Joel 1 - Biblia Mixe de Quetzaltepec

Ma ja mu'u tyajkutëkoyën ja pëjktä'äky

¹ Ya'atë ja aaw ayuk mëti'ipë Wintsën tyuknikäjxën yë Joel, Betuel yë myaank.

² Mëtoow'itë ya'atë aaw ayuk, miitsëty mëjja'aytyëjkëty ets nitëkokyë miitsëty jënu'un mkunaax'at mkukajpn'atën. Miitsëty nijëna'a jëtu'unpë xykya'ix xykyanijawëtë.

³ Tukmëmëtya'aktë m'u'unk m'ëna'këty ets yë'ëjëty tukmëmëtya'aktëty yë y'u'unk y'ëna'këty ets y'u'unk y'ëna'këty tukmëmëtya'aktëty yë jyä'äyëty.

⁴ Wa'ats yë mu'u të tjë'kxta'ay yë pëjktä'äky, mëti'ipë ojts jyaakwë'ëmyën wiinkpë të myintë ets të yajkëxyë.

⁵ Miitsëty, ëmu'ukyëjyä'äytyëjkëty, ëkwijtë. Jë'ëtë ya'axtë mëti'ipë tyukjajtëpën y'uuktëty myu'ukëtëty, miimp ja xëëw jëmëjt jëna'a nëjkx myajpëjkëtë yë tsatym nyëë tëëpë nyimaanaxyën.

⁶ Jä'ä ko yë mu'u jëtu'un myina'any maas yë nnaax nkajpnën tä maytsyiptuunpëtëjk muum jya'tën ets y'aaw tyëtsëty tmëmintë tä kaajën.

⁷ Yë'ë të tyajkutëkooytya'atë yë tsatsymkyam, tëë tyajkëjxta'atë yë higos kepy; wa'ats të tnikä'ptuta'atë; poopëm të tyajwinwatsnëtë.

⁸ Tä tu'uk yë to'oxy'ëna'k jyi'iy yä'äxyën mëti'ipë pëkaanpën ko tëë y'ooky ja naaxwiinyëtë ja'ay mëti'ipë ënäty mëët të jyapëka'anyën,

⁹ jëtu'un yë teetytyëjkëty jyë'ëtë ya'axtë jä'ä ko ka'ap jap tii tsatym nyëënë tsajptëkoty tii y'uuktëpën ets tii yë Wintsën tyukwintsë'ëkëtëpën.

¹⁰ Ma kam tu'ujën nitii jam kyaka'ty; je'eyë yaj'ijxnë tëë yowë ja'ay y'o'ktaaynyë. Tëë ja tsajpmok myä'äty, tëë ja tsatym tyëëtsë'ktaaynyë ets olivos aak xootsëty kyëxë'knëtë.

¹¹ Miitsëty mëti'ipë naaxtuuntëpën, mëti'ipë nyipëjktakëtyëpën yë tsatsymkyam, jë'ëtë ya'axtë mon tuk, jä'ä ko ma'ta'ajaanp yë mëti'ipë ënäty të xyjyakoj të xyjyani'iptën ets tsajpmok ets cebadë mya'ata'aja'any.

¹² Tëë ja tsatsymkyam tyëëtsë'kta'ay ets tëë ja higo kepy mya'ta'ay. Näy të'ëts të wyë'ëmta'atë ja granados ets ja kum ets ja manzaan ets tëkokyë ja aay kepy tëë tyëëtsë'kta'atë. Paaty ja xoontakën; wa'ats të kyëjxta'ay.

¹³ Miitsëty teetytyëjkëty, mëti'ipë wintsë'kën myajktëpën ma wintsë'këntyaknën, tuktëkëtë mwitëty mëti'ipë kuumpën u'kxpën ets mjë'ëtëty mya'axtëty mëët ja pëjkën ato'onën, jä'ä ko jap ma tsajptëjkën ka'ap jap tiinë yë tsajpmok ets tsatym nyëë mëti'ipë wintsë'kën'ajtpën.

¹⁴ Mëkajpxmujkta'atë yë naax kajpn ets y'ayuu'atëty; yajmujkta'atë yë yujkyeekytyëjkëty ets mëjja'aytyëjk ets nitëkokyë ja'ayëty jap tsajptëkoty ets tmëkajpxtëty yë Wintsën.

¹⁵ Janty mon janty tuk nyajpatëmë, jä'ä ko tää myiny wyinkony ja Wintsën ja xyëëw. Ma Wintsën xyajkutëkoya'anëmën mëti'ipë maaytyääyëpën winë.

¹⁶ Yajxon n'ijxëmë wi'ix yë një'kxy'ajtëm mpëky'ajtëm nyajpëjkëmë ets jap tsajptëkoty tëë kyixy nyäxy ja xoontakën.

¹⁷ Jëtu'unyë ja tëëmt të kyumo'onëtyä'äy jap naaxjoty, jëtu'unyë ja tsajpmok të tyëkooytyä'äy ets ja mëti'ipë të jyani'iptën o'ktëy tyam yajpaatë.

¹⁸ Ëjp tu'kp ja tsajpkaa. Yë tsajpkaato'oxy nëkoopë jyi'kxy t'ixta'atë; yë kupixyny jëtu'unyë y'o'ktaaynyëtë.

¹⁹ Mijts yam nmëkäjpxyp Wintsën, tëë ja jëën tnaxkuno'këtyä'äy ja aaw ujts, mëti'ipë jam të'ëts'itjotm të yajpaatën ets mëti'ipë kamjotm tu'ujotmën.

²⁰ Yë'ëpaat yë aayjëyujk ujtsjëyujk mëkajpxënë, jä'ä ko tëë yë nëë wok tyëtsta'ay ets jëën wa'ats të tyajkëjxta'ay yë mëëyjot.