Josue 13 - Biblia Mixe de Quetzaltepec

It naaxwiinyëtë mëti'ipë ojts jyaakwë'ëmtën

¹ Josué mëjja'ay ënätynyë ko ja Wintsën y'ënëmaayë: Mijts Josué tëë mmëjja'ayënë ets tää yë it naaxwiinyëtë mëti'ipë jaakwë'ëmpën ka'apë xynyiwa'aktënëm.

² E yë'ë jaakwë'ëmp yë filistejë ja'ayëty yë y'it nyaaxwiinyëtëty ets guesureos ja'ayëty,

³ mëti'ipë jam najxpën ma ja Sihor mëjnëë jyënäkyën, a'oytsyow ma Egiptë naaxwiinyëtë yajpaatyën, jyä'ty jam ma Ecrón ja tsyëpa'an nyäxyën, jam anëkëjxmtsow mëti'ipë yaj'antijpën ko Canaán ja'ayëty tjä'ä'atë; ma tääpë it naaxwiinyëtën nimëkoxk jam yajpaatë yë filistejë ja'ayëty yë wyintsëntëjkëty, jä'ä mëti'ipë jam yajpaatëpën Gaza, Asdod, Ascalón, Gad ets jam Ecrón. Jaakwë'ëmp näjyëtu'un ja itjot mëti'ipë nyitënaaytyëpën ja Avejë ja'ayëty,

⁴ jampë yajpaatën apa'tkë'ëmtsow ma ja y'it nyaaxwiinyëtën ja Canaán ja'ayëty mëti'ipë jam tso'ontakpën ma yajpaatën yë Sidónja'ayëty ets jyä'ty jam Afec ma ja tsëpa'an tmëët'atën mëët yë Amor ja'ayëty.

⁵ Jaakwë'ëmp näjyëtu'un ja y'it nyaaxwiinyëtëty ja guiplitës ja'ayëty, tëkokyë Líbano itjot, tyimnëjkxy a'oytsyow'äämpy, tsyo'ontä'äky jam Baal-Gad ma ja Hermón kopk ja pya'tkën ets jyä'ty ma tsyo'ontä'äkyën ja Hamat ja nyaaxjot.

⁶ E ka'ap tääpë jyotmayëty, n'ëxwojpta'ajäämpyës yam yë sitonyë ja'ayëty ma Israel ja'ayëtyën ets tëkokyë jënu'un jam tsyëënëtën kopkjotm, tsyo'ontä'äky jam Líbano ets Misrefot-maim. Mijts yë'ëmës kijpxwa'kx yë it naaxwiinyëtë ets xytyuknikäkëtya'ajëty tu'ukjaty yë Israel ja'ayëty, jëtu'un tä të ntuk'ëne'emyën.

⁷ Yajwa'kx ya'atë it naaxwiinyëtë ma ja nitaxtujkpë ja Israel kajpnën ets ma ja kujkwä'kxy kyajpn ja Manasés ja jyä'äyën.

Ja nyaaxwiinyëtëty ja Manasés, Rubén ets Gad

⁸ Yë jyä'äyëty yë Gad, yë Rubén ets kujkwä'kxy yë Manasés yë jyä'äyëty ojts ja nyaax tpëktë ko ja Moisés ojts tyajwä'kxy jam awinmtsow ma Jordán mëjnëëjën.

⁹ Yë ojts tjä'ä'atë ja it naaxwiinyëtë mëti'ipë jam yajpatpën tyimtso'ontä'äky jam Aroer, nyäxy ma Arnón mëjnëëjën ets ma ja kajpnën mëti'ipë jam joyjotm yajpatpën, y'ëwtity jam Medebá tunjkëjxm ets jyä'ty Dibón.

¹⁰ Tu'kë'ëyë ja kajpn ma ijty ja Sihón y'ëne'emyën mëti'ipë Amor ja'ayën, jampë tsyënaayën Hesbón yë'ë ojts tjä'ä'ajta'atë, tyimja'ty jam ma ja Amón ja'ayëty ja tsyëpa'anëtyën.

