëti'ipë ojts yajmo'otën ja Benjamín ja'ay nu'unjaty tyu'kukajpn'atën.

²¹ Ja kajpn mëti'ipë ojts tyuka'ajëtën ja Benjamín ja jyä'äy, yë'ë ojts y'itë: tu'kpëky ja Jericó ets Bet-hoglá, Émec-quesis,

²² Bet-arabá, Semaraim, Betel,

²³ Avim, Pará, Ofrá,

²⁴ Quefar-haamoni, Ofní, Gueba, jä'ä nyiwinë'atë ja kajpn majkmäjtsk, ëpëky ja mutskëtypë ja kajpn.

²⁵ Ëpëky ja kajpn mëti'ipë xyëëwajtëpën Gabaón, Ramá, Beerot,

²⁶ Mispá, Quefirá, Mosá,

²⁷ Réquem, Irpeel, Taralá,

²⁸ Selá, Élef, Jebús, yajtijp näjyëtu'un Jerusalén, Guibeá, ets Quiriat, jä'ä nyiwinë'atë majkmajkts mëët ja myutsk kajpnëty. Ya'atë jëtu'un ja it naaxwiinyëtë mëti'ipë ojts tyuka'ajëtën ja Benjamín ja jyä'äyëty.