Jeremias 22 - Biblia Mixe de Quetzaltepec

Ja ayuk mëti'ipë yajtuknikäjxpën ja Judá yajkutujkpë ja y'u'unk y'ëna'k

¹ Jëtu'unës yë Wintsën të xy'ënëëmë: Nëjkx jam ma yajkutujktaknën ets xynyikajpxëty ya'atë aaw ayuk

² ma Judá yajkutujkpën, mëti'ipë jam yajpatpën ma David yë kyutujktaknën ets ma tyuunpëtëjkën ets ma nitëkokyëty yë ja'ayëtyën mëti'ipë jam tsënaaytyëpën kajpnjotm: Mëtoow'itë yë Wintsën yë y'aaw y'ayuk.

³ Tuntë ja tëyajtën ets ja nipaye'eyën tëypyë jaantypë ma ya'atë it naaxwiinyëtën, yaj'ëwaatsëpëtsëmtë ja'ay ma wyintsënën mëti'ipë je'eyë mëk mëtuunpën ets ka'ap tsow yajmëjuy, këtii xytyiytyuntëty yë jaaypyaat jaaypyo'kxy ets ku'ooky u'unk, ku'ookytyo'oxy. Këtii xyaj'ooktëty ma ya'atë it naaxwiinyëtën yë ja'ay mëti'ipë ka'ap tii poky tmëëtëtyën.

⁴ Pën mtuuntëp mëti'ipë ntuk'ënä'ämtëpën, jää'ataanp ja ja'ay mëti'ipë yajkutukëpën ma ja David ja kyutujktaknën, mëti'ipë tëkëjantëpën kepy wintëkäämpëkëjxy ets kwaaykyijxy jam ma yajnitëkën yë kutujktakn, mëët ja ja'ayëty mëti'ipë mëj'äämpy ijtëpën ets wintsëntëjkëty.

⁵ E pën kajts xykyuuytyuntë ijxtëm myaj'ënëëmëtën, ya'atë kutujkëntëjk xit ko'ow jyata'any. Ëjts Wintsën, ëjts ënaanp.

⁶ Jä'ä ko yë Wintsën tëë tnikäjpxy wi'ix jyata'anyën yë Judá kyutujktakn: Jëtu'un mijts njawë tä yë Galaad kopkën, tä yë Líbano kupi'tykyën, e ëjts yajxonës nikäjpxy ko të'ëts'itjot nyaj'awinpita'anyës ets ni pën jam nëjkx kyatsëënë.

⁷ Ntuknikäxäämpy yë ja'ay mëti'ipë mniminëtëpën mëët ja tyiypyujxn ets mëët ja kyu'umën ets myaj'atëkoyëtëty. Nëjkxëp tjijtë'kta'atë ja mtëjkxeny mëti'ipë ajë kepyën ets tnino'kta'aja'antë.

⁸ May nëjkx ja'ay yaa nyaxtë mëti'ipë wiink kë'ëy wiink kajpn tso'ontëpën, nëjkxëp nyäyajtëwëtë: ¿Tii jëtää ko yë Wintsën jëtu'un të tuny ya'atë naax kajpn?

⁹ Ets nëjkx y'ëtsowtë: Jä'ä ko ka'ap ojts jëtu'un t'ëktuunëtë tä ënäty të tkäjpxy tyuntën mëët yë'ë, wiink tios ojts tpanëjkxtëjkënëtë ets ojts yë'ë twintsë'kënëtë.

Ma ja Jeremías t'akäjpxyën wi'ix jyata'anyën yë Salum

^10-11 Këtii xynyiya'axtë yë Josías yajkutujkpë, këtii xynyiya'axtë ko të y'o'knë; yë'ë niya'axtë yë myaank Salum, jä'ä ko ënäty tsyoony ka'ap nijëna'a y'ëkwinpitanë, ka'ap nëjkx t'ëk'ijxnë nijëna'a yë nyaax kyajpn ma të myëxu'unk'atyën. Jä'ä ko yë Wintsën jëtu'un tnikäjpxy yë Salum, Josías yë myaank mëti'ipë jam Judá yajkutujkpën, mëti'ipë ja tyeety kyutëjkëyën ma ënä'ämtaknën ko y'o'ky ets mëti'ipë të tsyoonyën yaa: Ka'ap nëjkx nijëna'a y'ëkwinpijnë,

¹² jam nëjkx y'ooky ma ënäty të yajmënëjkxyën tsumy matsy ets ka'ap nëjkx nijëna'a t'ëk'ijxnë ja nyaax kyajpn.

Ma yajnikäjpxyën yë Joaquim

¹³ Janty mon janty tuk mijts myajpaaty, jä'ä ko ka'ap tii mëtëy xynyipaye'ey, yë mkëmoon tëjk yë'ë të xytyukkojy ja ëxëëk winma'any, ko ja ja'ay nëkoo të xytyätyyajtuny ets ka'ap të xymyëjuy ijxtëm pyäätyën.

¹⁴ Ko m'ëna'any: Mëjës yë ntëjk nkoja'any ets tyëkot nän mëj nyaj'ita'anyës ets mäjtsk nikë'ë. Ets xyaj'ëwa'atsy yë nyitëjkwiin, yë'ë ajë kepy mtukniwojpy yë nyipotsy ets tsapts xykyoy.

¹⁵ ¿Jëtu'un mmay mtajyë ko tu'uk yajkutujkpë ajë kepynyawopy mëpaat y'ëne'emyë? Yë mteety oy ojts jyuuky'äty jä'äkyëjxm ko oy ojts winë tnipaye'ey ets mëtëy win tuuny, paatykyëjxm jotkujk jyuuky'äjty.

