Génesis 41 - Biblia Mixe de Quetzaltepec

José tyajniwijy yë yajkutujkpë yë wyinkuma'ay

¹ Kommäjtsk jëmëjt, tu'uk xëëw ojts yë yajkutujkpë wyinkuma'ay, jam nyäjyawëty tyänë ma mëjnëëpa'ajën, mëti'ipë xyëëwajtypyën Nilë.

² E jam nëëpë'am niwëxtujk t'ixy yë tsajpkaa pyëtsëmtë janty oyëty janty ni'kxëty, jam y'oktë ujtsjotm.

³ E näjyëtu'un t'ijxy jam myintë niwëxtujk yë tsajpkaa ëxëëkëtypë ets xyëëpëtypë, jam nëë''ëkë'ëm pyëtsëmtë ets ja myëku'uk tpuwa'akëtë.

⁴ Yë xyëëpëtpyë tsajpkaa yë'ë ojts tsu'tsta'atë ja ni'kxëtypë. Ënät ojts yë yajkutujkpë myä'äywyijy,

⁵ ënätyë jatëkok myaanajxy, e ënät ojts jatëkok wyinkumaakojnëpë ets t'ijx niwëxtujk yë tsajpmok janty oyëty yääktë pyätë ma tu'ukpë nyixe'entyën.

⁶ Jam wiinkpë t'ijxy yony niwëxtujk të'ëtsëty ets tëë yë xëëw'an tsyääytyääyënë.

⁷ E ya'atë tsajpmoktë'ëts yë'ë ojts tjë'ënta'atë ja oyëtypë. Ënät ojts yë yajkutujkpë myä'äywyijy ets ojts tjawë ko wiinkumaaptëm jëtu'un.

⁸ Komjëpom, yi'iyë ënäty myëmääpy myëtäjpy ja wyinkuma'ay, ënät ojts ni'ënä'ämë ko myintëty ja najtsja'apëtëjkëty ets ja wijyjyä'äytyëjkëty. Tä yë yajkutujkpë tnimëtyaktaay yë wyinkuma'ay, e ni pën ojts tkayajniwijy.

⁹ Ënät y'ënäny, ja mëti'ipë ja uuky nyiwintsën'ajtypyën: Tyamës nja'amyetsy ko ojts tëkok ëxëëk n'ëtë'ëtyës.

¹⁰ Ko ojts yë wintsën tukjoot'anpëky yë mëti'ipë tsajpkääky nyiwintsën'ajtypyën ets mëti'ipë tyam mtuunpë'ajtypyën ojtsës xytsyumtë ets xynyi'ënä'ämëtës nimäjtsk ets nnëjkxtëtyës pujxn tëkoty.

¹¹ Tu'ktëkok ojts yë tsajpkääky wintsën wyinkuma'ay ets näjyëtu'unës ojts nwinkuma'ayës. Ja nkuma'ayëtyës aak ja winma'any wi'ix nyiwija'anyën.

¹² Jap pujxn tëkoty maas ënäty n'itën, tap ijty tu'uk yë yä'äy ëna'k, hebreo ja'ay, yë'ë ënäty tyuunpë'ajtyp yë mëj wintsën, mëti'ipë këwent'ajtpën. Ënät ntukmëmëtyaktës ja nwinkuma'ayëtyës ets yë'ë ojts tkajpxtë'kxta'ay.

¹³ E jëtu'un të tyuny të jyätyë ijxtëm ojts y'ënä'änyën. Ëjts tëëjës jatëkok ja ntuunk npaaty ets ja tu'ukpë ojts ja jyänty yajyo'ktëy.

¹⁴ E ënät ja yajkutujkpë ojts nikäxë ja José, tä tim ënätyë tyajpëtsëëmtë pujxn tëkoty. Ojts ja José kyuwaay tyajkeepyë ets ojts yë wyit tjääntëkatsy, tä jëtu'un ja yajkutujkpë twinkuwa'këy.

¹⁵ Tääts ja yajkutujkpë y'ënëmaayë: Tëës tyam nwinkuma'ay ets ka'ap pën, pën mëpaat tkajpxwa'atsyën, tëëjës nijawë ko mijts mkajpxwatsyp yë kuma'ay.

¹⁶ Ëjts ka'apës tääpë xypyääty nkajpxwa'atsëtyës yë mkuma'ay, jëtu'un y'ëtsooy yë José. E Tios yë'ë yakäämpy yë kajpxwinpijtën mëti'ipë mijts mtuk'oy'atëpën.