¹¹ Ojts näjyëtu'un tjä'ä'atë Galaad ja y'itjot ets ja nyaaxëty ja guesureos ja'ayëty ets ja maacateos ja'ayëty, ëpëky näjyëtu'un ja Hermón kopk ets tukë'ëyë ja Basán ja y'itjot, tyimja'ty jam Salcá.

¹² Yë'ë ojts tjä'ä'atë tëkokyë jënu'un yë Og tnitänën mëti'ipë ijty jam ënä'ämpën Basán jampë ojts yajkutukyën Astarot ets Edrei, Refa ja'ayëty ets yi'iyë ënäty atu'uk jaakwë'ëmp, ko Moisés tyukja'ajtë ka'ap ojts yajmëtä'äkyë ets ojts wa'ats y'ëxwojpta'ajëtë.

¹³ Yë Guesur ja'ayëty ets Maacá ja'ayëty ka'ap yaj'ëxwojptë, Jämyë ojts wyë'ëmtë mëët yë Israel ja'ayëty, tyampaat yë'ë mëët tu'ukyë y'ijtmuktë.

¹⁴ Yë Moisés ka'ap ojts tmo'oy yë nyaaxëty yë Leví ja'ayëty, jä'ä ko yë'ëjëty ojts yajtuknipëktë ets tjä'ä'atëty ja mëti'ipë yajno'kpën Tios wintuuy mëti'ipë yë Israel ja'ayëty y'ëwtajtëpën, jëtu'un tä ënäty yë'ë kë'ëm të tni'ënä'ämën.

¹⁵ Moisés ojts ja naax tyajwä'kxy ma ja Rubén ja'ayëtyën, jëtu'un ojts tuknikäkëtyä'äy tä ënäty nyimay'atën ja jyä'äyëty,

¹⁶ ja nyaaxëty jampaat tsyo'ontä'äky Aroer ets jam nyäxy ma ja Arnón nëëpa'ajën; tyimja'ty jam ma ja kajpnën jampë joyjyotm yajpaatyën ets tu'kë'ëyë ja it naaxwiinyëtë mëti'ipë jamën nijoykyijxy.

¹⁷ Jëtu'un jam jyä'äjty Hesbón ets yë'ë jyä'ä'ajtaay tëkokyë ja kajpn mëti'ipë jam yajpatpën tunjotm; tä ja kajpnëtyën mëti'ipë xyëëwajtëpën: Dibón, Bamot-Baal, Bet-Baal-meón,

¹⁸ Jahas, Cademot, Mefáat,

¹⁹ Quiriataim, Sibmá, Zared-sahar mëti'ipë jam yajpatëpën ma ja tunjot jyëjpkëxyën ets mëët nyäpyäätyë ja joyjyot,

²⁰ Bet-peor, Bet-jesimot ets ja yä'äp'it mëti'ipë yajpatpën ma ja Pisgá kajpnën,

²¹ jä'ä yaj'antijp tëkokyë ja naax kajpn jampë yajpatën nijoykyijxy wa'ats tniwa'ktaaytyë ets tu'kë'ëyë jënu'un yë Sihón tjä'ä'atyën, ja yajkutujkpë mëti'ipë Amor ja'ayën jampë kyukajpnëtyën Hesbón. Moisés ka'ap ojts tyajmëtä'äky yë Sihón, ets ja kopktëjkëty jampë yajpaatën Madián mëti'ipë mëtuunëtën, jä'ä yaj'antijtëp mëti'ipë xyëëwajtëpën Eví, Réquem, Zur, Hur ets Reba.

²² Ëpëky näjyëtu'un ko ojts ja Israel ja'ayëty tyaj'o'ktëpë ja Balaam mëti'ipë najtsja'apën, ja Beor ja myaank ets ëpëky nimay tjaakyaj'o'ktëpë mëti'ipë ka'ap yaa yajnikäjpxyën.

