Gálatas 1 - Biblia Mixe de Quetzaltepec

¹ Ëjts Pablo, ka'apës jyä'äyëty të xykyexy, ni ja'ayës të xykyapëjktä'äky oy ayuk käjpxynyajxpë; Jesukristë mëët ja Tios Teety mëti'ipë ojts tyajjuukpyikyën ja Jesukristë, yë'ëjës të xypyëjktä'äky oy ayukkajpxwa'kxpë.

² Ëjts mëët ni'ëmukë ja nmëku'uktëjkës mëti'ipës yam mëëtën, tyam ya'atë noky ntuknikäxtës ja mëpëjkpëtëjkëty jampë yajpaatën Galacia y'itjotm.

³ Wä'än ja kënu'kxën ets ja jotkujk'ajtën mmo'ojëtë ja Tios Teety ets ja Wintsën Jesukristë.

⁴ Mëti'ipë të tku'ookën ja npoky'ajtëmë, ijxtëm ja Tios tsokyën ets n'ëwaatsëpëtsë'ëmëty ma tyampë tiempën ëxëëkpë tsaatsypyën.

⁵ Xëmëkyëjxm ja Tios yajmëjjaw yajjaantyjyawëty. Jëtu'un y'itëty.

Ka'ap ma wiinkpë aaw ayuk oypyë

⁶ Mëkës njawë ko miits pojën xy'ëxmatstë ja Tios mëti'ipë myaxtsoowëtën mëët ja Kristë ja y'oyajtën, ënätyë të xymyëpëktë wiinkpë aaw ayuk.

⁷ Tim tëypyë ka'ap ma wiinkpë aaw ayuk oypyë. Mëti'ipë tuunëp jajtëpën yë'ë ko tää ja'ay mëti'ipë yajma'atäämpyën je'eyë ja mmëpëjkënëty ets jëtu'un ja oy aaw oy ayuk mëti'ipë Kristë jyä'ä'ajtypyën tjayajtëkatsanë.

⁸ Pën jää pën mtuk'ëwa'anxëtë mëti'ipë tyijtëpën aaw ayuk oypyë ets ka'ap jyëtu'unëty ijxtëm ja oy aaw oy ayukën mëti'ipës të nnikajpxtën, kajpxpoky ja y'itëty, wä'än timpyënëty, oy y'ëjtsëty ëkë oy yë'ëjëty yë tsajpjotmëtë kukäjpxy mëti'ipë tsajpjotm tso'onpën.

⁹ Ijxtëmës të nnikäjpxyën, jëtu'unës yam jatëkok niwinpity: Pën jää pën mtuk'ëwa'anxëtë mëti'ipë tyijtëpën oy aaw oy ayuk ets ka'ap jyëtu'unëty ijxtëm ja mëti'ipës të nnikajpxtën, kajpxpoky ja y'itëty.

¹⁰ Ëjts ka'apës yë'ëjëty n'ixta'ay etsës yë ja'ay xykyumayëty, yë'ëjës ntsojkën'ajtyp etsës yë Tios xykyumayëty. Ka'apës yë'ëkyëjxmëty winë ntuny ets naaxwiinyëtë ja'ay xy'oyjyawëtyës. Koos jeexyë ëjts oy nwë'ëma'any ma naaxwiinyëtë ja'ayëtyën, ka'ap ënäty ja Kristë ëjts xy'ëktuunpë'ajnë.

Wi'ix Pablo tyëjkëyën oy ayukkajpxwa'kxpë

¹¹ Mëku'uktëjkëty, nijawëtë ko ya'atë aaw ayuk oypyë mëti'ipë miits të ntuk'ëwaanëtën, ka'ap jyä'äyëty t'aaw t'ayukëty.

¹² Ka'apës jyä'äyëty të xymyo'oy ets ka'apës pën të xytyuk'ijxpëky, Jesukristë kë'ëm të xytyuk'ixy të xytyuknijawës.

¹³ Tëë miits xymyëtoy'atë wi'ix ijty ëjts nja'ay'ätyën koos npatuny ja jutiis winma'any. Tëës mëk n'ëxëëk'ixy ja mëpëjkpëtëjk ets wi'ix ijty nyajkutëkoyä'änyës.

¹⁴ Ëjts ijty wäänëni'ik npatuumpy ja jutiis ja'ayëty ja y'ijxpëjkënëty këtiinëm ja nmëtu'knaxës; ni'ik ijty ëjts npatuna'anyës ja aptëjk ja wyinma'anyëty.

¹⁵ E tëëtëm ënäty ja Tios xywyin'ixyës naamka'anëm nmëxu'unk'atynyëmës ets tëëtëm ënäty myëyajtën mëët xyaxtsoyës,

¹⁶ ets ojts xytyuk'ixy xytyuknijawës ja y'u'unk Jesús etsës nkajpxwa'kxëty ja Jesús ja jyä'ä ma ja ja'ayëtyën ka'apë jyutiis'atën. Ka'apës pën ja'ay nyajtëëy nyajtëtäky,

¹⁷ ka'apës ojts jam nnëjkxy Jerusalén ma ja ijxpëjkpëtëjkëtyën mëti'ipë jëyëjp pa'tëjkëtën këtiinëm ëjts, jamës ojts ënätyë nnëjkxy Arabië y'itjotm. Jamtsës nwinpijty ets nja'ajtyës Damaskë.

¹⁸ Kom tëkëëk jëmëjt ojts nnëjkxyës jam Jerusalén ets n'ixy'ata'anyës ja Pedro, mëti'ipës ojts jam mëët majkmokx xëëw n'ityësën.

¹⁹ Ka'ap ojts pën wiinkpë oy ayukkajpxwa'kxpë n'ixyës, yi'iyë ja Santiagë, ja Wintsën ja myëkä'äx.

²⁰ Y'ijxyp nyija'ap yë Tios ko tëy mëti'ipë yam miits ntuknija'ayëtëpën.

²¹ Oknëm ojts nnëjkxyës jam Sirië y'itjotm ets Cilicia y'itjotm.

²² Ka'apës ijty xy'ixy'atë mëti'ipë ja Kristë myëpëjktëpën jam Judea y'itjotm.

²³ Je'eyës ijty tmëtoy'atë: Ja mëti'ipë ijty y'ixjëtijty pyajëtijtypyën ja mëpëjkpëtëjk ets tyaj'ooka'any jä'ä tyam ja mëpëjkën kyajpxwä'kxyp.

²⁴ Ets ja Tios ijty tukmëjjawëtë koos ja njuukyajtën të tyajtëkatsy.