¹⁷ Ënät ja yajkutujkpë t'ënëmaay yë José: Maajës yë nkëma'ayën jëtu'unës näjyawëty jamës yowë ntänë nëë'ëkë'ëm, ma mëjnëë jyënäkyën, mëti'ipë xyëëwajtypyën Nilë,

¹⁸ jam nëëjotm n'ixyës pyëtsëmtë niwëxtujk yë tsajpkaato'oxy oyëtypë tsujëtpyë ets ni'kxëtypë; jam y'ujts'oktë tsajpkäpynyjoty.

¹⁹ E jam ix'am jam wiinkpë të pyëtsëmtë, nän niwëxtujk aak tsajpkaato'oxyëty, e jä'äjëty ëxëëkëm kyëxë'knëtë ets janty xyëëpëty, janty paki'ixëty. Kajëna'ajës tsajpkaa ma jëtu'unpë nka'ixy yaa Egiptë.

²⁰ Ya'atë niwëxtujkpë tsajpkaato'oxyëty tëë ja myëku'uk tsu'tsta'atë, mëti'ipë ënäty ni'kxëtyën,

²¹ E oy ënäty jëtu'un ja myëku'uk të tjatsu'tsta'atë, ka'ap nijënu'un tyajkëxë'ëktë je'eyëm kyëxë'ktë janty xyëëpëty ets paki'ixëty, jëtu'un ijxtëm ënäty jyëyujk'atën. Koos të nma'awyijy,

²² ënätës jatëkok të nkumaakojnëpë jëtu'unës n'ixy niwëxtujktëm yontë yë tsajpmok, janty oyëtyën kyëxë'ëktë ets janty tsujëty, janty maytyëm ja tyëëm tmëët'aty ja tu'kxe'entypë.

²³ Jam ix'am wiinkpë yontë nän niwëxtujk yë tsajpmok kepy, e jä'äjëty të'ëtsëty kyëxë'ëktë ets xootsëty ets tëë yë xëëw'an tsyääytyääyënëtë ets të pyojkëtaawtaaynyëtë.

²⁴ Ya'atë tsajpmok yontën të'ëtsëtypë, ojts tjë'ënta'atë ja niwëxtujkpë ja tsajpmok yontën oyëtypë. Ya'atës yam nmëtyä'äkyën tëëjës yë najtsja'apëtëjk pamääpyëtëjk njatukmëmëtya'aktë, e ni pën të tkayajniwijy etsës jeexyë xytyuk'ëwaanëtë tiitën nkuma'ayës jyanikajpxäämpyën.

²⁵ Ënät yë José ojts yë yajkutujkpë t'ëtsoy: Yë mäjtskpë mëti'ipë të xywyinkuma'ayën, tu'uk mëti'ipë nyikäjpxypën. Tios mijts të mtuk'ixyë mëti'ipë tyunäämpyën tääts xynyijawëty.

²⁶ Yë wëxtujkpë tsajpkaa yë oyëtypë, wëxtujk jëmëjt yë'ë; jëtu'un ijxtëm näjyëtu'un yë tsajpmok yë oyëtypë, wëxtujk jëmëjt yë'ë. Tu'knax yë nyiwijy mäjtskpë mkuma'ay.

²⁷ Näyjyëtu'un yë tsajpkaa yë xyëëpëtpyë mëti'ipë ix'ok të pyëtsëmtën, wëxtujk jëmëjt yë'ë; näjyëtu'un ijxtëm yë tsajpmok yë tooyëtypë të'ëtsëtypë mëët yë poj, wëxtujk jëmëjt yë'ë. Jëtu'un nëjkx winë ka'ap y'ity wyintëy.

²⁸ Jëtu'un ijxtëm të n'ënëëmën: Tios të mtuknijawëty tii tunan jatanëpën.

²⁹ Wëxtujk jëmëjt yë pëjktä'äky wyintëwa'any ets mëj këjää wëxtujk jëmëjt winë y'ita'any,

³⁰ ets ok myina'any näjyëtu'un wëxtujk jëmëjt ma ka'ap tii y'ita'any wyintëwa'anyën. Ni pën nëjkx tkaja'amyetsy wi'ix ënäty winë të y'ëk'ijt të y'ëkwintëëpën ma Egiptë nyaaxjotmën, jä'ä ko ja yuu xëëw yë'ë yajma'ta'ajäämpy ja naax kajpn.

³¹ Mëj këjää y'ita'any yë yuu xëëw ets ka'ap y'ëkyajja'amyäjtsnëty wi'ix ënäty winë të y'ity të wyintëyën.

³² Yë nwintsënës mäjtskpëky të wyinkuma'ay; e tu'ukyë je'eyë mëti'ipë nyikäjpxypën ets wi'ix nyiwijyën, jä'ä ko Tios jëtu'un të tuknipëjktaakë yajxon mëti'ipë tyunäämpyën ets tsojk jëtu'un tuna'any.