²³ Ja y'it nyaaxwiinyëtëty ja Rubén ja'ay, mëti'ipë ënäty të yajpëjkwä'kxyën tä nyimay'atën tu'kukajpnëty, yë'ë ojts yajmooytya'atë tëkokyë ya'atë it naaxwiinyë mëët mëti'ipë ënäty nyitënaaytyëpën, tyimja'ty jam ma ja Jordán mëjnëëjën.

²⁴ Ojts näjyëtu'un ja nyaax tpëktë ja Gad ja jyä'äy, mëti'ipë yë Moisés mooyëtën, jëtu'un tpëjktë ja nyaaxëty tä ënäty nyimay'atën tu'kukajpn.

²⁵ Yë'ë jyä'ä'ajtë Jazer kajpn ets tëkokyë ja kajpn jënu'un tnitänën ja Galaad, kujkwä'kxy tjä'ä'ajtë ja nyaaxwiinyëtëty ja Amón ja'ayëty, jampaat jyä'ty ma ja Aroer kajpnën, mëti'ipë mëët yë Rabá nyäwyinku'ixëtyën,

²⁶ yë'ë ojts näjyëtu'un tjä'ä'atë ja naaxwiinyëtë mëti'ipë itkujky yajpatpën ma ja kajpnëtyën; Hesbón, Ramat-mispé ets Betoním; näjyëtu'un ja it naaxwiinyëtë mëti'ipë itkujkyën ma ja Mahanaim kajpnën ets ma tsyëpa'an nyäxyën ja Debir.

²⁷ Ma ja joyjyotën yë'ë ojts tjä'ä'atë ja Bet-aram, Bet-nimrá, Sucot ets ja mëti'ipë yajtijpën Zafón, mëti'ipë ënäty tu'ukyë wë'ëmpën mëët mëti'ipë yë Sihón nyitënääpyën, mëti'ipë jam yajkutujkpën Hesbón. Paaty ja y'it nyaaxwiinyëtëty jampaat ënäty y'ëwtity ma ja Jordán mëjnëëjën ets tyimja'ty ma ja Quinéret mëjmejyën.

²⁸ Ya'atë jëtu'un ja naax kajpnëty mëët ja pya'a nyuxëty, mëti'ipë tuka'ajëtën yë Gad yë jyä'äy ets jëtu'un yajmooytyë tä ënäty nyimay'atën tu'kukajpn.

²⁹ Ojts nikujkwä'kxy ja Manasés ja jyä'äy yajmo'otë ja nyaaxëty, yë Moisés ojts kë'ëm tyimmo'ojëtë, jëtu'un yajmooytyë tä ënäty nyimay'atën tu'kukajpn.

³⁰ Yë'ë ojts tjä'ä'atë mëti'ipë ja Og ijty nyitënääpyën, jampë yajkutujkpë'atyën Basán, yë'ë jyä'ä'ajtë Basán'itjot tyimtso'ontä'äky jam Mahanaim, tëkë'px majk ja myutsk kajpn mëti'ipë jam näkyuwa'anëtëpën Jair.

³¹ Yë'ë jyaak niwa'ktë kujkwä'kxy ja Galaad ets ja kajpn mëti'ipë xyëëwajtëpën Astarot ets Edrei. Tëkokyë ya'atë it naaxwiinyëtë yë'ë ojts tpëktë ja Maquir ja y'u'unk y'ok nikujkwä'kxy, ja Manasés ja myaank, jëtu'un yajtuknikäkëtyääytyë tä ënäty nyiwinë'atën.

³² Ya'atë ja it naaxwiinyëtë mëti'ipë ojts ja Moisés tyajwa'kxta'ayën jampë ënäty yajpaatyën ma ja mëj joyjyotën ma txëëwatyën Moab, a'oytsyowpë wyi'imyën ma ja Jordán nëëjën, wintuuytsyowpë yajpaatyën ma ja Jericó kajpnën.

³³ Yë'ë tëy ja Leví ja'ayëty ka'ap ja nyaax yajmooytyë; je'eyë yaj'ënëmaaytyë: Miitsëty yë'ëmës yë mkuma'ayën'ajtëp yë Wintsën mëti'ipë yë Israel ja'ayëty Tyios'ajtëpën.