Génesis 34 - Biblia Mixe de Quetzaltepec

Wi'ix ja Dina yajnitsiptuunyën ko ënäty ja Siquem të kyawinkutsë'ëkëty

¹ Jam ënäty tu'uk yë nyëëx yë Lea mëti'ipë mëët t'u'unk'atyën yë Jacob, jä'ä xyëëwajtyp Dina. Ënät ojts yë Dina tsyoony jam ma tyëjkën ets nëjkx tku'ixëja'any ja myëto'oxy'ëna'k mëti'ipë jam tsënaaytyëpën.

² E jam ënäty tu'uk yë ye'etyëjk yajpaaty mëti'ipë txëëwajtypyën Siquem, yë myaank yë Hamor, Heve ja'ay, mëti'ipë ënäty mëj'äämpy ijtëpën ma ja jampë ja naax kajpnën. Ënät ja Dina t'atsip'ajty ets myëëtko'knëtëty ets ojts jëtu'un ja näwyinkutsë'ëkë tkamëët'aty ma ja Dina.

³ E ja Siquem yajxon ojts ja Dina tjanty tsyojkën'aty ets ja jyot wyinma'any t'ëwa'anëy ets jeexyë ja Dina tsyojkën'atyë.

⁴ Ënät ojts myëtyä'äky mëët ja tyeety Hamor ets t'ënëmaay: Nëjkx ya'atë kiixy amëtow, yë'ëjës npëkäämpy.

⁵ Yë Jacob ojts tnijawë ko yë Siquem ënäty yë Dina të tuk'atsip'aty ets myëëtko'knëtëty, e ja y'u'unk y'ëna'këty jam ënäty jyëtitë kamjotm tu'ujotm mëët ja jyëyujkëty, paaty ja Jacob ojts ka'ap tii tnakäjpxynyëm koonëm ja y'u'unk y'ëna'k jyajtë.

⁶ Yë Hamor tëë ënäty nyijkxy ma ja Jacob ja jyëën tyëjkën ets tmëëtmëtya'aka'any.

⁷ Ko ja Jacob ja y'u'unk y'ëna'k jyajtë ma ja tyëjkëtyën, tää pojën tnija'awëtyë tii ënäty të tyuny të jyätyën. Tää jyänty jyoot'anpëjktë jä'ä ko ijxtëm ënäty ja Siquem të y'ëti'ityën, ka'ap nyäwyinkutsë'ëkëty; mëj këjää ja wintsë'kën të tyajtëkoy ma ja Israel ja'ayën ko ja nyëëx atsip të tmëëtko'knaayë. Yë'ë ojts tuuntëkooy mëti'ipë jeexyë ka'ap nijëna'a tunyën.

⁸ Ja Siquem ja tyeety, ja Hamor ojts myëëtmëtya'akëtë ets y'ënëmaayëtë: Yë n'u'unkës Siquem yë'ë yajxon tsyojkën'ajtyp yë m'utyëty, paaty n'amëtow npëjktsowtë yë mëyajtën ets xy'a'ixëtëty wä'än yë nmaankës mëët tpëky t'uuky.

⁹ Jëtu'un näjyiiky'ajt näymyëku'uk'ajtëmëty ets oy näjya'awëmëty; jëtu'un pyëktëty y'uuktëty ëëts ja nyä'äy'ëna'këty mëët ja mto'oxy'ëna'këty ets miitsëty mpëktëty m'uuktëty mëët ja nto'oxy'ëna'këtyës.

¹⁰ Yaa mtsëënëtëty, ma ëëtsëty yë nnaax nkajpnëtyën, jëtu'un tä jeexyë miitsëty xyjyä'ä'atën, tuntë ye'eytyë yaa ets juytyë këpätë mnaax mkamëty.

