Filemón 1 - Biblia Mixe de Quetzaltepec

¹ Pablo, mëti'ipë tsumy ijtpën ko ja Kristë Jesús ja y'aaw y'ayuk tkajpxwa'kxë ets ja nmëku'uk'ajtëm Timoteo tkexy ja kajpxpo'kxën ma ja Filemonkën, mëti'ipë yajmëku'uk'ajtpën ma ja tuunkën

² näjyëtu'un yajtuknikäxtë ja kajpxpo'kxën ja nmëku'uk'ajtëmë mëti'ipë jam ye'eymyujktëpën ma tyëjkën, näjyëtu'un ja ntsë'ë'ajtëmë Apia ets ja n'ajty'ajtëmë Arquipo, mëti'ipë ka'ap pyo'kxyën.

³ Wä'än ja Tios nTeety'ajtëmë ets ja Wintsën Kristë Jesús mmo'ojëtë ja kënu'kxën ets ja jotkujk'ajtën.

Filemón tsyojkën ets ja myëpëjkën

⁴ Xëmë nja'amyetsy etsës ja Tios nkukajpxë,

⁵ jä'ä ko tëëjës nijawë ko xymyëpëky ja Wintsën Jesús ets ko xytsyoky xyjyawë mëti'ipë juuky'ajtëpën wa'ats.

⁶ N'amëtoopyës ja Tios ets mëët ja mmëpëjkën mtuknijawëtëty yajxon wi'ix tjëkyepyën tii oy ntu'unmëty ko yajmëët'aty ja tsojkën ja'awën ma ja Kristë Jesusën.

⁷ Akujk jotkujk ets xoontä'äkyës nnäjyawëty ko xytsyoky xyjyawë ja mëku'uk, ets të xyajjotkujktä'äky ja mëpëjkpëtëjk mëtipë yajpatëpën ma ja Tios ja nyaax kyajpnën.

Ko ja Pablo ja Filemón t'amëtooy ets ja Onesimë t'ëxajëty

⁸ Oyës njamëët'aty ja tëyajtën ets mijts ntuk'ënä'ämëty tii mtunëpën, koos ja Kristë ëjts ja y'ayuk nkajpxwa'kxë,

⁹ nikë oy yajmëtowëty ko mijts nmënu'kxta'akëty mëët ja tsojkën ja'awën. Ëjts Pablo, tëëjës nmëjja'ayënë ets tsumy matsyës yap n'ity koos ja Kristë Jesús ja y'aaw y'ayuk nkajpxwa'kxë.

¹⁰ N'amëtoy tu'uk ja mëyajtën ets ja nmaankës Onésimo xykyupëkëty, jä'ä koos jëtu'unës yam näpyëjktä'äkyë ijxtëm tu'uk yë u'unkteetyën ma ja mëpëjkënënën koos yap n'ity pujxn tëkoty.

¹¹ Tëëyëp, yë Onésimo ka'ap ojts oy mmëtunyë e tyam, tuunp mëk ma ëjtsën ets ma mijtsën.

¹² Tyam jatëkok ntuknikexy. Jëtu'un xykyupëkëty ijxtëm jeexyë ëjts kë'ëmën.

¹³ Tëës n'ëkmaay n'ëktajpë ets jeexyë yaa wyi'imy maajës nyajpaatyën tsumy matsy ets jeexyë yë'ë ja Jesukristë ja y'aaw y'ayuk tkajpxwa'kxë ijxtëm mijtsën.

¹⁴ Je'eyëp ko ka'apës tii ntuna'any mëti'ipë mijts ka'ap xyajkutukynyëmën ets ja mëyajtën mëti'ipë mtuumpyën tsojkënkyëjxm xytyunëty, ka'ap y'akwanëty.

¹⁵ Wä'änxyëp ja Onésimo ojts mpu'uye'eytyu'utyë tu'ktsojkyë ets ënät tyam yajpatnëty ma mijtsën xëmëkyëjxm,

¹⁶ je'eyëp ko ka'ap y'ëkjëtu'un'ajnë ijxtëm ijty nyitookyëtyën, Wintsën xyëëwkyëjxm xymyëku'uk'ajnëty, mëti'ipë ni'ik tsoowpatpën. Mëkës yë'ë ntsoky njawë, e mijts ni'ik mëpaat xytsyoky xyjyawë, ka'ap jye'eyëty ko nyaaxwiinyëtë ja'ayëty näjyëtu'un ko yajmëkä'äx'aty ko ja Wintsën të tmëpëky.

¹⁷ Jëtu'un, pën xymyëku'ukja'apës mijts, kupëk ijxtëm jeexyë ëjts kë'ëm xykyupëkyën.

¹⁸ Pën tëë yë Onésimo mmëtuuntëkoyë, ëkë pën jap mënu'kxy'ätyë, ëjts nkëpätëp.

¹⁹ Ëjts Pablo, kë'ëmës yam nja'ay ya'atë noky. Ëjts nkëpätäämpy yë nu'kxy. Ka'apës yam n'ëna'any ets mijts xykëpätëty, jä'ä ko tamës mijts xymyënu'kxy'äty ko të ntukmëmëtyä'äky ja nitsokën ets ja Kristë të mpokymye'kxyë.

²⁰ Jëtu'un mëku'uk, tun ya'atë mëyajtën, yajnikëxë'ëk ko tu'ukyë nmëpëjkëmë ma ja Wintsën Jesukristën. Yajotkujk'at yë n'aaw njotës ko ntu'kmëku'uk'ajtëmë ma ja Jesukristë yajmëpëkyën.

²¹ Paaty nnijayë, jä'ä ko njëjp'ijxypës ko mijts mja'akyujkëp ets mëtoop, nnija'apës ko mtunäämpy mëti'ipë yam n'amëtoopyën.

²² Tyam njaak amëtoy wiinkpë mëyajtën, jam tu'uk yë ijtakn nipëjktaakë ma mtëjkën tamës nja'ta'any; jä'ä ko njëjp'ijxypës ko Tios t'ëtsoowinpita'any ja mjëëytyak mnu'kxtakënëty maa xypyëjktsowtën ko nëjkx nku'ixëtë.

Ko ja Pablo tjaakyajknaxy ja kajpxpo'kxën ets ja kënu'kxën

²³ Mkajpxpo'kxëtëp ja Epafras, nmëpujxntëjk ja'ayës ma yajkutsumy'itën ja Jesukristë,

²⁴ näjyëtu'un mkajpxpo'kxëtë ja Marcos, Aristarco, Demas ets Lucas, mëti'ipës xypyutëjkëtëpën ma tuunkën.

²⁵ Wä'än ja Wintsën Jesukristë mkënu'kxëtë.