³³ Nikë oy'ajtp jeexyë ko yë nwintsënës ja'ay wijypyë t'ixta'ay tääts yë'ë jotmay tjëkyäpëty ma naax kajpnën.

³⁴ Ya'atë yë nwintsënës tyunëp, ko tnikajpxpätëty yë mëti'ipë ënä'ämëpën ets jyëtitëty maajaty ja kajpnën mëti'ipë yajmukëpën tu'kpëkyjyäty ma ja mëkoxkpëkpyën ma ënäty winë të y'ity të wyintëyën ma tu'kë'ëyë yë Egiptë tnitänën, wëxtujk jëmëjt ma winë y'ita'any wyintsën.

³⁵ Ets tyajtu'ukmujkta'ajëty yë tsajpmok ma ya'atë jëmëjt myinyën kyëtä'äkyën, ma winë y'ita'any wyintëwa'anyën ets tpëjkta'aktëty ma tu'uk yë ijtaknën, e yë nwintsënës yë'ë kyë'ë'am'atëp, jam tpëjkë'ëktëty ma naax kajpnën, mëti'ipë ja'ayëty nätyuk'ix nätyukmëyatëtëpën ets mëti'ipë jyë'kxtëp pyëktëpën.

³⁶ Jëtu'un ja tsajpmok pëjkë'ëky wyë'ëmtëty ma ja kajpnën, këtiipë ja ja'ay y'ooktëty tyëkoytyëty mëët ja yuu xëëw, ma ënäty wëxtujk jëmëjt winë ka'ap y'ity wyintëyën mëti'ipë itaanpën Egiptë.

José y'ëne'emy jap Egiptë

³⁷ Mëti'ipë ojts tkäjpxyën yë José janty'oy ojts yë yajkutujkpë tmëtoy mëët tu'kë'ëyë jënu'un ënäty mëët y'ëne'emyën.

³⁸ Tä ja yajkutujkpë y'ënëmaayëtë: ¿Jyëkyejpy jëtää ja'ay wiinkpë npatmëty mëti'ipë Tios wyijy'ajtën myëët'ajtëpënë?

³⁹ Ënät yë yajkutujkpë t'ënëmaay yë José: Ka'ap ma wiinkpë ja'ay jaakwinma'anymyëëtpë ets wijypyë ijxtëm mijtsën, Tios jëtu'un të mtuknijawëty tu'kë'ëyë ya'atë.

⁴⁰ Mijts yaa mwë'ëmëp maas yë nkutujktaknën ets tu'kë'ëyë nkajpnës mëmëtowëtëty. Mëti'ipë tëy ëjts yaa mëj naxaanp këtiinëm mijts, jä'ä ko ëjts yajkutujkpë.

⁴¹ Ëk'ix, tyam mijts npëjktä'äky ënä'ämpë ma tu'kë'ëyë Egiptë kajpnën. Ko jëtu'un y'ënäny,

⁴² ënät ja yajkutujkpë nyätyukë'ëji'tstutë ja kyë'ëjiits, mëti'ipë ënäty myëët'ajtypyën ja tsa'ayajtën mëët ko yajkutujkpë'aty ets tmooy ja José. Tääts ni'ënä'ämëy ko txoxtëty mëët ja wit oypyë ets mëti'ipë tsowën ets t'oytyuunëtëty näjyëtu'un ja nyantsëm pu'ts pujxnëpë.

⁴³ Ënät ojts tyajpety ma ja kepy wintëkäämpën mëti'ipë ijty xëmë paye'eyëpën ets tyajmëjtu'unajxtë tu'kkajpnjoty ets tu'kë'ëyë ja'ayëty tyëjkëtyë yaxpë jojkpë ets y'ëna'antë: yaj'ëwa'atstë tu'u'aaw ma nyaxëtyën yë wintsën. Jëtu'un'äämpy ja José ojts tyëkë ënä'ämpë ma tu'kë'ëyë ja naax kajpnën mëti'ipë Egiptë nyitënääpyën.

⁴⁴ Tää ja yajkutujkpë näjyëtu'un y'ënëmaayë: Ëk'ix, oyës n'ëk'ity yaa mëj wintsën ni pën mëpaat kë'ëmwinma'any winë tkatuny ma tu'kë'ëyë Egiptë kajpn tnitänën, pën mijts ka'ap të xynyi'ënä'ämë ets pën ka'ap xy'ëwa'atsy.