¹¹ Ënät ja Siquem tukmëmëtyäky ja mëti'ipë ënäty jyotmay'äjtypyën ja Dina ja tyeety ets ja myëkä'äxtëjk: N'amëtoowtëp npëjktsoowtëp yë mëyajtën ets xykyupëktëty. Ëjts nyakäämpyës oy miitsëty tii xytyim'amëtowtëty mëjpë këjääpë.

¹² Oy jëtu'un kyayajtukjuuky'äty, e ëjts ënaanpës jëtu'un nyaka'any, nyakëpës näjyëtu'un näynyamo'ojë ma miitsëtyën, ko xy'a'ixëtëty ets npëkëtyës n'uukëtyës mëët yë kiixy.

¹³ E ja Siquem ka'ap ënäty ja näywyinkutsë'kën të tmëët'aty ma ja Dina, paaty ja Jacob ja y'u'unk y'ëna'k mëët ja näwyin'ë'ënën t'ëtsoowtë ja Siquem ets ja tyeety Hamor,

¹⁴ tä t'ënëmaaytyë: Ka'ap tjëkyäp ëëtsëty nmo'otëty yë n'utyëtyës tu'uk ja ye'etyëjk mëti'ipë ka'ap ja ye'etyëjkajtën nyatsujk'ëwtityëtyën, jä'ä ko tsëtyu'unmëët ëjts nëjkx nwë'ëmtë.

¹⁵ Ënät ëëtsëty n'a'ixëtëty pën mkupëjktëp mëti'ipë yam myaj'amëtowantëpën, ko jëtu'un mja'ay'atëty tä ëëtsëtyën, ko xynyatsujktu'utëty ja mye'etyëjk'ajtënëty ets tu'kë'ëyë jënu'un yajpaatën yë yä'äy'ëna'këty ma miitsëtyën.

¹⁶ Ënät tëy miitsëty mpëktëty mëët ja to'oxy'ëna'këty mëti'ipë ëëtsëty njä'ä'ajtëpën etsës npëktëty n'uuktëty mëët ja mto'oxy'ëna'këty näjyëtu'un, jëtu'unts ënät jotkujk n'ijtmujkmëty ntsënaamyujkmëty ets tu'ukyë naax tu'ukyë kajpn nyajpatmëty.

¹⁷ E Pën miitsëty ka'ap xy'a'ixëtë ya'atë winma'any mëti'ipë yam myaj'amëtoowtëpën, nikë oy'atëp ko ëëtsëty yaa ntimpyëtsëmtëty ets min ëëts n'ëknëjkxtë nän npawowtëpës ja n'utyëtyës Dina.

¹⁸ Yë Hamor mëët yë myaank Siquem ojts tkupëktë ijxtëm ënäty të yaj'ënëëmëtën, ko ja ye'etyëjkajtën tnatsujk'ëwtitëty.

¹⁹ Yë Siquem ka'ap nëkoo xëëw po'o tyajtëkooy, ënätyë ojts tnatsujk'ëwtity ja ye'etyëjkajtën, jä'ä ko yajxon ënäty mëk tsoky ja Jacob ja nyëëx. Ja Siquem mëët ja tyeety mëj'äämpy ënäty yajjëkyäptë ma ja naax kajpnën,

²⁰ ënät ojts nimäjtsk nyëjkxtë jam ma ja naax kajpn yajnitëkën, tääts jam t'ënëmaaytyë ja ja'ayëty mëti'ipë jam to'ktëpën ets tu'kë'ëyë jënu'un kyunaax'at kyukajpn'atën:

²¹ Ya'atë ja'ayëty ëjts yë nmëku'uk'ajtëmë ets yaa tsyëënëja'antë; jyuyan kyëpätantëp yë naax kam ets ijxtëm xy'ixtën yaa tää naax kam jyätyë oy pën jënu'un timtsyokëty; ëëts'ajtëm jyëkyejpy mëët npëjkmëty yë nyëëxëty ets yë'ëjëty jyëkyejpy mëët pyëktëty yë nnëëx'ajtëmë.

