Éxodo 4 - Biblia Mixe de Quetzaltepec

¹ Yë'ëjëty ka'apës yë xymyëpëktëty ets nän ka'apës yë xytyuntëty kyëwentë, jëtu'un y'ëtsooy ja Moisés. Yë'ëjëty tsojk nëjkx ni'ikyë y'ëna'antë, ko yë wintsën ka'ap maa të npaatyës.

² Tääts ja Tios yajtëëwë: ¿Ti tampë xymyëëtëtyën mkë'ëjotm? Tajk yë'ë, jëtu'un y'ëtsooy yë Moisés.

³ Tä ojts yë Tios y'ënë'ëmxëty: Najtsjëpipë naaxkëjxy. Ënät ojts yë Moisés tjantynyajtsjëpipë yë tyajk ets ojts y'awinpity ja tyajk tsa'anyën. Yë Moisés ko jëtu'un t'ijxy ënätyë ojts pyëyë'ktsoony ets ojts jyakä'äka'any.

⁴ Tä ja Tios ojts ënätyë myëkäjpxyë ets y'ënëmaayë: Nastijë yë mkë'ë ets xymyatsëty yë tsa'any ma pyi'ixyën. Yë Moisés ojts ja tsa'any jam tmatsy ma ja pyi'ixyën ets jatëkok y'awinpijty tajk.

⁵ Ya'atë yë'ë jëtu'un ets tmëpëktëty, ko yë Tios yë'ë jëtu'un të nyänyikëxë'ëkyë ma mijtsën, mëti'ipë ja m'ap m'ok y'ëwtajtën, yë Tyios yë Abraham, Isaac ets Jacob.

⁶ Ënät ja Tios ojts näjyëtu'un y'ënë'ëmxëty, tyam këtiijë ënät jap yë mkë'ë ma mxëkätën. Ënät ja Moisés ojts ja kyë'ë tkutijë ma xyëkätën, ko ojts tjuuty ënät t'ijxy ko tëëtëm ja kyë'ë y'ujtsta'ay mëët yë pu'uts pa'am, je'eyë janty poop kyëxë'knë jëtu'un tä kyëxë'ëkyën yë tsajp'o'pyky.

⁷ Ënät ja Tios ojts y'ënë'ëmxëty: Këtiijë jatëkok yë mkë'ë ma mxëkätën. Moisés jëtu'un ojts tjantytyuny, ojts ja kyë'ë tkutijë ma xyëkätën, e ko ojts tjuuty, tëë ja kyë'ë tsyo'oky.

⁸ Ënät ja Tios y'ënëmaayë: Pën yë'ëjëty ka'ap tmëpëktë ja mëj'ajtën, ko më''ëka'any xyaj'ixëtëty ets nijënu'un mkatunëtëty këwentë, ja mëmäjtskpë jä'ä myëpëktëp.

⁹ E pën kajtsën ninu'un mtimmyëpëjkëtëpën ets ka'ap mtunëtë këwentë, oy jëtu'un ya'atë ja mëj'ajtën xyjyayaj'ixyë, ja mëtu'ukpë ets ja mëmäjtskpë, tyaa xytyunëty, nëë wäänë mjääpëp jap nëë'ëkë'p ets xynyaxkutämëty e ko ja nëë tyäämkëta'akëty naaxkëjxy, ne'pny y'awinpitëty.

¹⁰ Ay Wintsën. Jëtu'un y'ëtsooy ja Moisés. Ëjts nijënu'unës nkatukjaty nkajpxëty ets ko jyëtu'unëty ka'ap tyamnëmëty maas yam mijts jëtu'un xymyëkäjpxyën, ëjts jëtu'unyëmës ka'ap oy n'ëy nkäjpxy, koos ënät ëjts njaakajpxpë, je'eyës nëkoo ntyäty y'awë'ëmë.

¹¹ E yë Tios tyaa ojts y'ëtsoyë: ¿Pën yë ja'ay të myo'oyë yë y'aaw? ¿Tii këtii y'ëjtsëty yë ja'ay të nyajkojyësë, oy yë'ëjëty mëti'ipë uumën, mëti'ipë natën, mëti'ipë wiintsën ets mëti'ipë ijxpënë?

¹² Paaty nëjkx tyam, ëjts mijts njämyëët'atäämpy, ko ënäty mkajpxa'any mëtya'aka'any, ëjts mijts ntukni''ixëp tii mkajpxëp mëtya'akëpën.

¹³ Yë Moisés ni'ikyë y'ënaan'ëtë'ëtsy: Ay Wintsën, yë'ëjës yam n'amëtoopy yë mëyajtën ets wiinkpë xykyäxëty.

¹⁴ Yë Tios wiink ojts tjawë ko jëtu'un ja Moisés y'ënä'äny, ënät y'ënëmaayë: Yë'ë ënëëmë yë m'ajty Aarón, yë Leví ja'ay, nnija'apës ko yë'ë oy yë y'iy kyäjpxy, tää mniminyë ets jotkujk ënät nyäjyawëtëty, ko m'ixëtëty.

¹⁵ Kajpx mëtya'ak mëët ets tuk'ëwa'anëtya'a tii kyajpxëpën, ëjts yajpataanpës xëmë mëët yë'ë ets näjyëtu'un mëët mijts, yë'ë mtukni''ixëjanëp tii mëpaat xytyuntën.

¹⁶ Mijts mëëtmëtya'akëp yë Aarón, jëtu'un tääjës jeexyë ëjts nmëmëtyä'äkyën, e yë Aarón yë'ëts ja naax kajpn tyukmëmëtyakta'ajëp, jëtu'un tä ënäty mijts të xy'ënëëmën.