⁴⁵ Yë yajkutujkpë ojts yë José yë xyëëw tyajtëkajtsë, jä'ä txëëwmooy Safenat-panéah, jëtu'un ijxtëm ënäty jap Egiptë kyajpxtën ets tyajpëjky mëët tu'uk ja to'oxytyëjk jä'ä xyëëwajtyp Asenat, yë'ë nyëëx yë Potifera, mëti'ipë ënäty tuunpën teety ma tsajptëjkën, jam ma ja kajpn txëëwatyën On. Jëtu'un'äämpy yë José ojts ja naax kajpn tmëwë'ëmy ets t'ënä'ämëty jap Egiptë.

⁴⁶ I'px majk ënäty yë José yë jyëmëjt ko ojts yajmënëjkxy ma yajkutujkpën, mëti'ipë ënäty ënä'ämpë'ajtpën jap Egiptë. Ënät yë José nyäy'ëxmajtsë mëët yë yajkutujkpë ets tyëjkëy jëtijtpë maajaty ja kajpnën. T'aye'ey t'anaxy maajaty ja naax kajpnë mëti'ipë Egiptë nyitënääpyën.

⁴⁷ Wëxtujk jëmëjt ojts winë y'ity wyintëy ets naaxwiinyëtë janty mayëty yë pëjktä'äky tyäjky.

⁴⁸ Yë José yajmujktaay yë tsajpmok jënu'un ënäty të y'ity të wyintëyën wëxtujk jëmëjt ets tpëjkë'ky maajaty ja kajpnën ma ënäty ja pëjktä'äky të pyëti'ikyën, jëtu'un ojts wyë'ëmtë pëjkë'ëky tunë'ëky ja tsajpmok jam kamjotm ma ja naax kajpn wiinkonëty wyë'ëmtën.

⁴⁹ Jëtu'un yë José tyajpëtë'ky yë tsajpmokpajk tä nëë'ajinën janty may. May ënäty oy ja tsajpmokpajk të nyipäjnë ets ka'ap t'ëkjëkyäjpnë yajkijpxta'akëty, paaty ojts tim'ëxmajtsnë ets ka'ap ja kijpxëny t'ëkyajtuunëtëty.

⁵⁰ Ka'anëm ënäty ja yuu xëëw tsyo'ontä'äkynyëm, ko yë José yë tyo'oxytyëjk, mëti'ipë xyëëwajtypyën Asenat, tyajmëxu'unk'ajty nimäjtsk yë y'u'unk myääy.

⁵¹ Ja y'u'unk ja më''ëka'anypë myiinyën naaxwiiny, jä'ä txëëwmooy Manasés ets y'ënäny: Tiosës të xytyukja'atyëkoy ja nmonyë ntukyës ets ja ëxëëkpë tsaatsypë mëti'ipës të nmënaxy të nyajnaxyën ets ja njëëky nmëku'ukës, nteetyës ntaakës.

⁵² Ja mëmäjtskpë jä'ä txëëwmooy Efraín ets y'ënäny: Tiosës yë u'unk maay të xymyo'oy ma ja naax kajpnën maas mëk të n'ëyoyën.

⁵³ Jëtu'un nyäjxy ja xëëw jëmëjt, ja wëxtujk jëmëjtpë ma y'ijty wyintëëyën winë jap Egiptë.

⁵⁴ Ënät ojts tsyo'ontä'äky ja yuu xëëw mëti'ipë ënäty wëxtujk jëmëjt itaanpën, jëtu'un tä ënäty ja José të t'akäjpxyën. Ojts yë yuu y'ity ma tu'kë'ëyë naax kajpnën, jäpyë yuu ka'ap y'ijty Egiptë; ma Egiptë kajpnën jap'ajtp ënäty yë jë'kxy pëky may.

⁵⁵ Ko ojts y'akëjxëtyääynyë yë jë'kxy pëky ma ja'ayëtyën jap Egiptë ets yuu mëk tja'awënëtë, ënät ojts nyëjkxtë ma yajkutujkpën jë'kxy'amëtoopë. Ënät yë yajkutujkpë t'ëtsooy ja Egiptë ja'ayëty: Nëjkxtë ma Joséjën ets yë'ë tuntë tii yë'ë nyi'ënä'ämëpën.

⁵⁶ Ko ojts ja yuu xëëw jyä'ty maajaty ja naax kajpnën, ënät ja José tyajku'ëwatstaay ja tsajpmok ma ënäty pëjkë'ëky tyaj'ityën ets tooka'any ma ja Egiptë ja'ayëtyën, jä'ä ko ja yuu xëëw ni'ikyë myëjë kyëjääjënyë.

⁵⁷ E tu'kë'ëyë ja ja'ayëty oymyëti'ipë kajpnëty jap ojts nyëjkxta'atë Egiptë tsajpmok juupyë ma ja José tsyajpmok tookyën, jä'ä ko ka'ap ënäty nimaa y'ëkyajpatnë ja jë'kxy pëky.