Joel 3 - Biblia Mixe de Quetzaltepec

¹ Ko ënäty tpaaty tääpë xëëw jëmëjt, jëtu'un yë Wintsën y'ënä'äny: nyajtëkatsäämpyës yë Judá ja'ayëty ets Jerusalén ja'ay jyuuky'ajtënëty.

² Nyajmujkta'ajäämpyës yë naax kajpn etsës jam nyajnëjkxta'aja'any ma Josafat joyjotmën ets jam ntukwinmëtoowta'ajantës wi'ix të tuntën ja nkajpnës, Israel kajpn. Je'eyë t'ëxwojptaaytyë ja Israel ja'ayëty ets ojts tyajwa'kxtë ja naax kajpn ets këëkjä'ä nyätyuknikakëtyääyëtë.

³ Ojts ja nnaax nkajpnës nyätyuknikäkëtya'ajëtë mëti'ipë y'ijxpëtsëëmtën; tyo'ktë yajktë ja pi'k ëna'k ye'etyëjkpë to'oxytyëjk ets ja wit meeny mëti'ipë pyatën ko ja pi'k ëna'k to'ktë tyajktë jam tyajtuuntaaytyë ma y'uuktën myu'ukëtën ets ma ja to'oxytyëjk tmëët'atën mëti'ipë nätyo'k näyajkëtëpën.

Ma ja Wintsën tunyën ja nipaye'eyën ma naax kajpnën

⁴ ¿Tiitën mtsojktëp ma ëjtsën? miitsëty Tirë ja'ayëty, Sidónja'ayëty ets Filistejë ja'ayëty. ¿Jam tii ëxëëk xytyuunwinpita'antë? ¿Ëkë jamës tii xytyukkëpäta'antë? Oy ko xytsyoktë, tyam nmo'otëty mëti'ipë mnitëjkëyëtëpën.

⁵ Miits ojts xymyäätstë yë mpoop pujxnës ets mpu'ts pujxnës mëti'ipës ënäty nyaj'ijtypyën yu'utsy pëjkë'ëky ets ojts xymyënëjkxta'atë ma mtsajptëjkëtyën.

⁶ Jëkäm xymyënëjkxtaaytyë ja Judá ja'ayëty ets Jerusalén ja'ayëty ets xytyo'ktë xyajktë ma griego ja'ayëtyën ets jam y'ëyow myëtuntëty.

⁷ E ëjts njuutäämpyës yam ma ojts xykyutookëtën ets näjyëtu'un ënät miits mjatëty tä ojts yë'ëjëty jyatën kyëpätën.

⁸ Ntookäämpyës yam yë m'u'unk m'ëna'këty ma jutië ja'ayëtyën ets yë'ë to'knaxtëty ma sabejë ja'ayëtyën, mëti'ipë wiink naaxwiinyëtë juuky'ajtëpën. Ëjts Wintsën, ëjts ënaanp.

⁹ Nikajpx nimëtya'aktë ya'atë aaw ayuk ma naax kajpnën: Nikajpxtë ko jyää'ata'any ja tsip mëti'ipë Tios tyunäämpyën. Mëkajpxmujkta'atë yë jotmëkja'aytyëjk. Wä'än yë tsiptuunpëtëjk tmiinta'atë.

¹⁰ Wä'än yë pyujxn jä'pn tyajtëypyujxnkojtë ets wä'än yë y'ujts tsujkn tyajku'umnkojtë ets ja ja'ay mëti'ipë ëmaay paki'ix yajpatëpën wä'än t'ëna'antë: Ëjts mëkës.

¹¹ Tëkokyë miitsëty naax kajpnëty jënu'un mnämyëwinkon'atëtën, jotëkoytyë, min mtu'ukmuktë. Ja ja'ay mëti'ipë ka'ap ja jëën tsip tsokyën jä'ä tyam awinpijtp tsiptuunpë.

¹² Nänyipëjktaakëtë naax kajpnëty ets nëjkxtë jam Josafat, jä'ä ko jam ja Wintsën ja paye'eyën tuna'any ma tëkokyë naax kajpnën mëti'ipë nämyëwinkon'ajtëtëpën.

¹³ Jä'ä ko yë'ëjëty ëxëëk jyä'äy'atë. Kupujxta'atë tä tsajpmok majën, jä'ä ko tëë tpatnë jëna'a pyëtë'ëktëtyën; jëtu'un tä'änakëtya'atë tä ja'ay tä'ännakën yë tsatsymtsya'am, jä'ä ko tëë tpatnë jëna'a y'uukykyojëtyën.

¹⁴ Tam ja'ay jyätyë ma ja joyjotmën ma jam yajnijawëja'anyën wi'ix tu'uktu'uk ja nipaye'eyën y'ita'any. Tëë wyinkony ja Tios ja xyëëw.

¹⁵ Pi'itsaam ja xëëw po'o ets ja mëtsa'a.

¹⁶ Amuupëm jam yë Wintsën yajmëtowa'any Sión ets nojkpëm jam Jerusalén yajmëtowa'any, yu'kxaanp yë naaxwiinyëtë. E yë Wintsën yë'ë kyuwa'anäämpy yë nyaax kyajpn, jëtu'un yajpaata'any tä tu'uk yë tsaapotsyën mëti'ipë kajpn kyuwäänpyën ma Israel ja'ayëtyën.

Ja naax kajpn ja kyënu'kxën

¹⁷ Ënät nëjkx miits xynyijawëtë ko jamës ntsëënë Sión, ma ja kopkën kënu'kxypyë. Yë Jerusalén kënu'kxykyajpn y'ita'any: Ka'ap nëjkx nijëna'a yë myëtsip y'ëkmëmëtakënë.

¹⁸ Jä'ä xëëw yë tsatsymnyëë ets tsi'tsknëë pyëyë'ëka'antë tä mëjnëëjën jam tunkëjxm kopkëjxm ets ma Judá y'itjotmën; komnëë jam pëyë'ëkaanp wokjotm. Jam maas yë ntsajptëjkën jam yë nëë myuuta'any mëti'ipë Sitim itjot yajxookäämpyën.

¹⁹ Xit ko'ow yë Egiptë jyata'any e yë Edom anë'ëk tëëtsë'ëk y'awinpita'any, jä'ä ko ojts ëxëëk tuntë Judá ja'ayëty ets jam kyajpnjotmëty ojts tyaj'ooktë ja'ay mëti'ipë ka'ap tii poky tmëëtëtyën.

²⁰ Jam ma Judá kajpnën ets Jerusalén kajpnën nëjkxëp ja'ay tsyëënëtë kanaakjëjp.

²¹ Yë'ë tëy yë mëti'ipë yë Judá ja'ayëty të tuuntëkoytyën ka'apës nimä'kxa'any.