¹⁷ Mkapëp ya'atë mtajk, jä'ä ko yë'ë jëtu'un mëët winë mëj këjää xytyuna'any.

Jëtu'un yë Moisés jatëkok wyimpijty jap Egiptë

¹⁸ Ënät ja Moisés wyimpijty ma ja myë't ja tyëjkën ets t'ënëmaay: Tyam kopkpëky ko nëjkxëtyës jap Egiptë, ma jap tsyëënëtën ja njëëky nmëku'ukës. Yë'ëjës nëjkx n'ixa'antë etsës nijawëja'any, pën jap jyaak juuky'atë. Oy, ka'ap tääpë wyi'ixëty, tyam nkexy oy tsuj, jëtu'un ojts y'ëtsoyë ja Jetro.

¹⁹ Jam ënäty Madián tsyëënënëm ja Moisés, ko Tios y'ënëmaayë: Wimpit jap Egiptë, jä'ä ko ja ja'ayëty mëti'ipë ënäty myaj'ookanëpën tëë ja y'o'ktaaynyëtë.

²⁰ Ënät ja Moisés ja y'u'unk y'ëna'k ojts tyajpäjta'ay jëyujkkëjxm, näjyëtu'un ja tyo'oxytyëjk ets tsyo'ontë, nyëjkxnëtë jap Egiptë. Ojts tpakäpy ja tyajk mëti'ipë ënäty ja Tios të tyuk'ëne'emyën tpakapëty.

²¹ Tä ja Tios t'ënëmaay ja Moisés: Ko mja'tëty jap Egiptë, wa'ats xjyä'ämyäjtsta'ajëty ja mëj'ajtën mëti'ipë mtunëpën ma yajkutujkpën, jëtu'un ijxtëm xynyijawën, ko tëë mijts nmo'oy yë kutujkën ets mëj'ajtën xyaj'ixëtëty. Ëjts mëti'ipës xypyatpën, yë yajkutujkpë ni'ikyës kujuun mpëjkta'aka'any ets ka'ap tsyojkja'akyukëty, jëtu'un'äämpy ka'ap ja Israel ja'ayëty tsojk'ëxmatsëty.

²² Ënät xy'ënëëmëty yë yajkutujkpë: Jëtu'un yë Wintsën y'ënä'äny: Yë Israel yë'ëjës jëtu'un nja'ap tääjës jeexyë nkä'äxkopkëtyën.

²³ Tëë n'ënëëmë etsës yë n'u'unk nmaay xy'ëxmajtsëty, wä'änës min xy'ëwtatë, e jä'ä ko ka'ap niwi'ixtsow xy'ëxmatsa'any, tyam nyaj'ookëpës ënät yë mkä'äxkopk.

²⁴ Jam ma ja Moisés ënäty tyajnaxa'anyën ja tsuu mëët yë y'u'unk y'ëna'k, ënät yë Tios nyipëtsëëmë ets ojts jyayaj'oka'anyë.

²⁵ Ënät yë Séfora ojts tu'uk yë tsaa jëjpë t'ixta'ay, jëtu'unpë tä tsujknën, tä ojts tsuky ja y'u'unk ja ye'etyëjkajtën na'ëwtityë ets ojts jä'ä tuk'ony ja Moisés ja tyeky tä t'ënëmaay: Tëyajtën mijts yam n'ënëëmëty ko mijts paaty nmë''ëtsowaty jä'ä ko ne'pynyës je'eyë xytyuktoonp xytyukmajtsp.

²⁶ Ënät ojts ja Tios t'ëxmatsy ja Moisés. Paatykyëjxm yë Séfora y'ënäny jëtu'un, ko ja Moisés ënäty tniye'etyëjk'aty ets ko tu'knax ënäty ja nye'pynyëty, jä'ä ko ja myaank të tnatsujk'ëwtijtë ja ye'etyëjkajtën.

²⁷ E yë Tios tëë ënäty t'ënëëmë yë Aarón: Nëjkx jam të'ëts'itum mnäpyäätyë mëët yë Moisés. Tä ja Aarón ojts tsyoony ets mëët ja Moisés nyäpyatë jam ma ja Tios ja tyun kyopkën. Jam ojts tkajpxpo'kxy ets tsu'kxy.

²⁸ Ënät yë Moisés tukmëmëtyaktaay yë Aarón tëkokyë mëti'ipë ënäty yë Tios të tyuk'ëne'emyën tnimëtya'akëty ets ko ënäty të y'ëne'emyë ja Tios ets kanaak ja mëj'ajtën tyaj'ixëtëty.

²⁹ Tä nimäjtsk tsyo'ontë ets tyajtu'ukmujktaaytyë ja mëjja'aytyëjkëty,

³⁰ ja Aarón ojts tnimëtyakta'ay ja aaw ayuk jëtu'un tä ënäty ja Moisés ja Tios të y'ënë'ëmxëtyën, ojts tyaj'ixëtë ja mëj'ajtën mëti'ipë ënäty ja Tios të tyuk'ënä'ämëtën tuntëty.

³¹ Ja ja'ayëty ojts jëtu'un tmëpëktë ja käjpxy mëtyä'äky ets tnija'awëtyë ko ënäty ja Tios myëmay myëtajëtë ets ko ënäty tëë t'ixy tnijawë wi'ix y'ëyowtë jyotëkoytyën, tä tyaj'ijxëtë ja näywyinkutsë'kën ko nyaaxkoowtë jëtu'un tä jeexyë yë Tios t'ëwtatën.