Éxodo 7 - Biblia Mixe de Quetzaltepec

¹ Ënät yë Tios t'ënëmaay yë Moisés: Ëk'ix, mijts jëtu'un yam mpëjktäkpy tääjës jeexyë ëjts kë'ëm yë yajkutujkpë nmëkäjpxyën, e yë m'ajty Aarón yë'ë nyikajpxëp ja m'aaw m'ayuk.

² Mijts mtukmëmëtya'akëp yë Aarón tëkokyë mëti'ipë yam ntukmëmëtyäkpyën, e yë'ë tyukmëmëtya'akëp yë mëj'ënä'ämpë ets t'ëxmatsëty yë Israel ja'ayëty ma nyaax kyajpnën.

³ Ëjts kë'ëmës nëjkx n'ëwa'atsy ets mëj'ënä'ämpë ka'ap tsojk kyäjpxyjyä'äkyukëty, jëtu'un'äämpy tjëkyäpëty etsës ja nmëjajtën kanaakpëky nyaj'ixëtëty jap Egiptë ets ma tëkokyë yë it naaxwiinyëtë tnitänë.

⁴ Yë mëj'ënä'ämpë nijënu'un nëjkx kyakäjpxyjyä'äkyukë ets ka'ap tmëpëkëty ja m'aaw m'ayukëty, e ëjts mëj këjääjës yë nmëjajtën ets nkutujkën jap nyaj'ixa'anyë Egiptë, mëët tu'uk yë ënä'ämën kutujkën mëjpë jaantypë njuuta'anyës yë nnaaxës nkajpnës, yë'ë jëtu'un yë Israel kajpn jap Egiptë.

⁵ Koos ënäty të nyaj'ixyë ja nmëjajtën jap Egiptë, ets koos ënäty të njuuty ja Israel kajpn, jëtu'un nëjkx yë Egiptë ja'ay nijawëtë ko ëjts Wintsën.

⁶ Moisés ets Aarón jëtu'un ojts winë tuntë ijxtëm ënäty ja Tios të tyuk'ënä'ämëtën.

⁷ Moisés jä'ä ënäty yë jyëmëjt majkta'px, e yë Aarón jä'ä yë jyëmëjt majkta'px tëkëëk ko më''ëka'any myëtyaktë mëët ja yajkutujkpë.

Ja Aarón ja tyajk

⁸ Ënät yë Tios t'ënëmaay yë Moisés ets Aarón:

⁹ Ko yë mëj'ënä'ämpë m'amëtowëtëty ets xyaj'ixëtëty tu'uk yë mëj'ajtën, yë Aarón yë'ë m'ënëëmëp ets tkajpë'ëkëty yë tyajk ets tnajtsjëpipëty ma yajkutujkpë wyintuuyën ets ja tajk tsa'any y'awinpitëty.

¹⁰ Tä ja Moisés ets ja Aarón ojts tninëjkxtë ja mëj'ënä'ämpë ets jëtu'un tjantyuuntë, tä ënäty ja Tios të y'ënä'ämëtën. Ja Aarón ojts nasjëpipë ja tyajk yajkutujkpë wyintum ets ma ënäty jam yajpaatën ja tyuunpëtëjk, tä ja tajk ënätyë y'awinpijty tsa'any.

¹¹ E yë mëj'ënä'ämpë ojts tnikäxë ja wyijyjyä'äytyëjk ets ja xyëëwmääpyëtëjk, yë'ëjëty jëtu'un tä ënäty winë tuntën, näjyëtu'un ojts y'ëtëtstëpë.

¹² Nitu'ukjaty ojts tnajtsjëpipëtë ja tyajkëty ets ojts y'awinpijta'ay tsa'any, ja Aarón ja tyajk jä'ä ojts tjë'ënta'ay ja xëëwmääpyëtëjk ja tsyä'änyëty.

¹³ Oy jëtu'un jyatuun jyajajtë, yë yajkutujkpë ka'ap ninu'un kyäjpxyjyä'äykyujkëy, jëtu'un tä ënäty ja Tios të tnikäjpxyën.

Ja ne'pyny mëti'ipë ojts më''ëka'any y'ëyo'on'atyën

¹⁴ Ok jatëkok yë Tios t'ënëmaay yë Moisés: Yë mëj'ënä'ämpë ka'ap ninu'un jyä'äkyukë, yë'ë ninu'un tkatimy'ëxmatsa'any yë Israel ja'ayëty.