²² E yë'ë jä'ä y'ëna'antë ko ënät yaa tsyëënëja'antë mëët ëëts'ajtëmë, pën nkupëjkëm mëti'ipë tsyojktëpën ntu'unmëty, ko ëëtsajtëm natsujk'ëwtijtmëty ja nye'etyëjk'ajtëmë ijxtëm yë'ëjëty tukjuuky'atën.

²³ Tu'kë'ëyë mëti'ipë yë'ë myëët'ajtëpën ets jyëyujkëty njä'ä'ata'anëm ëëtsajtëm näjyëtu'un. Je'eyëp ko ëëtsajtëm n'ëna'anmëty oy'atëp, tääts yë'ëjëty yaa wyë'ëma'antë tsënääpyë.

²⁴ Tu'kë'ëyë ja ëna'ktëjkëty mëti'ipë ënäty ja jyëmëjt të tpatnëtën ets y'akujktuntëty kyëmoontuntëty ojts tkupëktë ja mëti'ipë ënäty ja Hamor mëët ja myaank Siquem nyikajpxtëpën, tää ja ye'etyëjkajtën yajnatsujk'ëwtijtaaytyë.

²⁵ E yë Jacob yë myaankëty mëti'ipë xyëëwajtëpën Simeón ets Leví, yë Dina yë y'äyëty, ojts tsyoontë ets ojts nyëjkxtë kajpnjotm kom tëkëëk xëëw, jä'ä xëëw ojts tpëktë ma ënäty ja ye'etyëjktëjk ja pëjkën ijxën jam tmënax tyajnaxtën ko të yajtsuktën, tääts tkupujxtaaytyë jënu'un ënäty jam yajpaatën; jä'ä ko yë'ëjëty ka'ap ënäty jëtu'unyë tnayajninaxa'antë ijxtëm ja Siquem të y'ëti'ityën ma ja y'utyëtyën Dina.

²⁶ Jä'ä ojts näjyëtu'un tkupuxtë ja Hamor ets ja myaank Siquem, tääts tyajpëtsëëmtë ja y'uty Dina ma Siquem ja tyëjkën, tä ojts jatëkok wyimpijtkojnëtë.

²⁷ Ënät ojts ja wiinkpë jyaak mintë ja Jacob ja myaankëty ma ja kajpnën, e ko nyajxtë ma o'kpëtyën, tä ojts jam tyajpëtsëmtë winë kajpnjoty, jëtu'un ja tsyip y'äkë tyajnajxtë mëët ko ënäty ja y'utyëty Dina të kyayajwintsë'ëkë.

²⁸ Ojts jam tyajpëtsëmtë tsajppax, kupixyny, jëyujk, tsajpkaa ets tu'kë'ëyë jënu'un ënäty jam winë yajpaatyën.

²⁹ Ojts tmä'tsta'atë winë jëënjoty tëkoty jënu'un yë ja'ay jap winë tmëët'atën; tsyuumtaay myajtstaaytyë ja ëna'k'u'unkëty ets ja to'oxytyëjkëty näjyëtu'un.

³⁰ Ënät yë Jacob t'ënëmaay yë Simeón ets Leví: Miitsëty je'eyë nëkoo jëën tsip të xy'ëxkukëtë maas ëjtsën. E yë ja'ayëty jënu'un yaa kyunaax'at kyukajpn'atën ijxtëm yë Canaán ja'ayëty, Ferez ja'ayëty, xymyëtsiptsoontëpës ënät. Tu'ukyë nyämyuka'anëtë, tääts ënät nyajnipëtë'ëkëtyës; e ëjts wäänës yë ja'ay nmëëtëty, xyaj'ooktëpës ënäty tu'kë'ëyë mëëtësë n'u'unk n'ëna'k.

³¹ Tä ojts y'ëtsowtë: ¿Tix wä'än jeexyë jëtu'unyë na'ixtësë, koos yë n'uty jëtu'un tja'awënëtë to'oxytyëjk kujenyën mëti'ipë nätyo'k näyajkëpënë?