¹⁶ Mëk ijty tkuwa'any yë ëyoopëja'aytyëjk ets nyitsiptuunpy mëti'ipë o'ktëy yajtuunpën e paaty ojts oy jyuuky'äty. Yë jëtu'unpë yajtijp ko xy'ixy'ätyës. Ëjts Wintsën, ëjts ënaanp.

¹⁷ Mijts yi'iyë mmëmääpy mmëtäjpy wi'ix ja wit meeny xypyaatëty mëët ja antakën; myaj'o'k ja ka'apë tii poky tunyën ets o'ktëy xytyuny xy'ënëëmë ja mnaax mkajpn.

¹⁸ Jëtu'un yë Wintsën të tnikäjpxy ja Joaquim, yë Josías yë myaank mëti'ipë jam Judá yajkutujkpën: Yë Joaquim ni pën kyaniya'axa'anyë ko ënäty y'ooky, ni pën kyaniya'axa'anyë ets ni pën kya'ëna'ana'any: Ix tëy të m'ëkjaty mijts uty, ëkë mijts ajty, ëkë mijts tsë'ë, ëkë mijts wintsën, ëkë mijts yajkutujkpë.

¹⁹ Tä kruktsën nëjkx nyaaxtëkë, je'eyë nëjkx yajwinpajëtuty ets jam yajnajtsjëtutëty ma Jerusalén kyajpnpa'ajën.

Ma yajnikäjpxyën wi'ix yë Jerusalén kajpn jyata'anyën

²⁰ Judá, pät jam ma Líbano kopkën ets jam mëk mkuyaxnaxëty. Mëk jam mya'ax mjokëty ma Basán kopkën. Yujkya'ax jam ma Abarim kopk kupi'tykyën, jä'ä ko tëë ja mye'etyëjktëjk tyëkooytya'atë mëti'ipë ënäty mëët m'ijtmuky mtsënaaymyukyën.

²¹ Ojts mijts njamëkäjpxy ma ënäty akujk jotkujk myajpaatyën, ka'ap ojts xykyupëky ja n'aaw n'ayukës. Jëtu'unyëm mja'ay'äty ko m'ëna'k'aty: Ka'apës xykyäjpxymyëtoy.

²² Paaty ja mkopktëjk jëtu'un jyata'antë tä aay pu'uxm wyimpapojyën ets ja mye'etyëjktëjk tsumy matsy yajmënëjkxa'antë wiink naax wiink kajpn. Wintsëtyu'un jëjptsëtyu'un nëjkx mwë'ëmy mëët ko ënäty ëxëëkpë yi'iyë të xytyuny të xykyäjpxy.

²³ Jotkujk tyam myajpaaty, jëtu'un tä joon jëyujkën pyä'änjoty y'ityën, ajë kepy itkujky mtsëënë mëti'ipë ja'ay yajtso'ontëpën jam Líbano, je'eyëp ko pyätyp ja xëëw po'o jëna'a mijts ja pëjkën ijxën xyajnaxa'anyën mëti'ipë jëtu'un pëjkp atoonpën tä to'oxytyëjk u'unk maay tyajja'ta'anyën naaxwiiny.

Ma ja Wintsën tuknikexyën yë ja aaw ayuk ja Jeconías

²⁴ Jëtu'un ja Wintsën t'ënëmaay ja Jeconías, yë Joaquim yë myaank mëti'ipë jam Judá yajkutujkpën: Yë njuukyajtënës kë'ëm ntukajpxpejtyp etsës n'ëna'any: Oyxyëp jeexyë mijts jëtu'un mtimyajpatpë nkë'ëkëjxyës tä tu'uk kë'ëjiitsën mëti'ipë ja'ay tyuknokytsyääpyën, mijts je'eyëm njëpëka'any maajës yë nkë'ëjën

²⁵ ets nkë'ëyaka'any ma mmëtsipën mëti'ipë ooky m'ixanëpën ets mëti'ipë ëxëëkëm xytsyë'ëkën. Yë'ë ntukë'ëtëkëjäämpy yë Nabucodonosor, mëti'ipë jam ënä'ämp yajkutujkpën Babilonyë, ma Caldeo ja'ayëtyën.

²⁶ Ets jam nnajtswopëja'antë atsip mëët yë mtaak ma ja it naaxwiinyëtën ma ka'ap ojts mmëxu'unk'atën, jam nëjkx nimäjtsk m'ooktë.

²⁷ Jëtu'un'äämpy nëjkx ka'ap nijëna'a wyimpitë oy yajxon jyawinpita'antëty.

Ma ja käjpxynyajxpë mëk kyäjpxyën

²⁸ ¿Wä'än yë Jeconías jyëtu'unëty tä tu'uk yë tu'tsën mëti'ipë pu'ujënë, ëkë tä tu'uk yë texyën ëkë a'ukën mëti'ipë ka'ap pën tsyokyënë? ¿Wi'ix jëtää ko jam të yajnajtswojpëtya'atë wiink naax wiink kajpn ma ka'ap pën t'ixy'ätyën?

²⁹ Naax, naax, naax; mëtoow'it wi'ix yë Wintsën y'ënä'änyën.

³⁰ Jëtu'un yë Wintsën y'ënä'äny: Jap ya'atë ye'etyëjk kuuja'atë ma yajjaaypyätën yë ye'etyëjktëjk, ko jëtu'un yë'ë tä tu'uk ja'ayën mëti'ipë ka'ap nitu'uk yë y'u'unkën, tä tu'uk yë ye'etyëjkën mëti'ipë ka'ap tii të y'oypyëtsë'ëmxëtyën ko të jyuuky'äty. Jä'ä ko ka'ap nëjkx nitu'uk yë y'u'unk y'ëna'k jyä'ty ma David yë kyutujktaknën ets jeexyë jam jatëkok y'ëne'emy Judá.