¹⁵ E jopy tsojk nëjkx xy'ijxkojy, ko nyëjkxëty nëë ëkë'p, jap nëjkx xy'ëwxity, mënëjkxëp ja mtajk mëti'ipë ojts y'awinpityën tsa'any.

¹⁶ Tääts jap xy'ënëëmëty: Yë Wintsën mëti'ipë yë hebreo ja'ayëty Tyios'ajtëpën, tëëjës xy'ayukmo'oy ets mijts ntuk'ëwaanëty, jëtu'un m'ënë'ëmxëty: Ëxmats yë nnaax nkajpnës, wä'änës min xy'ëwtaty yam wintë'ës'itum. E tyampaat mijts ka'ap mkäjpxyjyä'äkyukë.

¹⁷ Paaty tyam, jëtu'un yë Tios y'ënä'äny: Tyam xynyijawëty ko ëjts Wintsën. Koos ënät yam nwojpyu'kxëty yë nëë, mëti'ipë pëyë'kpën ma mëjnëëjën, mëët yë ntajkës, m'ixëp ënät ko ne'pynyën y'awinpitëty.

¹⁸ O'kta'ajaanp yë nëë jëyujk ets nëë ëxëëkëm xyuuka'any jyoka'any, niwi'ixtsow tkajëkyäpëty wi'ix yë Egiptë ja'ayëty t'uuktëtyën.

¹⁹ Tä yë Tios näjyëtu'un t'ënëmaay yë Moisés: Ënëëmë yë Aarón wä'än tnajtstijë yë tyajk jam ma mëjnëëjën, ma nëëwokën, ma nëë'akëyën ets ma Egiptë ja'ayëty yë nyëëjëty tyajnipätën ets oy tyimmaajëty ma jaty yë nëë tyaj'itën, tëkokyë ne'pnyën y'awinpijta'aja'any. Aak ne'pnyën jyajta'aja'any yë nëë, oy yë'ëjëty mëti'ipë japën ma tsiiyën ëkë ma nëëtu'tsën.

²⁰ Moisés ets Aarón ojts jëtu'un tuntë, tä ënäty yë Tios të y'ënë'ëmxëtën. Ënät ja Aarón ojts xyajjë'ëky ets tnëëkukäjpy ja tyajk, tam ënäty ja yajkutujkpë t'ixy, näjyëtu'un ja tyuunpëtëjk ojts t'ixt, tu'kë'ëyë ja nëë ojts y'awinpijta'ay ne'pny.

²¹ O'ktaaytyë ja nëë jëyujk, ja nëë ëxëëkëm ojts xyu'knë jyojknë, wi'ix ja Egiptë ja'ayëty t'ëk'uuktëty. Jap Egiptë aak ne'pyny ënäty yaj'ijxnëp oy myaa'ajnë.

²² E ja xëëwmääpyëtëjkëty ets ja wijyjyä'äytyëjkëty ojts näjyëtu'un tyaj'awinpitë ja nëë ne'pny, jëtu'un ojts tuntë tä ënäty yë'ëjëty tuunk'atën, yë mëj'ënä'ämpë je'eyëm ka'ap tja'akyukë ja aaw ayuk tä ja Moisés ets ja Aarón jya'ëna'antën, jëtu'un ojts y'ëti'itsy tä ënäty ja Tios të t'akäjpxyën.

²³ Tä ja mëj'ënä'ämpë ojts wyimpijnë nyëjkxnëpë jatëkok ma ja kyutujktaknën, mëti'ipë ënäty të tyuny të jyätyën, ka'ap ja tmëjpëjktäky.

²⁴ Tä ja Egiptë ja'ayëty je'eyë ojts may tyajkojtë ja nëëwooky jam nëëpë'am ets jap tyajwintë'kxtë ja nëë, jëtu'unts ja wya'atsnëë tjaakpaatë, jä'ä ko ja mëjnëë ka'ap ënäty tjëkyepy t'uuktëty.

Ja maynyooty, ja mëmäjtskpë ja ëyo'on

²⁵ Wëxtujk xëëw ënäty të nyäxy, ma ja Tios ojts twojpyu'kxyën ja nëë,